ކޯވިޑް19ގެ ކާރިސާއިން އަރައިގަތުމަށް ސަރުކާރުގެ ވެރިން ކުރައްވާފައިވަނީ ތައުރީފު ހައްގު މަސައްކަތްތަކެއް ކަމަށާއި، ކުރެޑިޓް ނަގަންޖެހޭ ސަބަބެއް ނެތްކަމުގައި ޓްރޭޑް ޔޫނިއަންގެ ނައިބް ރައީސް އަދި ކުރީގެ ގްރޭޓަރ މާލޭ އިންޑަސްޓްރިއަލް ޒޯން ލިމިޓެޑް ކުންފުނީގެ ބޯޑުގެ ޗެއަރމަން ސައުދުﷲ އަހުމަދު ވިދާޅުވެއްޖެއެވެ.
ސައުދު ކުރެއްވި ޓުވީޓެއްގައި ވިދާޅުވެފައިވަނީ، ކޯވިޑުން އަރައިގަތުމަށް ކުރީގެ ރައީސް މުހައްމަދު ނަޝީދާއި، ރައީސް އިބުރާހިމް މުހައްމަދު ސާލިހުގެ އިތުރުން ފިނޭންސް މިނިސްޓަރު އިބުރާހިމް އަމީރާއި، އިކޮނޮމިކް މިނިސްޓަރު ފައްޔާޒު އިސްމާއިލާއި އަދި ކުރީގެ ހެލްތު މިނިސްޓަރ އަބުދުﷲ އަމީން ކުރައްވާފައިވަނީ ތައުރީފް ހައްގު މަސައްކަތްތަކެއް ކަމުގައެވެ.
Covid19 bali madu kamun ariagathumah Raees.@MohamedNasheed aa Raees @ibusolih adhi maalee vazzeru @iameeru ithurah minister @faya_i aa e iruge health minister @ameenex kurevee haqqu thaureef masahkatheh.mee credit adhi ehen ehcheh nagan jehey kameh ves noon.kuran jehey kameh.
— Saudulla Ahmed (@saudullaahmed1) April 5, 2022
ސައުދު ވިދާޅުވި ގޮތުގައި، މި މަސައްކަތްތަކަކީ ކުރެޑިޓް ނަގަންޖެހޭ ކަމެއް އޮތްކަމެއް ނޫންކަމަށާއި، އަދި ކުރެޑިޓް ނަގަންޖެހޭ ސަބަބެއްވެސް ނެތް ކަމުގައެވެ.
ކޯވިޑުން އަރައިގަތުމަށް ސަރުކާރުން ކުރެއްވީ ކުރެޑިޓް ނަގަންޖެހޭ ސަބަބެއް އޮތްކަމެއް ނޫންކަމަށް ސައުދު ވިދާޅުވެފައިވާއިރު، ރައްޔިތުންގެ މަޖިލިހުގެ ރައީސް މުހައްމަދު ނަޝީދު އިއްޔެ ރައްޔުތުންގެ މަޖިލިހުގައި ވާހަކަ ދައްކަވަމުން ވިދާޅުވެފައިވަނީ، ކޯވިޑާއި ގުޅިގެން ރާއްޖޭގެ ބޯޑަރު ބަންދުކޮށް، އަޅާފައިވާ ފިޔަވަޅުތަކަށް ލުއި ދިނުމަށް މަޖިލީހުގައި ކުރެވުނު މަސައްކަތުގައި ސަރުކާރުން އެކަމަށް ދެކޮޅު ހެދި މިންވަރު ހާމަކޮށް ދެއްވާނެކަމަށެވެ. މަޖިލިސް ރައީސް މިހެން ވިދާޅުވީ މަޖިލީހަށް ހުށަހެޅުނު ފޮރިން ސާވިސް ބިލުގެ ބަހުސްގައި، ދާންދޫ ދާއިރާގެ މެމްބަރު ޔައުގޫބް ދެއްކެވި ވާހަކަތަކަށް ރައްދު ދެއްވަމުންނެވެ. ޔަގޫބް ވިދާޅުވީ ކޯވިޑުން ރާއްޖެ އަރައިގަނެވި، ބޯޑަރު ހުޅުވިގެން ދިޔައީ ރައީސް ޞާލިހާއި، ސަރުކާރުން އެޅި ހަރުދަނާ ފިޔަވަޅުތަކުގެ ސަބަބުންކަމަށެވެ. ވަކިން ޚާއްސަކޮށް، ރާއްޖޭގެ ކެބިނެޓާއި، ރައީސް ޞާލިހުގެ ހަރުދަނާ ސިޔާސަތުގެ ސަބަބުން ކަމަށެވެ.
އެހެންނަމަވެސް ނަޝީދަށް ތާއީދުކުރާ ފަރާތްތަކުން ގެންދަނީ، ކޯވިޑުން އަރައި ގަނެވިފައިވަނީ، ރާއްޖޭގެ ބޯޑަރު ބަންދު ކޮށްފައި ބޭއްވުމާއި ދެކޮޅަށް ނަޝީދު ކުރެއްވި މަސައްކަތްތަކުގެ ނަތީޖާއެއްގެ ގޮތުންކަމަށް ވިދާޅުވެ ސޯޝަލް މީޑިއާގައި ޝުޢޫރު ފާޅުކުރަމުންނެވެ.
