ޓުއަރިޒަމް މިނިސްޓްރީގެ ސްޓޭޓް މިނިސްޓަރ އަހްމަދު ސާލިހު މައްޗަށް އުފުލި ރަސްމީ ހައްސިއްޔަތު ނަހަމުގޮތުގައި ބޭނުންކުރުމުގެ ކުށުގެ ދައުވާ ސާބިތުނުވާކަމަށް ކްރިމިނަލް ކޯޓުން ހުކުމްކޮށްފިއެވެ.
ޓުއަރިޒަމް މިނިސްޓްރީގެ ސްޓޭޓް މިނިސްޓަރ އަހްމަދު ސާލިހުގެ މައްޗަށް ރަސްމީ ހައްސިއްޔަތު ނަހަމުގޮތުގައި ބޭނުންކުރުމުގެ ކުށުގެ ދައުވާ އުފުލީ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ޚިޔާނާތާއި ގުޅިގެން އެސެޓް ރިކަވަރީ ކޮމިޝަނުން ކުރިޔަށް ގެންދިޔަ ތަހުޤީގަކާއި ގުޅިގެންނެވެ.
ސާލިހުގެ މައްޗަށް އުފުލި ދައުވާގައި ބުނެފައިވަނީ ކ. އަތޮޅުގެ ދެ ފަޅަކާއި ވ. ފިތްތެޔޮފުށިން ދައުލަތަށް ލިބެންޖެހޭ ކުލި ލިބިފައި ނުވާތީ އެެތަންތަނުގެ ހެޑް ލީސް ބަދަލު ނުކުރުމަށް އަންގާފައިވަނިކޮށް އެތަންތަނާއި ގުޅޭ އެއްވެސް ތަހުޤީގެއް ނުހިންގާކަމަށް ބުނެ ބައެއް ފަރާތްތަކަށް ސާލިހް ސިޓީ ފޮނުވާފައިވާކަމަށެވެ. އެހެންކަމުން އޭނާގެ މި އަމަލަކީ ބަޔަކަށް ނަހަމު ގޮތުގައި މަންފާއެއް ހޯދާދިނުމަށް ރަސްމީ ހައްސިއްޔަތު ނަހަމުގޮތުގައި ބޭނުންކުރުންކަމަށްވެސް ދައުލަތުގެ ދައުވާގައިވެއެވެ.
މިމައްސަަލައިގައި ކްރިމިނަލް ކޯޓުން މިއަދު އިއްވި ހުކުމްގައި ވިދާޅުވީ ދައުލަތުން ހުށަހެޅި ހެކިތަކުން ގާނޫނުއަސާސީގައި ބުނާ އެކަށީގެންވާ ޝައްކެއް ނެތް މިންގަނޑުން ކުށް ސާބިތުވާ ވަރުގެ ހެކި ލިބިފައި ނެތް ކަމަށެވެ.
މިމައްސަލައިގައި ދައުލަތުން ހުށަހެޅި ހެކިންވެސް ވަނީ ސޯލިހު ފޮނުއްވި ސިޓީތަކުގައިވެސް، ރަށްތަކުގެ ލީސް ބަދަލުކުރުމާ ގުޅޭ ވާހަކައެއް ނެތްކަމަށް ކޯޓުގައި ބުނެފައެވެ. އަދި ރިޔާސީ ކޮމިޝަންގެ ނިންމުމާ ގުޅިގެން ރަށްތަކުގެ ލީސް ބަދަލު ކުރުން މަޑުޖައްސާލަން އޭރުގެ ޓޫރިޒަމް މިނިސްޓަރު އަލީ ވަހީދު ފުރަތަމަ އެންގެވިޔަސް، ފަހުން އެ ނިންމުން ބާތިލްކުރި ކަމަށް ހެކިން ބުނެފައިވާކަން ހުކުމްގައި ފާހަގަކޮށްފައިއެވެ.
ސްޓޭޓް މިނިސްޓަރ ސާލިހުގެ މައްޗަށް ކުށް ސާބިތުނުވާކަމަށް ހުކުމްކޮށްފައިވާއިރު، ޓްއަރިޒަމް މިނިސްޓްރީގައި ގިނަ ދުވަސްތަކެއް ވަންދެން ހިދުމަތް ކުރައްވާފައިވާ ސާލިހު މި މައްސަލައާ ގުޅިގެން ހުރީ ސަސްޕެންޑްކޮށްފައެވެ.
