މިސްކިތްތަކުގައި ސިޔާސީ ޕާޓީތަކުން ދަރުސްދޭ އުސޫލު ސާފު ކޮށްދެއްވުމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އަރިހުގައި އެދިއްޖެއެވެ.

އިދިކޮޅު ޕްރޮގްރެސިވް ކޯލިޝަނުން މިރޯދަމަހު ސަލްމާން މިސްކިތުގައި ދަރުސް ދިނުމަށް ކުރި މަސައްކަތް އިސްލާމިކް މިނިސްޓްރީން ވަނީ ހުއްޓުވާފައެވެ. މިކަމާއި ގުޅިގެން މިސްކިތްތަކުގައި ސިޔާސީ ޕާޓީތަކަށް ދަރުސް ދިނުމުގައި އޮންނަ އުސޫލެއް ސާފު ކުރުމަށް މަޖިލިސް ރައީސް މުހައްމަދު ނަޝީދަށް މަޑުއްވަރީ ދާއިރާގެ މެމްބަރު އާދަމް ޝަރީފް ފޮނުވި ސިޓީގައި ބުނެފައިވަނީ ޕީޕީއެމް އާއި ޕީއެންސީއަކީ ރަމަޟާންމަހުގެ ރޭތައް އިޙްޔާކޮށް ދިރުވުމުގެ ޕްރޮގްރާމް ޤަވާއިދުން ހިންގަމުންދާ ޕާޓީތަކެއްކަމަށެވެ.

މި ރަމަޟާންމަހު މިސްކިތްތަކުގައި ދަރުސް ދިނުމުގެ ހުއްދަ ސިޔާސީ ޕާޓީތަކަށް ދޫކުރައްވާކަމަށް އިސްލާމިކް މިނިސްޓަރ ޑރ. އަޙްމަދު ޒާހިރު ޢަލީ ވިދާޅުވިކަމަށް ރާއްޖޭގެ ނޫސްތަކުން ޢާންމު ކުރުމާގުޅިގެން، ޕީޕީއެމްގެ ފަރާތުން ކިންގ ސަލްމާން މިސްކިތުގައި ދަރުސް ބޭއްވުމަށް އިސްލާމިކް މިނިސްޓްރީއަށް 6 އޭޕްރީލް 2012ގައި ވާނީ ސިޓީއެއް ފޮނުވާފައިވާނެކަމަށެވެ.

މިސިޓީއާގުޅިގެން މިސްކިތްތަކުގައި ސިޔާސީ ޕާޓީތަކުން، ޕާޓީގެ ލޯގޯ ޖަހައިގެން ދަރުސް ދިނުމުގެ ހުއްދަ ނުދިނުމަށް ނިންމަވާފައިވާކަމަށް އިސްލާމިކް މިނިސްޓަރ ފޯނުން ވިދާޅުވިކަމަށެވެ. ނަމަވެސް 8 އޭޕްރީލް 2022 ގައި އަދާލަތު ޕާޓީން ޝަހީދު ޢަލީ މިސްކިތުގައި އެ ޕާޓީގެ ލޯގޯ ޖަހައިގެން ދަރުސްވަނީ ބާއްވާފައިވާކަމަށާއި، އިސްލާމިކް މިނިސްޓަރ ޑރ. އަޙްމަދު ޒާހިރަކީ ޢަދާލަތު ޕާޓީއަށް ނިސްބަތްވާ ބޭފުޅަކަށްވެފައި އަދި ސިޔާސީ ޕާޓީގެ ލޯގޯ ޖަހައިގެން ދަރުސް ދިނުމުގެ ހުއްދަ ނުދެއްވަން ނިންމި ކަމަށް ވިދާޅުވިނަމަވެސް، ޢަދާލަތު ޕާޓީއަށް އެ ފުރުޞަތު ދެއްވަމުން ގެންދަވާކަން ވަނީ ފާހަގަ ކުރެވިފައިވާކަމަށް މިސިޓީގައި ބުނެފައިވެއެވެ.

އެހެންކަމުން ޕީޕީއެމުން ފޮނުވި ސިޓީއަށް މިއަދާ ހަމައަށްވެސް ޖަވާބު ނުދެއްވުމާއި ސިޔާސީ ޕާޓީތަކުގެ މެދުގައި ތަފާތު ކުރުންތައް ގެންގުޅުއްވަނީ ކީއްވެގެންތޯއާއި ދީނީ ދަރުސް ދިނުމަށް މިސްކިތްތައް ދޫކުރާ އުޞޫލެއް ކަނޑައަޅާފައިވޭތޯ ރައްޔިތުންގެ މަޖިލީހުގެ ކަމާބެހޭ ކޮމިޓީން ބައްލަވައި ދެއްވުމަށް އާދަމް ޝަރީފް ވަނީ އެދިވަޑައިގެންފައެވެ.