ޤާނޫނު އަސާސީން ލިބިދީފައިވާ އެއްވެ އުޅުމާއި ޚިޔާލުފާޅު ކުރުމުގެ ހައްޤުގެ ބޭނުންކޮށް، ސުލްހަވެރި އިހުތިޖާޖެއް ކުރަމުން ދަނިކޮށް ފުލުހުން ހައްޔަރުކުރި މަޖިލީހުގެ ދެ މެމްބަރު ބަންދުގައި ތިބޭތާ 24 ގަޑިއިރު ވެގެންދިޔަ އިރުވެސް، މަޖިލީހުން އަޅާ ނުލުމުން ކަންބޮޑުވުން ފާޅުކޮށްފިއެވެ.

އިދިކޮޅު ކޯލިޝަނުން ރާއްޖޭގައި ތިބި އިންޑިއާގެ ސިފައިން ބޭލުމަށް ގޮވާލާ އިއްޔެ ބާއްވަން މަސައްކަތްކުރި "ނޭވާހޮޅިއަށް" ހަރަކާތުގައި ގުރައިދޫ ދާއިރާގެ މެމްބަރު މުހައްމަދު ޣައްސާން މައުމޫނާއި، މާވަށު ދާއިރާގެ މެމްބަރު މުހައްމަދު ސައީދު ހައްޔަރުކޮށް ވަނީ ދޫނިދޫއަށް ގެންގޮސްފައެވެ.

މިދެމެމްބަރުން ދޫނިދޫގައި ބޭތިއްބުމަށްފަހު މިހާރުވަނީ، ބަންދުގެ މުއްދަތު ޖެހުމަށް ޤާޟީއެއްގެ ކުރިމައަށްޗަށް ގެނެސްފައެވެ. މިކަމުގެ ކަންބޮޑުވުން ފާޅު ކުރައްވައި، ޕީޕީއެމްގެ ނައިބް ރައީސް އަހުމަދު ޝިޔާމް ވިދާޅުވީ، މަޖިލީހުގެ ދެމެމްބަރުން ކަމުގައިވާ ސައީދާއި، ޣައްސާން ޤާނޫނު އަސާސީން ލިބިދޭ ހައްގުގެ ބޭނުންކޮށް، ޚިޔާލާ ފާޅު ކުރަން ކުރި މަަސއްކަތަށް ހުރަސްއަޅައި އަނިޔާވެރި ގޮތަކަށް ޖަލު ބަންދު ކުރުމަކީ އެއްގޮތަކަށްވެސް ކުރެވިގެން ވާނެކަމެއް ނޫންކަމަށެވެ.

ޤާނޫނު އަސާސީގައި މިގޮތަށް ބަންދުކުރެވޭ މީހުން 24 ގަޑިއިރުގެ ތެރޭ ޤާޟީއެއްގެ ކުރިމައްޗަށް ހާޒިރު ކުރަން ޖެހޭނެކަމަށް ބުނި ނަމަވެސް އެކަންވެސް ކޮށްފައި ނުވާކަމަށެވެ. މިއަދު މެންދުރު 1 ޖަހާއިރު ހާޒިރު ކުރާނެކަމަސް ބުނި ނަމަވެސް އަދިވެސް މިއަޑުއެހުން ފެށިވާކަމީ ނުހަނު ކަންބޮޑުވާ ކަމެއްކަމަށް ޝިޔާމް ވިދާޅުވިއެވެ.

މެމްބަރު ޣައްސާނާއި، ސައީދު ހައްޔަރުކޮށްފި

މަޖިލީހުގެ ރައީސަކަށް އިންނެވި ބޭފުޅަކީ އެއްވެ އުޅުމާއި ޚިޔާލު ފާޅުކުރުމަށް ނުހަނު ތަރުހީބުދޭ ބޭފުޅަކަށްވާއިރު، ޤާނޫނުގައި ބުނާ މިހައްގުގެ ބޭނުން ކުރުމުން މިހާތަނަށްވެސް މަޖިލީހުން މިކަމުގައި އެއްވެސް އިޖާބައެއް ނުދިނުމަކީނުހަނު ކަންބޮޑުވާ ކަމެއްކަމަށް ޝިޔާމް ވިދާޅުވިއެވެ.

ފުލުުހުން ޣައްސާނާއި، ސައީދު ހައްޔަރުކުރީ ބޮޑު ތަކުރުފާނު މަގުގައި މުޒާހަރާގެ ބައިވެރިންނާއިއެކު އަޑު އުފުލަމުން ދަނިކޮށެވެ.