ތުރުކީގެ އިސްތަމްބޫލްގައި ހުންނަ ސައުދީ އަރަބިއާގެ އެމްބަސީގައި މަރާލާފައިވާ ސައުދީގެ ނޫސްވެރިޔާ ޖަމާލް ކަޝޯގީގެ މަރުގެ ޝަރީޢަތް ސައުދީ އަރަބިއާއަށް ބަދަލުކުރުމަށް ތުރުކީގެ ކޯޓަކުން ހުކުމް ކޮށްފިއެވެ.
ޖަމާލް ކަޝޯގީ ސައުދީ އަރަބިއާގެ އެމްބަސީގައި ވަރަށް އަނިޔާވެރިކޮށް މަރާލި މައްސަލާގައި ޢައިރު ހާޒިރުގައި 26 މީހެއްގެ މައްޗަށް އައީ ތުރުކީގައި ޝަރީއަތް ކުރެވެމުންނެވެ. އެހެންނަމަވެސް، މި ޝަރީއަތް ސައުދީ އަރަބިއާއަށް ބަދަލު ކުރުމަށް ތުރުކީގެ ކޯޓަކުން ހުކުމް ކުރުމާއި ގުޅިގެން، މި ޝަރީއަތް ދެން އިތުރަށް ކުރިޔަށް ނުދާނެކަމުގައި މިހާރުވަނީ ބެލެވިފައެވެ.
2018ވަނަ އަހަރު އިސްތަމްބޫލުގައި ހުންނަ ސައުދީ އެމްބަސީ ތެރޭގައި ޚަޝޯގީ އަނިޔާވެރި ގޮތަކަށް މަރާލުމާއި ގުޅިގެން، ސައުދީ ސަރުކާރާއި އަދި އެގައުމުގެ ވަލީ އަހުދު މުހައްމަދު ބިން ސަލްމާން (އެމްބީއެސް)އަށް ދުނިޔޭގެ ގައުމުތަކުންނާއި އިންސާނީ ހައްގުތަކަށް މަސައްކަތް ކުރާ ޖަމިއްޔާތަކުން ވަނީ ވަރަށް ބޮޑަށް ފާޑު ކިޔާފައެވެ.
މި ޖަރީމާއަށްފަހު ތުރުކީގެ އޮފިޝަލުން ބުނެފައިވަނީ، މި އޮޕަރޭޝަން ހިންގާފައިވަނީ ސައުދީ އަރަބިއާގެ ސަރުކާރުގެ އެންމެ މަތީ ފަންތިން ހުއްދަ ލިބެގެން ކަމަށެވެ. އަދި އެމެރިކާގެ އިންޓެލިޖެންސްއިން ބުނެފައިވަނީ، ޚަޝޯގީ މަރާލާފައިވަނީ ސައުދީ ވަލީއަހުދު މުހައްމަދު ބިން ސަލްމާންގެ ހުއްދަ ދެއްވައިގެން ކަމުގައެވެ.
ޚަޝޯގީގެ މަރުގެ ޝަރީއަތް ސައުދީ އަރަބިއާއަށް ބަދަލު ކުރުމަށް ތުރުކީން ނިންމާފައި މިވަނީ ތުރުކީގެ ރައީސް ތައްޔިބު އެރެދޮގާން ސައުދީ އަރަބިއާއި ގުޅުން ރަގަޅު ކުރުމުގެ މަސައްކަތް ފައްޓަވާފަ ވަނިކޮށެވެ.
ފާއިތުވެދިޔަ ހަފްތާގައި ތުރުކީގެ ފޮރިންގ މިނިސްޓަރ މެވުލެޓް ކަވުސޮގްލި ވިދާޅުވެފައިވަނީ ސައުދީ އަރަބިއާއާއި ގުޅުން ރަގަޅު ކުރުމަށްތަކާ ކުރިޔަށް އޮތްތަނުގައި މުހިންމު ފިޔަވަޅުތަކެއް އެޅިގެން ދާނެކަމުގައެވެ.
