ޓެރަރިޒަމްގެ ތުހުމަތުގައި މިދިޔަ ހަފްތާގައި އައްޑޫން ހައްޔަރުކުރި އެންމެން ދޫކޮށްލައިފިއެވެ.
ޓެރަރިޒަމްގެ ތުހުމަތުގައި އައްޑޫން 9 މީހުން ހައްޔަރުކުރީ މިދިޔަ މަހުގެ 27 ވަނަ ދުވަހު ފުލުހުން ހިންގި ހާއްސަ އޮޕަރޭޝަނެއްގައި އެ ދުވަހުއެވެ. އޭގެ ތެރެއިން ކޯޓަށް ނުގެންގޮސް ތިން މީހަކު ފުލުހުން ދޫކޮށްލިއެވެ. ބާކީ ތިބި ހަ މީހުންގެ ބަންދަށް ހިތަދޫ މެޖިސްޓްރޭޓް ކޯޓުން ހަތް ދުވަސް އިތުރުކުރިއެވެ.
ފުލުހުން އެ މީހުން ހައްޔަރުކުރިއިރު ރައީސް އިބްރާހީމް މުހައްމަދު ސޯލިހާއި އިންޑިއާގެ އެކްސްޓާނަލް އެފެއާޒް މިނިސްޓަރާއި ބައެއް ވަޒީރުންނާއި ސަލާމަތީ ބާރުތަކުގެ އެންމެ އިސްވެރިން ތިއްބެވީ އައްޑޫ ސިޓީގައެވެ.
ފުލުހުންގެ މީޑިއާ އޮފިޝަލަކު ވިދާޅުވީ އެ ހަ މީހުން ދޫކޮށްލީ ބަންދުގެ މުއްދަތު ހަމަވުމުން ކަމަށެވެ. އެ މުއްދަތު އިއްޔެ އަށް ހަމަވިއިރު ބަންދުގައި ތިބި އެންމެން ދޫކޮށްލީ އިތުރަށް ބަންދުގައި ބައިތިއްބަން ނުފެންނާތީ ކޯޓަށް ހާޒިރުނުކޮށެވެ.
