މިސަރުކާރުން ވެފައިވާ ވައުދު ނުފުއްދައި މަސްވެރިންނާއި، މަސައްކަތްތެރީންގެ ތާއީދުދެން ނުލިބޭނެ ކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުޙައްމަދު ވަޙީދު ވިދާޅުވެއްޖެއެވެ.

ވަހީދު މިހެން ވިދާޅުވީ، މިސަރުކާރުން ވައުދުވެފައިވާ މަހަށް ހަމަ އަގުު ހޯދުމަށް ވެފައިވާ ވައުދު ތަންފީޒުނުވެ، މަސްވެރިންނަށް އިހުމާލުވާތީ ރައްޔިތުންގެ މަޖިލީހުގެ އެމްޑީޕީ މެމްބަރު ހުސެއިން ފިރުޝާން މަޖިލީހަށް ހުށަހެޅި މައްސަލަގެ ބަހުސްގައެވެ. މިބަހުސްގައި ވައްޑެ ވިދާޅުވީ ވައުދު ނުފުއްދި ރައްޔިތުންގެ ކަންބޮޑުވުންތަކުގައި މަޖިލީހުގައި ވަކާލާތު ކުރާނެކަމަށެވެ.

ކުރިއަށް އޮތީ ރިޔާސީ އިންތިޚާބަށްބާއިރު، ރިޔާސީ އިންތިޚާބަށް ތައްޔާރުވާތަން ނުފެންނަ ކަމަށް ވައްޑެ ވިދާޅުވިއެވެ. ފެނިގެންދަނީ މަސްވެރިންނަސް ސަރުކާރުން ވެފައިވާ ވައުދުތައް ނުފުއްދަން އުޅޭތަން ކަމަށެވެ. އަންނަ އަހަރުގެ ރިޔާސީ އިންތިޚާބު އެމްޑީޕީން ކާމިޔާބު ކުރަން ބޭނުންނަމަ ވައުދުތައް ފުއްދަން ޖެހޭކަމަށް ވައްޑެ ވިދާޅުވިއެވެ.

އަޅުގަނޑުމެންގެ އަނެއްކާ އަނެއް އިންތިޚާބު، ރިޔާސީ އިންތިޚާބު މިދަނީ ބޯމަތިވާން. އަޅުގަނޑުމެން ހުށަހެޅި ވައުތައް ފުއްދައިގެން އަޅުގަނޑުމެންނަށް ދެން މަސްވެރިންގެ ތާއީދު ހޯދެނީ. އަޅުގަނޑުމެން ވީ ވައުދު ފުއްދައިގެން ދެން މަސައްކަތްތެރިންގެ ތާއީދު އަޅުގަނޑުމެންނަށް ހޯދޭނީ. އަޅުގަނޑުމެން ވީ ވައުދުތައް ފުއްދައިގެން އެމްޑީޕީއަށް ކާމިޔާބެއް ލިބޭނީ.

– ވައްޑެ ވިދާޅުވިއެވެ.

ވައްޑެ ވިދާޅުވީ މެނިފެސްޓޯގައި ހުރި ކަންކަމަކީ ފޮރުވާލެވޭނެ ކަންކަމެއް ނޫންކަމަށެވެ. އެއީ ރައީސް އޮފީހުންނާއި، އެމްޑީޕީ ވެބްސައިޓުންވެސް ފެންނަން ހުންނާނެ ކަންތައްތަކެއް ކަމަށެވެ. 4 އަހަރު ވެގެންދާއިރު މަސްވެރިންނަށް ވެފައިވަ ވައުދުގެ ތެރެއިްނ ގޭދޮށު މަސް ފެކްޓްރީ އަޅަން ކައުންސިލަށް ވިޔަފާރި ކުންފުންޏެއް ހެދުމުގެ ހުއްދަ ނުދީ ހިފަައްޓާލައިގެން ތިބުމަކީވެސް ދެރަވަރު ކަންތައް ކަމަށް ވައްޑެ ވިދާޅުވިއެވެ.

ކަމެއް ނުވާ ވާހަކަ މިދައްކަނީ، އަޅުގަނޑުމެންގެ ހުށަހެޅުމެއް އަޅުގަނޑުންގެ ސިޔާސަތެއް މެނިފެސްޓޯގައި، މިހާރުވެސް ރައީސް އޮފީސް ވެބްސައިޓްގައި މިހާރުވެސް އޮތް ވަރަށް ބޮޑު ސިޔާސަތެއް އެއީ ކައުންސިލްތަކަށް ވިޔަފާރި ކުރުމުގެ ޖާގަދީފެން، އުފައްދާ ޖާގައިން ގޭދޮށު ޕްލާންޓް ހެދުމުގެ ވަހަކަ. 4 އަހަރުވާން މިދަނީ އަދި އެންމެ ކައުންސިލަކަށް ވިޔަފާރި ކުންފުންޏެއް ހެދުމުގެ ހުއްދަ ނުދީ ހިފަައްޓާލައިގެން އެތިބެނީ. އެއީ ކޮވިޑާއި ހެދިތޯ؟

– ވައްޑެ ވިދާޅުވިއެވެ.

ފިރުޝާން ހުށަހެޅި މައްސަލާގައި ބުނެފައިވަނީ އެމްޑީޕީގެ އެޖެންޑާ 19 މެނިފެސްޓޯ އާއި މިއަދުގެ ސަރުކާރު ވެރިކަމަށް އައުމަށް އެކުލަވާލި ރިޔާސީ މެނިފެސްޓޯގައި އެންމެ ބޮޑު އެއް ވައުދެއް ގޮތުގައި ހިމެނޭ މަސްވެރިންނަށް ހަމައަގު ދިނުމަށް ވައުދު ފުއްދުމަށް ސަރުކާރުން އެއްވެސް ކަމެއް ނުކުރާ ކަމުގެ ޝަކުވާ އަކީ މަސްވެރިންގެ ބޮޑު ޝަކުވާ އެއްކަމަށެވެ.

މަސް ޕްރޮސެސް ކުރާ ތަންތަނާއި ގޭދޮށު މަސްފެކްޓްރީތަކާއި އައިސްޕްލާންޓްތައް އެޅުމަށާއި އެކަމުގައި އަމަލު ކުރަންވީ ގޮތް މަސްވެރިކަމުގެ ޤާނޫނުގައި ތަފްސީލުކޮށް ބަޔާންކޮށްފައި އޮތް ނަމަވެސް އެމަގަށް ޖާގަ ފަހިކޮށް ނުދީ އޮތުމަކީ ކަންބޮޑު ވުމެއްކަމަށާއި، އެކަން އެގޮތަށް ހިނގަނީ މަސް ބަންދުކުރާ ފެކްޓްރީތައް ހިންގުމުގައި އުޅޭ ސަރުކާރާއި ގުޅުންހުރި ބޮޑެތި ވިޔަފާރިވެރިންގެ ބާރާއި ނުފޫޒުންކަމަށްވެސް މިމައްސަލާގައި ވަނީ ބުނެފައެވެ.