ތުއްތު ދަރިފުޅު ނިންދެވުމަކީ ވަރަށް ނާޒުކު ކަމެކެވެ. އަދި އެހާމެ ބުރަ މަސައްކަތެކެވެ. ރޭގަނޑުގެ ނިދި ނަގާލައިގެންވެސް ބައެއް ފަހަރަށް ދަރިފުޅު ނިންދަވަން ޖެހެއެވެ. މިއީ ގިނަ ފަހަރަށް މަންމައާއި ބައްޕަ ވަގުތު ބަހައިގެންވެސް ނުކުރެވޭ މަސައްކަތަކަށް ވަނީ ވެފައެވެ.
ކުޑަ ދަރިފުޅު ނިންދެވުމުގައި ދަރިފުޅިގެ މަންމައަށްވެސް ގޯސްކޮށް ކަންކަން ކުރެވޭ ފަހަރުވެސް އާދެއެވެ. އަދި މިފަދަ ކަންތައްތައް ނޭގިނަމަވެސް ތަކުރާރުވަމުން އާދެއެވެ. އެހެންކަމުން މި ލިޔުމުގައި ބަލައިލާނީ މިފަދަ މައްސަލަތަކަށެވެ.
ދަރިފުޅު ލޯ އުނގުޅައި އާފުރި ހަދާނީ ނިދިއައުމުންކަމަށްވެސް ވެދާނެއެވެ. ގިނަފަހަރަށް މިފަދަ ހަރަކާތްތައް ފާހަގަ ނުކުރެވި ދަރިފުޅި ނިދަން ބޭނުންވާގަނޑީގައި ނުނިދެއެވެ. އަދި މިހެންވުމުގެ ސަބަބުން އެހެންގަޑިތަކުގައި ނިންދަވަން އުދަނގޫވާނެއެވެ. އެހެންކަމުން ދަރިފުޅުގެ ހަރަކާތްތަކަށް އިސްކަން ދިނުމަކީ ވަރަށް މުހިއްމުކަމެކެވެ.
އާންމުކޮށް ތުއްތު ދަރިފުޅު ނިދާފައި އޮވެފައި ހޭލެވުމުން، އަލުން ނިންދެވުމަށްޓަކައި ނާނާކިއުން، އުރާލައިގެން ހިނގުން، އުނގައްލައިގެން ހެއްލުމަކީ ޒަމާނުއްސުރެން ދިވެހިންގެ މެދުގައި އޮންނަކަމެކެވެ. އެހެންނަމަވެސް އަހަރެމެންނަށް ނޭގޭ ކަމަކީ މިގޮތަށް ކަންތައް ކުރުމުން އެވަގުތަށް ދަރިފުޅަށް ނިދުނުނަމަވެސް ނިދި ރަނގަޅަށް ހަރުނުވާކަމެވެ. ނަތީޖާއެއްގެ ގޮތުން ކުއްޖާއަށް އަނެއްކާވެސް ހޭލެވެނީއެވެ. ތުއްތު ކުދިންނަކީ ވަރަށް ފަސޭހައިން ކަންތައްތައް ނަގައިގަންނަ ބައެކެވެ. އެހެންކަމުން މިގޮތަށް ހޭލެވުމުން ނުނަގާ ބާއްވާނީއެވެ. އޭރުން އަނެއްކާވެސް އަމިއްލައަށް ނިދަން އާދަވާނެއެވެ.
ކުއްޖާގެ ނިދުމުގެ ތާވަލު ބަދަލުކުރުމަކީވެސް ވަރަށް ގިނަ ފަހަރަށް މަންމައިންނަށް ކުރެވޭ ކަމެކެވެ. އެހެންނަމަވެސް މިގޮތަށް ކަންތައްކުރުމުން ކުއްޖާގެ ނިދުމުގައި އެއްވެސް ތަރުތީބެއް ނޯންނާނެއެވެ. ނަތީޖާއެއްގެ ގޮތުން ދަރިފުޅާއި މަންމައަށްވެސް ރަނގަޅަށް ނުނިދޭނެއެވެ. އަދި ހަމައެހެންމެ ކުއްޖާ ނިންދަވަން މަސައްކަތް ކުރުމަށްފަހު ނުނިދާ ގިނައިރުވެއްޖެނަމަ ބައެއް ފަހަރަށް މަސައްކަތްކުރުން ހުއްޓާލެވެއެވެ. މިހެން ކަންތައް ކުރުމުގެ ސަބަބުންވެސް ކުއްޖާގެ ނިދުމުގެ ތާވަލަށް ބުރޫ އަރައެވެ. އެހެންކަމުން ކުއްޖާގެ ނިދުމުގެ ތާވަލު ދެނެގަނެ އެއާއި އެއްގޮތަށް މަންމައާއި ބައްޕަގެ ނިދުންވެސް ބަދަލުކުރުމަކީ މުހިއްމު ކަމެކެވެ.
ނިންޖަކީ ތުއްތު ދަރިފުޅު ރަނގަޅު ސިއްހަތެއްގައި ހެދިބޮޑުވުމަށް ވަރަށް ބޭނުންތެރިއެއްޗެކެވެ. އެހެންކަމުން މިފަދަ ކުދި އެހެންނަމަވެސް އާންމުކޮށް ހެދޭ ގޯސްތަކަކީ ކޮބައިކަން ދެނެގަނެ، ރަނގަޅު ކުރުމަކީ ވަރަށް މުހިންމު ކަމެކެވެ.
