ހުޅުމާލޭ ދެވަނަ ފިޔަވަހީގައި މީހުން އާބާދުވަމުން އަންނަ ހިޔާ ފްލެޓްތަކުން ކުލި ނެގުން އިތުރު ތިން މަހަށް ފަސްކޮށްދޭން އެދި ރައްޔިތުންގެ މަޖިލީހަށް މައްސަލައެއް ހުށަހަޅައިފިއެވެ.
ރައްޔިތުންގެ މަޖިލީހުގެ މެންބަރު ހިޔާ ފްލެޓްތަކުގެ ކުލި ރަމަޟާން މަހު ނެގުން ފަސްކޮށްދިނުމަށް ސަރުކާރަށް ގޮވާލާ މައްސަލަ ހުށަހެޅުއްވީ މަޑުއްވަރީ ދާއިރާގެ މެމްބަރު އާދަމް ޝަރީފްއެވެ.
އާދަމް ޝަރީފްގެ މައްސަލާގައި ބުނެފައިވަނީ ރައީސް ޔާމީން ޢަބްދުލްޤައްޔޫމްގެ ވެރިކަމުގައި ފެށްޓެވި ބޯހިޔާވަހިކަމުގެ ބިޔަ މަޝްރޫޢުގެ ދަށުން ޢިމާރާތް ކުރެވިފައިވާ ހިޔާ ފްލެޓްތައް މި ސަރުކާރުން މީހުންނާ ޙަވާލުކުރިއިރު އެންގިގޮތަށް 3 މަސް ދުވަހުގެތެރޭގައި އެތަންތަނުގައި ދިރިއުޅެން ފެށޭތޯ މަސައްކަތް ކުރަމުންދާއިރު، ސަރުކާރުން ފްލެޓްތައް ޙަވާލުކުރިއިރު ފިނިޝިންގ ނުނިންމާ ހުރުމުގެ ސަބަބުން އެ ތަންތަން ލިބުނު ގިނަ ފަރާތްތަކުން ވަނީ ދަރަންޏަށް ތަކެއްޗާއި ފައިސާ ނަގައި، އެ ދަރަނިތައް ބޮލުގައި އަޅަންޖެހިފައިކަމަށްވާތީއާއި، އެ ފަރާތްތަކަށް މާލީ އެހީތެރިކަން ލިބޭނެ ނިޒާމެއް ޤާއިމުކުރެވިފައިނުވާއިރު، އެހެން ލޯނެއް ލިބޭނެ އިންތިޒާމެއް އެފަރާތްތަކަށް ހަމަޖައްސައިދެވިފައި ނެތްކަމަށެވެ.
ކޯވިޑް19 ގެ ބަލިމަޑުކަމާއި ތަދުމަޑުކަމަށްފަހު، މާލީގޮތުން ރައްޔިތުންނަށް އަރައިނުގަނެވެނީސް ބަރަކާތްތެރި ރަމަޟާންމަސް ފެށުމާއެކު ހިޔާ ފްލެޓްތަކުގެ ކުލި ދައްކަން ޖެހުމުން ވަރަށް ގިނަ ބަޔަކަށް މާލީގޮތުން ގިނަގުނަ ދަތިތައް ކުރިމަތިވެފައިވާތީއާއި، އަދި ކުލި ނުދައްކައިފިނަމަ ޖޫރިމަނާ ކުރަން އެޗްޑީސީން ނިންމުމަކީ އިތުރު ތަކުލީފުތަކެއް ކުއް ހިޔާ ފްލެޓްތަކުގައި ދިރިއުޅޭ ފަރާތްތަކުން އުފުލަންޖެހޭ ކަމަކަށްވާތީވެ، ހިޔާ ފްލެޓްތަކުގެ ކުލި ނެގުން އިތުރު 3 މަހަށް ފަސްކޮށްދިނުމަށް ވަނީ މިމައްސަލާގައި ގޮވާލާފައެވެ.
ހިޔާ ހައުސިން ޔުނިޓްގެ ކުލީގެ ގޮތުގައި ސަރުކާރުން ކަނޑައަޅާފައިވަނީ 7500 ރުފިޔާއެވެ. އަދި މެއިންޓަނަންސް ފީގެ ގޮތުގައި އިތުރު 1000 ރުފިޔާއާއެކު، ފްލެޓްތަކުގެ ވެރިން މަހަކު 8500 ރުފިޔާ އެޗްޑީސީއަށް ދައްކަން ޖެހޭނެއެވެ.
