ރަޝިއާއިން ޔޫކުރެއިންއަށް ދެމުންދާ އުދުވާނީ ހަމަލާތަކުން ސަލާމަތް ވުމަށްޓަކާ އެކި ގައުމުތަކަށް މިހާތަނަށް ޔޫކުރެއިން ދޫކޮށް ހިޖުރަ ކޮށްފައިވާ މީހުންގެ އަދަދު 3.5 މިލިއަނަށް އަރާފައިވާ ކަމަށް، ޔޫއެން ރެފިއުޖީ އޭޖެންސީ UNHCR އިން ބުނެފިއެވެ.
ޔޫއެންއެޗްސީއާރު އިން ހާމަކޮށްފައިވާ އެންމެ ފަހުގެ މައުލޫމާތު ތަކުގައި ވާގޮތުން ފާއިތުވެދިޔަ ފެބްރުއަރީމަހުގެ 24ވަނަ ދުވަހު ރަޝިއާއިން ޔޫކުރެއިންއަށް އުދުވާނީ ހަމަލާ ދޭންފެށިފަހުން މިހާތަނަށް 3,532,756 މީހުންވަނީ ޔޫކުރެއިން ބޯޑަރު ހުރަސްކޮށް އަވައްޓެރި ގައުމުތަކަށް ހިޖުރަ ކޮށްފައެވެ.
ޔޫއެން ރެފިއުޖީ އޭޖެންސީން ބުނެފައިވާގޮތުގައި އެ އޭޖެންސީން ދަނީ ޔޫކުރެއިން ބޯޑަރު ކައިރީގައި ތިބި ރެފީއުޖީންނަށް ފޯރު ކޮށްދޭންޖެހޭ ރަޖާއާއި، ކާތަކެއްޗާއި، ޓެންޓުތައްފަދަ ތަކެތި ވިހާވެސް އަވަހަށް ފޯރުކޮށްދެވޭތޯ މަސައްކަތް ކުރަމުންނެވެ. އަދި ޚާއްސަކޮށް ޔޫކުރެއިން ޕޮލޭންޑު ބޯޑަރު ކައިރީގައި ޓެމްޕަރޭޗަރ އާދަޔާއި ޚިލާފަށް ބާރަށް ދަށްވަމުން ދާތީއާއެކު އެ ސަރަހައްދުގައި ތިބި ރެފިއުޖީންނަށް ބޭނުންވާ އެހީގެ ސާމާނު ވީހާވެސް އަވަހަށް ފޯރުކޮށް ދިނުމަށް މަސައްކަތް ކުރަމުން ދާކަމަށްވެސް ރެފިއުޖީ އޭޖެންސީން ބުނެފައި ވެއެވެ.
ރަޝިއާއިން ޔޫކުރެއިންއަށް ދެމުންދާ އުދުވާނީ ހަމަލާތަކާއި ގުޅިގެން އެންމެ ގިނަ އަދަދެއްގެ ރެފިއުޖީން ހިޖުރަ ކޮށްފައިވަނީ ޔޫކުރެއިންއާއި އިންވެގެން އޮންނަ އެއް ގައުމުކަމުގައިވާ ޕޮލޭންޑަށެވެ. މިގޮތުން މިގައުމަށް މިހާތަނަށް 2 މިލިއަނަށްވުނެ ގިނަ ރެފިއުޖީންވަނީ ހިޖުރަ ކޮށްފައެވެ.
ފާއިތުވެދިޔަ ފެބްރުއަރީމަހު ރަޝިއާއިން ޔޫކުރެއިންއަށް ހަމަލާ ދޭންފެށިފަހު މިހާތަނަށް 3 މިލިއަން މީހުންވަނީ އެގައުމު ދޫކޮށް ހިޖުރަ ކޮށްފައިވާއިރު، މީގެ ތެރޭގައި ގިނަ އަދަދެއްގެ ކުޑަކުދިންވެސް ހިމެނެއެވެ.
ރަޝިއާއިން ޔޫކުރެއިންއަށް އަރާ އެގައުމަށް އުދުވާނީ ހަމަލާ ދޭން ފެށުމާއެކު، އުފެދިފައިވާ ރެފިއުޖީ ކާރިސާއަކީ ދެވަނަ ބޮޑު ހަގުރާމައަށްފަހު ޔޫރަޕަށް ކުރިމަތިވެފައިވާ އެންމެ ބޮޑު ރެފިއުޖީ ކާރިސާއެވެ. އަދި ޔޫކުރެއިންއިންގެ އަވައްޓެރި ގައުމުތަކަށް ހިޖުރަ ކުރަމުންދާ ރެފިއުޖީންނަށް އެގައުމުތަކުންދަނީ އެހީތެރިކަން ފޯރުކޮށްދެމުންނެވެ.
