މިއަހަރުގެ ރަމަޟާން މަހު ރައްޔިތުންގެ މަޖިލީހުގައި ބާއްވާ ފުރަތަމަ ޖަލްސާއަށް ޓުވަރިޒަމް މިނިސްޓަރ ޑރ.މައުސޫމް ހާޒިރުކުރުމަށް އެޖެންޑާކޮށްފިއެވެ.
މާދަމާ ބާއްވާ މަޖިލީހުގެ ޖަލްސާއަކީ މިއަހަރުގެ ރަމަޟާމް މަހުގެ މަޖިލީހުގައި ބާއްވާ ފުރަތަމަ ޖަލްސާއެވެ. މިޖަލްސާގެ އެޖެންޑާގައިވާގޮތުން ތަޅުމުގައި ކުރަން އޮތީ މަދު މަސައްކަތްތަކެކެވެ. ފުރަތަމަ މަސައްކަތެއްގެ ގޮތުން އޮތީ ވަޒީރާއި ސުވާލު ކުރުމެވެ.
ޓުވަރިޒަމް މިނިސްޓަރާއި ސުވާލު ކުރެއްވުމަށް ހުށަހަޅާފައިވަނީ ތިމަރަފުށީ ދާއިރާގެ މެމްބަރު ރިޔާޒެވެ. މައުސޫމާއި ކުރެއްވުމަށް ހަމަޖެހިފައިވާ ސުވާލަކީ ތ.އަތޮޅުގައި ރިޒޯޓުގެ ގޮތުގައި ތަރައްޤީކުރުމަށް ދޫކޮށްފައިވާ ގިނަ ރަށްތަކުގައި ރިޒޯޓު ތަރައްޤީ ކުރެވިފައިނުވާތީ، އަދި ބައެއް ރަށްރަށުގައި އެއްވެސް މަސައްކަތެއް ކުރަމުން ނުދާތީވެ، މިކަމާމެދު ސަރުކާރުން އަޅުއްވަން ނިންމަވާފައިވާ ފިޔަވަޅުތަކަކީ ކޮބައިތޯ؟ ސާފު ކުރެއްވުމަށެވެ.
މިދިޔަ މަހުގެ 23 ވަނަ ދުވަހުވެސް ރިޔާޒުވަނީ މިނިސްޓަރ މައުސޫމްގެ ފަރާތްޕުޅުން ލިޔުމުން ޖަވާބު ހޯދުމަށް މިފަދަ ސުވާލެއް ކުރައްވާފައެވެ. އެދުވަހު ރިޔާޒު ސުވާލު ކުރެއްވީ ކަނިމީދޫ އާއި ގުޅޭ ގޮތުން ސާފުޖަވާބެއް ހޯދުމަށެވެ. ނަމަވެސް ވަރަށް ކުރުކޮށް ޖަވާބު ދެއްވަމުން ވަޒީރު ފޮނުވި ސިޓީގައި ބުނެފައިވަނީ ރިސޯޓެއް ތަރައްގީ ކުރުމަށް ތ.އަތޮޅުގައި އޮންނަ ފަޅު ރަށެއް ކަމަށްވާ ކަނިމީދޫ ބީލަމަށް ހުށަހެޅި ނަމަވެސް އެއްވެސް ޕްރޮޕޯސަލްއެއް ލިބިފައި ނުވާކަމަށެވެ.
މިޖަވާބާއި ގުޅިގެން ރިޔާޒު ވަނީ މިކަން ތަފްސީލުކޮށް ސާފު ކުރުމަށް މައުސޫމް މަޖިލީހަށް ހާޒިރު ކުރާނެކަމަށް ވިދާޅުވެފައެވެ. ތ.އަތޮޅުގެ އިތުރުން ރާއްޖޭގެ އެކި އަތޮޅުތަކުގައި ރިސޯޓް ތަރައްޤީ ކުރުމަށް ކަނޑައަޅައި ސަރުކާރަށް ނަގާފައުވާ ރަށްތަކުގައި މަސައްކަތް ނުފެށި ލަސްވާ މައްސަލައަކީ ގިނަ ބައެއްގެ ކަންބޮޑުވުން އޮތް މައްސަލައެކެވެ.
