ރައީސް ސާލިހު ވެވަޑައިގެންފައި ވަނީ، އާ ގާނޫނު އަސާސީން މަލްޓިޕާޓީ ޑިމޮކްރަސީ ރާއްޖެއަށް ތައާރަފް ވެގެން ދިއުމަށްފަހު، ދައުރުގެ ދެބައި ވެގެންދިއުމާ ހަމައަށްވެސް ކޯލިޝަން ވެރިކަމެއް ކުރެއްވުނު ހަމަ އެކަނި ރައީސްއެވެ.

2008 ވަނަ އަހަރުގެ ގާނޫނު އަސާސީން ގެނެސްދިން ރިޔާސީ ނިޒާމުގައި ފާއިތުވެދިޔަ 14 ވަރަކަށް އަހަރު ދުވަހުގެ ތެރޭގައި، ރައްޔިތުން ވޯޓު ދީފައިވަނީ މުޅިންވެސް ކޯލިޝަން ވެރިކަންތަކަށެވެ. އޭގެ މާނައަކީ، ވަކި ސިޔާސީ ޕާޓީއަކުން އެކަނި ރައްޔިތުންގެ މައްޗަށް ވެރިކަން ކުރަން އެއްވެސް ރިޔާސީ އިންތިޚާބެއްގައި ރައްޔުތުން ރުހުން ދީފައެއް ނުވެއެވެ.

އެހެންނަމަވެސް ފާހަގަ ކޮށްލާން ޖެހޭ އެންމެ މުހިންމު ނުކުތާއަކީ، އާގާނޫނު އަސާސީއަށްފަހު، ފާއިތުވެދިޔަ ދެ ދައުރުގައިވެސް، ބޮޑު ކޯލިޝަނަކުން އިންތިޚާބުތައް ކާމިޔާބުކޮށް، ފުޅާ ކޯލިޝަންއަކާއެކު ވެރިކަން ކުރަން ފެށިނަމަވެސް، އެ ކޯލިޝަންތައްވަނީ ދައުރުގެ ފުރަތަމަ އަހަރުގެ ތެރޭގައި ރޫޅިގެން ގޮސްފައިވައެވެ.

2009ވަނަ އަހަރު ކުރީގެ ރައީސް މުހައްމަދު ނަޝީދު ވެރިކަމަށް ވަޑައިގެންނެވުމަށްފަހު ސަރުކާރުގެ ފުރަތަމަ 22 ދުވަހުގެ ތެރޭގައި ކޯލިޝަންވަނީ ރޫޅެން ފަށާފައެވެ. އަދި އެއަށް ފަހު ވެރިކަމަށް ވަޑައިގެންނެވި، ކުރީގެ ރައީސް ޔާމިންގެ ވެރިކަމުގައި، ކޯލިޝަން ވެރިކަމަށް އެއް އަހަރު ފުރިގެން ދިއުމުގެ ކުރިން، ކޯލިޝަންވަނީ ރޫޅިގެން ގޮސްފައެވެ.

އެހެންނަމަވެސް، ކުރީގެ ރިޔާސީ އިންތިޚާބުތަކެކޭވެސް އެއްފަދައިން ރައީސް ސާލިހުވެސް ކޯލިޝަންއާއެކީ ވެރިކަމަށް ވަޑައިގެންނެވި ނަމަވެސް، ކުރީގެ ވެރިކަންތަކާއި ޚިލާފަށް، އެއްގޮތަކުން ނުވިއްޔާ އަނެއް ގޮތަކުން ނަމަވެސް، އެމަނިކްފާނު މިވަނީ ކޯލިޝަން ރޫޅިގެންދިޔަ ނުދީ ވެރިކަމުގެ ބޮޑުބައި ކަޑައްތު ކުރައްވާފައެވެ.

ވެރިކަމުގެ ދައުރުގައި ދެން ބާކީ އޮތީ ދޮޅު އަހަރެއްހާ ދުވަހެވެ. އެހެންނަމަވެސް ދައުރުގެ ބޮޑުބައި ކޯލިޝަންއަކާއެކީ ކަޑައްތު ކުރެއްވުނު ނަމަވެސް، ދައުރުގެ ނިނުމަކާ ހަމައަށް ދަތުރުގެ މިސްރާބު މިއަދު ހިފާފަ ހުރިއިރު، އެމަނިކްފާނަށް ފާއިތުވެދިޔަ ތަނުގައި ކުރިމަތިވެގެން ގޮސްފައިވާ ގިނަ ގޮންޖެހުންތައް ކުރިމަތި ވެގެން ގޮސްފައިވަނީ ކޯލިޝަންގެ ތެރެއިން ނޫންކަން މިފުރުސަތުގައި ފާހަގަ ކޮށްލާން ޖެހެއެވެ.

އޭގެ ބަދަލުގައި، ކުރިމަތިލައްވަން ޖެހިވަޑައިގެންނެވި ގިނަ ގޮންޖެހުންތަކާއި، ފާޑު ކިޔުންތަކާއި އަދި އެންމެ ފަހުން އެމަނިކްފާނުގެ އިސްތިއުފާއަށްވެސް ގޮވާ ހަދާފައިވަނީ އަމިއްލަފުޅު ޕާޓީގެ ތެރެއިންނެވެ.

މެނިފެސްޓޯ ތަންފީޒު ނުވާ ވާހަކަ! މުޅިން އާ ވާހަކައެއް؟

ރައީސް ސާލިހުގެ ދައުރުގެ ފާއިތުވެދިޔަ 3 އަހަރެއްހާ ދުވަހަށް ރަގަޅަށް ނަޒަރެއް ހިންގާލުމުން ފަހަގަވާން އޮތް އެއް ކަމަކީ، ރައްޔިތުންގެ މަޖިލިހުގެ ސުޕަރ މެޖޯރިޓީ ސަރުކާރަށް ލިބިގެންދިޔަ ނަމަވެސް، ސަރުކާރުގެ ސިޔާސަތު ތަންފީޒު ކުރުމުގައި ސުޕަރ މެޖޯރިޓީގެ ފުރިހަމަ އެއްބާރުލުން ފާއިތުވެދިޔަ މުއްދަތުގައި ރައީސް ސާލިހަށް ލިބިގެން ގޮސްފައި ނުވާކަމެވެ.

އަދި އޭގެ ބަދަލުގައި، ރައްޔިތުންގެ މަޖިލިހުގައި އިދިކޮޅު ފަރާތްތަކެކޭ އެއްފަދައިން ނުވަތަ އެއައްވުރެވެސް މަތީ ދަރަޖައަކަށް، އެމްޑީޕީގެ ރައީސް ނަޝީދުގެ ފެކްޝަންގެ މެމްބަރުންގެ ފަރާތުން ރައީސް ސާލިހަށް ފާޑު ކިޔުން އަމާޒުވެގެން ގޮސްފައިވާކަން މިއީ ސާފުންކޮށް ފެންނާން އޮތް ހަގީގަތެކެވެ.

އެންމެ ފުރަތަމަ ވެރިކަމުގެ ނިޒާމު ބަދަލު ކުރުމަށް ރައީސް ސާލިހުގެ ފަރާތުން އެއްބާރު ނުލިބުނުކަމުގެ ތުހުމަތުތަކެވެ. އެއަށްފަހު، މަޖިލީހަށް ހުށަހެޅިގެންދިޔަ ނަފްރަތުގެ ބިލަށް ސަރުކާރުން ތާއީދު ނުކުރުމުން މަޖިލިހުގައި އެމްޑީޕީއަށް ނިސްބަތްވާ ބައެއް މެމްބަރުން ރައީސް ސާލިހުގެ އިސްތިއުފާއަށް މަޖިލިސް ފްލޯގައި ގޮވި ގޮވުމެވެ. އަދި އެއަށްފަހު، ނަޝީދަށް އަމާޒުކޮށް 6 މޭގައި ދިން ޓެރަރިސްޓު ހަމަލާގެ ފަހަތުގައި ތިބި މީހުން ހޯދުމަށް ރައީސް ސާލިހުގެ ސަރުކާރުން އެކަށީގެންވާ ގޮތެއްގައި މަސައްކަތް ކުރަމުން ނުދާކަމުގެ ތުހުމަތުތަކެވެ.

މިހުރިހާ ގޮންޖެހުންތަކަށްފަހު، މިއަދު މަޖިލިހުގެ ރައީސް ނަޝީދަށް ތާއީދުކުރާ ފެކްޝަންގެ ގިނަ މެމްބަރުންގެ ޝަކުވާއަކަށް ވެގެން މިދަނީ، ރައީސް ސާލިހުގެ ސަރުކާރުން އެމްޑީޕީގެ މެނިފެސްޓޯ ތަންފީޒު ކުރަމުން ނުދާކަމުގެ ޝަކުވާތަކެވެ. މަސްވެރިންގެ މަހަށް ހަމައަގު ނުލިބޭކަމުގެ ޝަކުވާތަކެވެ. ސަރުކާރަށް މެނިފެސްޓޯ ތަންފީޒު ނުވެގެން، މަސްވެރިން ބާނާ މަސަތައް ކަނޑަށް އުކާލަންޖެހޭ ކަމުގެ ޝަކުވާއެވެ.

ފާހަގަވާން އޮތް އެންމެ މުހިންމު ކަމަކީ، މި ޝަކުވާތަކަކީ އިދިކޮޅު ޕީޕީއެމްގެ ޝަކުވާތަކެއްވެސް ނުމެ ނޫންކަމެވެ. ސަރުކާރަށް އެމްޑީޕީގެ މެެނިފެސްޓޯ ތަންފީޒު ނުވުމުގެ ވާހަކައަކީ، ކުރިޔަށްދާ އެޕާޓީގެ ޗެއަރޕާރސަން އިންތިޚާބާއި ދިމާކޮށް، އެޕާޓީގެ ރައީސް ނަޝީދުގެ ފެކްޝަނަށް ތާއީދުކުރާ މަޖިލިސް ބައެއް މެމްބަރުންގެ ޝަކުވާއެކެވެ. މިފްކޯގެ ސްޓޯރޭޖް ފުޅާކޮށް، މަސްވެރިންނަށް ކުރިމަތިވާ މިފަދަ ބައެއް ދަތިތައް ހައްލު ކުރާކަށް ސަރުކާރުގެ ކަމާއި ގުޅުންހުރި މުވައްސަސާތަކަށް ފުރުސަތު ދޭންވެސް މިމެމްބަރުން ބޭނުންފުޅެއް ނުވެއެވެ. އަދި ސަރުކާރުގެ މަސް ކުންފުނީގެ ކެޕޭސިޓީ އިތުރުކުރުމަށް ސަރުކާރުން ކުރަމުން އަންނަ މަސައްކަތްތަކާއި، ހިންގަމުން އަންނަ ޕްރޮޖެކްޓްތަކުގެ ވާހަކަވެސް މަސްވެރިންނާ ހަމައަށް ގެންގޮސްދޭންވެސް މި ދެންނެވި މެމްބަރުން ބޭނުންފުޅު ނުވާކަން މިއީ ސާފުކޮށް ފެންނާން އޮތް ހަގީގަތެކެވެ. އަދި ހަމަ އެއާއެކު، ސަރުކާރުގެ މެނިފެސްޓޯގެ ތެރެއިން، ކޮށް ނިންމަމުންދާ ކަންކަމުގެ ވާހަކަ އެއްގޮތަކަށްވެސް މި ދެންނެވި މެމްބަރުންގެ ދުރުމީއަށް އަރަމުން ނުދާކަމީވެސް، ވަރަށްވެސް ފާޅުކަން ބޮޑު ގޮތެއްގައި ފެންނާ އޮތް ހަގީގަތެއްކަމުގައިވެސް ދަންނަވާން ޖެހެއެވެ.

އަދި ހަމައެއާއެކު، މަޖިލިސް ބައެއް މެމްބަރުންގެ ފަރާތުން، މެނިފެސްޓޯ ތަންފީޒު ނުކުރާކަމުގެ ފާޑުކިއުން ސަރުކާރަށް އަމާޒު ވަމުންދާއިރު، މި ފާޑުކިއުންތަކުވެސް އެންމެ ކުރީގައި ކުރީގެ ރައީސް ނަޝީދު ހުންނެވިކަން މިއީ ވަކީން ޚާއްސަކޮށް ފާހަގަވާން އޮތް ކަމެކެވެ.

އަމިއްލަ ސަރުކާރުގެ މެނިފެސްޓޯވެސް އެންމެ ފަހުން ކެމްޕޭން އުކުޅަކަށް!

ކުރިޔަށްދާ އެމްޑީޕީގެ ޗެއަރޕަރސަން އިންތިޚާބަކީ ހުރިހާ ގޮތަކުން ބެލިކަމުގައިވި ނަމަވެސް، ރައީސް ނަޝިދާއި ރައީސް ސާލިހުގެ ވާދަވެރިމަމެއްގެ ގޮތުގައި މެނުވީ މިއަދު މޭރުން ކުރެވޭކަށް ނެތެވެ. އަދި މި ވާދަވެރިކަމުގެ ތެރެއިން އެންމެ ފަހުން ރައީސް ނަޝީދަށް ތާއީދު ކުރާ ފަރާތްތަކުން ސަރުކާރަށް ކުރިމަތި ކުރުވަން ފެށި ޕްރެޝަރެއްގެ ގޮތުގައި ފެންނާ މިއޮތީ ސަރުކާރުގެ މެނިފެސްޓޯއެވެ.

މެނިފެސްޓޯގައި ރައީސް ސާލިހު ވެވަޑައިގެންފައިވާ ވައުދުތައް ފުއްދެމުންދާކަމުގެ ވާހަކަ ސުޕަރ މެޖޯރިޓީގެ ބައެއް މެމްބަރުން ދައްކަވާކަށް ބޭނުމެއް ނުވެއެވެ. ރާއްޖޭގެ އެކި ކަންކޮޅުތަކުގައި ކުރިޔަށްދާ ހައުސިން މަޝްރޫއުތަކާއި، ރަށްރަށުގައި ކުރިޔަށްދާ ފެނާއި ނަރުދަމާގެ މަޝްރޫޢުތަކުގެ ވާހަކަތަކާއި، ފަޅު ފުންކުރުމާއި، ހަދަމުންދާ ބަނދަރުތަކާއި، ކުރިޔަށްދާ ބުރިޖް މަޝްރޫޢާއި، މުވައްޒަރުންގެ މުސާރަތަކަށް ގެނެސްފައިވާ ކުރިއެރުމާއިި، މިފްކޯއިން މަސް ގަންނަ އަގަށް ގެނެސްފައިވާ ހެޔޮ ބަދަލުތަކުގެ ވާހަކަތަކާއި، އަދި މިނޫނަށް ސަރުކާރުގެ މެނިފެސްޓޯގައި ވެފައިވާ ވައުދުތައް ފުއްދުމުގައި ސަރުކާރުން ހޯދާފައިވާ ކުރިއެރުންތަކުގެ ވާހަކަ ދައްކަވަން އެއްވެސް ގޮތަކަށް ބޭނުންފުޅު ނުވާ ގިނަ މެމްބަރުން ހަގީގަތުގައި ތިއްބެވިތަން ފެންނަމުން މިދަނީ ސުޕަރ މެޖޯރިޓީގެ ތެރެއިންނެވެ.

އެހެންނަކަމުން ފެންނާން އޮތް ހަގީގަތަކީ، އަމިއްލަ ޕާޓީގެ މެނިފެސްޓޯއަކީވެސް ކެމްޕޭން އުކުޅަކަށް ހައްދަވާ، އެމްޑީޕީގެ އެތެރޭގައި އޮތް ސިޔާސީ ވާދަވެރިކަމުގެ ތެރޭގައި އެމެނިފެސްޓޯވެސް މަޖިލިސް މެމްބަރުން ގުރުބާން ކުރައްވަމުން ގެންދަވާ ތަނެވެ. ހަގީގަތުގައިވެސް، ރައީސް ސާލިހުގެ މުޅި ދައުރުގައި އެމަނިކްފާނަށް އޮތް އެންމެ ބޮޑު ބޮލުގެ ރިހުމަކަށް ވެގެން މިދަނީ، މަޖިލިސް ސުޕަރ މެޖޯރިޓީ ކަމީ މިއަދު ކަށަވަރުވެ ޔަގީން ވާން އޮތް ކަމެކެވެ.