ޔޫކުރެއިންއާއެކު ވާކަން ސާބިތު ކޮށްދިނުމުގެ ގޮތުން، އިނގިރޭސި ބޮޑުވަޒީރު ޔޫކުރެއިންއަށް ވަޑައިގެން އެގައުމުގެ ރައީސް ވުލޮޑޮމީރު ޒެލެންސްކީއާއި ބައްދަލު ކުރައްވައިފިއެވެ.
އަދި މި ދަތުރުފުޅުގައި ޒެލެންސްކީއާއި ބައްދަލު ކުރެއްވުމަށްފަހު، ބޮޑުވަޒީރު ބޮރިންސް ޖޯންސަންވަނީ، ޔޫކުރެއިންއަށް އިނގިރޭސި ހަނގުރާމަމަތީ އުޅަނދުތަކާއި އަދި އޭގެ އިތުރުން ކަނޑުގެ އުޅަނދުތަކާއި ދެކޮޅަށް ހަމަލާދޭ މިސައިލްތައް އެގައުމަށް ފޯރުކޮށް ދެއްވާނޭކަމުގެ ޔަގީންކަންވެސް ޒެލެންސްކީއަށް ދެއްވާފައެވެ. އަދި ޖޯންސަންވަނީ ޔޫކުރެއިންގެ އަސްކަރިއްޔާއަށް ވަރަށް ބޮޑަށް ތައުރީފްވެސް ކުރައްވާފައެވެ.
"ރައީސް ޒެލެންސްކީވަނީ ލީޑަރޝިޕް ދައްކަވާ، އަދި ޔޫކުރެއިންގެ ރައްޔިތުންވަނީ، ޕުޓިންގެ އުދުވާންގެ ކުރިމަތީގައި ސާބިތުކަން ދައްކަވާ، އޭނާގެ ނުބައި މަގުސަދުތައް ނާކާމިޔާބު ކޮއްލައްވާފަ،" ޒެލެންސްކީއާއި ބައްދަލު ކުރެއްވުމަށްފަހު ޖޯންސަން ވިދާޅުވެފައި ވާކަމަށް، ޑައުނިންގ ސްޓްރީޓްއިން ނެރެފައިވާ ބަޔާނުގައި ބުނެފައި ވެއެވެ.
އަދި މީގެ އިތުރުން، އިނގިރޭސި ބޮޑުވަޒީރުވަނީ، ޔޫކުރެއިންގެ ބުޗާ ޓައުންގައި ރަޝިއާއިން ހިންގާފައިވާ އިންސާނިއްޔަތާއި ޚިލާފް ޖަރީމާތަކުގެ ސަަބަބުން، ޕުޓިންގެ އަގު އަބަދައްތަކާ ވެއްޓިގެން ގޮސްފައިވާ ކަމުގައިވެސް ވިދާޅުވެފައެވެ.
"ޕުޓިން، ބުޗާއާއި އިރުޕިންގައި ހިންގާފައިވާ އިންސާނިއްޔަތާއި ޚިލާފް ޖަރީމާތަކުގެ ސަބަބުން އޭނާގެ އަގުވެސް އަދި އޭނާގެ ސަރުކާރުގެ އަގުވެސް ވަނީ އަބަދައްޓަކާ ނެތިގެން ގޮސްފަ،" ޔޫކުރެއިންގެ ރައީސާއެކު ހުންނަވާ ވާހަކަ ދައްކަވަމުން ޖޯންސަން ވިދާޅުވެފައި ވެއެވެ.
ޔޫކުރެއިންއާއެކު ވާކަން ސާބިތު ކޮށްދިނުމުގެ ގޮތުން، ޔޫރަޕްގެ ލީޑަރުން ގެންދަވަނީ އެގައުމުގެ ވެރިރަށް ކީވްއަށް ވަޑައިގެން ރައީސް ޒެލެންސްކިއާއި ބައްދަލު ކުރައްވަމުންނެވެ. މިގޮތުން ޔޫރަޕިއަން ކޮމިޝަންގެ ރައީސާ ވޮން ޑަރ ލެޔެންވެސް ވަނީ ޔޫކުރެއިންއަށް ވަޑައިގެން ޒެލެންސްކީއާއި ބައްދަލު ކުރައްވާފައެވެ.
