މާލެ ސިޓީ ކައުންސިލްގެ އަމިއްލަ ބޭންކް އެކައުންޓެއް ހުޅުވުމަށް ނިންމައިފިއެވެ.
މި ނިމުންމުން ނިންމާފައިވަނީ މާލެ ސިޓީ ކައުންސިލް 4 ވަނަ ދައުރުގެ 47ވަނަ ރަސްމީ ޖަލްސާގައި ބައިވެރިވެވަޑައިގެންނެވި ހުރިހާ ކައުންސިލަރުންގެ އިއްތިފާގުންނެވެ.
މާލެ ސިޓީ ކައުންސިލަށް ބޭންކް އެކައުންޓެއް ހެދުމަށް ހުއްދަ ދީފައިވަނީ ބޭންކް އޮފް މޯލްޑިވްސްއިންނެވެ. މާލެ ސިޓީ ކައުންސިލުން ވަނީ މީގެ ކުރިންވެސް އަމިއްލަ ބޭންކް އެކައުންޓެއް ހެދުމަށް ފާސްކޮށްފައެވެ. އެހެންނަމަވެސް ސަރުކާރުގެ ވުޒާރާތަކުން މީގެ ކުރިން ވަނީ މިކަން ހުއްޓުވާފައެވެ.
މާލެ ސިޓީ ކައުންސިލްގެ އަމިއްލަ ބޭންކް އެކައުންޓެއް ހުޅުވުމުގެ އިތުރުން ސިޓީ ކައުންސިލްގެ މާލީ ހިސާބުތަށް ބެލެހެއްޓުމަށް ބޭނުންކުރާ އެސްއޭޕީ ސިސްޓަމް ވިއަ މޮޑިއުލަށް ބަދަލުކުރުމަށް ވެސް ވަނީ ނިންމާފައެވެ.
ވިއަ މޮޑިއުލަކީ މާލެ ސިޓީ ކައުންސިލް ފިޔަވާ ރާއްޖޭގެ އެހެން ހުރިހާ ކައުންސިލް ތަކަކުން މާލީ ހިސާބުތަށް ބެލެހެއްޓުމަށް ބޭނުންކުރާ މޮޑިއުލެވެ.
