ކްރިކެޓް ބޯޑް އޮފް މޯލްޑިވްސް އިން އިންތިޒާމްކޮށްގެން ބޭއްވި ޓީ 10 ކްރިކެޓް މުބާރާތުގެ ޗެމްޕިއަންކަން މިލާން ކްރިކެޓް އެކަޑަމީން ހޯދައިފިއެވެ.
މި މުބާރާތާކީ ކްރިކެޓް ބޯޑް އޮފް މޯލްޑިވްސް އިން އަލަށް ބޭއްވި މުބާރާތެކެއެވެ.
މި މުބާރާތުގެ ފައިނަލްގައި ވާދަކޮށްފައިވަނީ ސީބީއެލް ސްޕޯޓްސް އާއި މިލާން އެކަޑަމީއެވެ. އިއްޔެ ކުޅުނު މުބާރާތުގެ ފައިނަލްގައި ސީބީއެލްގެ މައްޗަށް ކުރި ހޯދާ މިލާން އެކަޑަމީން މުބާރާތުގެ ޗެމްޕިއަންކަން ހޯދީ 51 ލަނޑުންނެވެ.
ފައިނަލް މެޗުގެ ޓޮސް ދިމާވުމުން މިލާން އެކަޑަމީން ނިންމީ ފުރަތަމަ ކުޅެން އަރާށެއެވެ. އެގޮތުން 10 އޯވަރުގެ ތެރޭގައި 3 ކުޅުންތެރިން ނުބައިވެގެން މިލާން އެކަޑަމީން ވަނީ 117 ލަނޑު ހަދާފައެވެ.
ޖަވާބުގައި ސީބީއެލް އިން ކުޅެން އަރައި، 10 އޯވަރުގެ ތެރޭގައި ފަސް ކުޅުންތެރިން ނުބައިވެގެން ހެދުނީ 66 ލަނޑެވެ.
މުބާރާތުގެ ފައިނަލް މެޗަށް ފަހު ކުޅުންތެރިންނަށާއި ޓީމުތަކަށް އިނާމު ހަވާލުކޮށްދެއްވީ ކްރިކެޓް ބޯޑު އޮފް މޯލްޑިވްސްގެ ރައީސް މުހައްމަދު ފައިސަލް އަދި މޯލްޑިވްސް އޮލިމްޕިކް ކޮމިޓީގެ ރައީސް މުހައްމަދު އަބްދުލް ސައްތާރެވެ.
