މަސްވެރިންގެ ކަންބޮޑުވުންތައް ހައްލު ކުރުމަކީ ސަރުކާރުން އެންމެ އިސްކަންދޭންޖެހޭ ކަންތައް ކަމުގައި، ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބް ވިދާޅުވެއްޖެއެވެ.
އިލްޔާސް މިހެން ވިދާޅުވީ ރާއްޖޭގެ މަސްވެރިކަން ތިޔާގިވެ މަސްކިރުވުމުގައި ހުރި ދަތިތަކާއި ގުޅިގެން މަސްވެރިން ފާޅު ކުރަމުންދާ ކަންބޮޑުވުންތަކާއި ގުޅިގެންނެވެ. އިލްޔާސް ލަބީބު ވަނީ މަޖިލިސް ރައީސް މުހައްމަދު ނަޝީދު މިކަމުގައި ލިޔުއްވާފައިވާ ލިޔުއްވުން ރިޓުވީޓު ކުރައްވައި، މަސްވެރިންގެ ކަންބޮޑުވުންތައް ހައްލު ކުރުމަކީ މިސަރުކާރުން އެންމެ އިސްކަމެއް ދީގެން ކުރަންޖެހޭ ކަންތައް ކަމުގައި ވިދާޅުވެފައެވެ.
މަސްވެރިންނަކީ ކޮންމެ ދުވަހަކު ވެހޭވާ ވާރެއެއްގައި، ދޭހާ އަތްވެއްގައި މާކަނޑުގައި ދިވެހިންގެ ފަހުރުވެރި މަސައްކަތް ކުރާ މަސައްކަތްތެރީންނަށްވާއިރު އެމަސައްކަތްރީންގެ ހައްގުތައް ކަށަވަރުކޮށް ދިނުމަކީ ސަރުކާރުން ކުރަންޖެހޭ ކަމެއްކަމަށް އިލްޔާސް ވިދާޅުވިއެވެ.
މަސްވެރިންނަކީ ދޭހާ އަތްވަކު، ވެހޭހާ ވާރެއަކު މާސިންގާ ކަނޑުގެ ބިޔަ ރާޅުތަކުތެރޭ ހިއްވަރާއެކު ދެމިތިބޭ ފަހުރުވެރި ދިވެހީން. ދިވެހި އިޤުތިޞާދުގެ ލޭނާރު. މަސްވެރިންގެ ކަންބޮޑުވުން ތައް ހައްލުކުރުމަކީ ސަރުކާރުން އެންމެ އިސްކަންދޭންޖެހޭނެ ކަންތައް ކަމުގައި ދެކެން.
– އިލްޔާސް ވިދާޅުވިއެވެ.
ދެކުނުގެ މަސްވެރިކަން އާދަޔާ ހިލާފަށް މި ދުވަސްވަރު ރަނގަޅެވެ. އެހެންވެ، މަސް ކިރުވާ ވަރު ވަރަށް ބޮޑުތަނުން ވަނީ އިތުރުވެފައެވެ. މިފްކޯއިން ދެކުނުގައި ގާއިމްކޮށްފައިވާ ސެންޓަރުތަކުގެ ކެޕޭސިޓީއަށް ވުރެ ގިނައިން ވެސް މަސް ކިރުވަނީއެވެ. އެހެންވެ މިފްކޯ އިން ވަނީ މަސްކިރުވާ އަދަދު ލިމިޓްކޮށްފަ އެވެ. މި ބަދަލާ އެކު ކޮންމެ ދޯންޏަކަށް މިހާރު ކިރޭނީ ފަސް ޓަނެވެ.
މަސް ކިރުވުމުގައި ހުރި ދަތިތަކުގެ އިތުރުން އައިސް ލިބުމުގައި ވެސް ދަތިތަކެއް ވަނީ ކުރިމަތިވެފަ އެވެ. އެ ސަރަހައްދުގެ ގިނަ ރަށްތަކެއްގައި އައިސް ޕްލާންޓް ބަހައްޓާފައި ހުރި ނަމަވެސް ހިދުމަތް ލިބެނީ އެންމެ ހަތަރު ޕްލާންޓުން ކަމަށް މަސްވެރިން ބުނެއެވެ.
މަސްވެރިން ބުނި ގޮތުގައި މަސްވެރިކަން ރަނގަޅުވެ ދުވާލަކު 50 ޓަނު ބޭނޭ ދުވަސްވަރެއްގައި މަސް ގަންނަ ވަރު ލިމިޓު ކުރުމަކީ މަސްވެރިންނަށް ދެވޭ އަނިޔާއެއް ކަމަށެވެ. ދޯންޏަކުން ފަސް ޓަނު މަސް ކިރުވައިގެން އެއްވެސް އާމްދަނީ އެއް ނުލިބޭނެ ކަމަށް އެ މީހުން ބުނެއެވެ.
