އެމްޑީޕީގެ ޗެއަރޕާސަންކަމުގެ އިންތިޚާބަށް ވާދަކުރައްވާ އިކޮނޮމިކް މިނިސްޓަރ ފައްޔާޒް އިސްމާޢީލަށް މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑެ) ވަރަށް ބޮޑަށް ފާޑުވިދާޅުވެއްޖެއެވެ.
ބޮންޑެ ތާޢީދުކުރައްވަނީ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީއަށެވެ. ދެ ފަރާތުގެ ބޭފުޅުންވެސް ގެންދަވަނީ އެއްބަޔަކު އަނެއްބަޔަކަށް ވަރަށް ބޮޑަށް ފާޑުވިދާޅުވަމުންނެވެ.
މިގޮތުން ބޮންޑެ ވިދާޅުވީ ޖޫރިމަނާ ގަވާއިދުތައް ވަގުތުން ވީދާލުމަށްޓަކައި ވޯޓު ދޭންޖެހެނީ އިންތިއަށްކަމަށެވެ. އެކި ނަންނަމުގައި ޤަވާއިދުތައް ހަދައިގެން ރައްޔިތުން ފެލަނީކަމަށްވެސް އޭނާ ތުހުމަތުކުރެއްވިއެވެ.
ވަޒީރު ހައްދަވާފައިވާ ގުއިރޯނު ޖޫރިމަނާ ގަވާއިދު ތައް ވަގުތުން ވީދާލުމަށް ޓަކައި ވޯޓު އިމްތިޔާޒަށް !
އެކި ނަން ނަމުގައި "ގުއިރޯނު ޖޫރިމަނާ" އިން ރައްޔިތުމީހާ ފެލައިގެން ބިލިއަނުން ބިލިއަނުން ދައުލަތުގެ ބަޖެޓަށް އާމްދަނީ ހޯދުމަކީ އެމްޑީޕީގެ ސިޔާސަތެއް ނޫނެވެ !#VoteInthi pic.twitter.com/dzLQ86Wk95
— Ibrahim Rasheed (@BondeM4) April 8, 2022
ވާދަވެރިކަން ބޮޑުވެފައިވާ އެމްޑީޕީގެ ޗެއާޕާސަންގެ އިންތިޚާބުގައި އިންތިގެ ޓީމުން އެންމެ ބޮޑަށް ތުހުމަތުކުރާ އެއްކަމަކީ ފައްޔާޟު މަަސައްކަތް ކުރަނީ ރައީސް ނަޝީދު އެއްފަރާތްކޮށް، އެކަހެރިކޮށްގެން އިންތިޚާބު ކާމިޔާބު ކުރުމަށް ކަމުގައެވެ. ނަމަވެސް ތަކުރާރުކޮށް ފައްޔާޟު ވަނީ ރައީސް ނަޝީދު އެމްޑީޕީން ދުރު ކުރެވޭނެ މީހަކު ކައިރި ޒަމާނެއްގައިވެސް ނާންނާނެކަމަށް ވިދާޅުވެފައެވެ.
އަދި މަސައްކަތް ކުރައްވާނީ އެއްބައިވަންތަކަމާއިއެކު ކުރިއަށް އޮތް އިންތިޚާބުތަކުގައި ބޮޑުތަނުން އެމްޑީޕީއަށް ކާމިޔާބު ހޯދަން ކަމަށާއި، އެކަން ކުރެވޭނީ އެމްޑީޕީ ހިންގާލެވިގެންކަމަށް ފައްޔާޟު ވިދާޅުވިއެވެ.
