ވާދަވެރިކަން ބޮޑުވެ، ދެރައީސުން ފާޅުގައި ކެމްޕޭނަށް ނިކުންނަވައިފިނަމަ، ދެން ވާނީ ކިހިނެއް؟

ރައީސް ސާލިހުގެ ވެރިކަމުގެ ދައުރު ދެބައިވެގެން ދިޔަ ތަނާހަކަލަ ގޮތަކަށް އެމްޑީޕީގެ ތެރެެއިން ފާހަގަވެގެންދިޔަ އެންމެ އާދަޔާ ޚިލާފު އެއްކަމަކަށް ވެގެން ދިޔައީ ޕާޓީގެ އެންމެ އިސް ދެބޭފުޅުން މެދުގައި އުފެދިގެންދިޔަ ސިޔާސީ ޚިޔާލު ތަފާތުވުންތަކެވެ.

ފާއިތުވެދިޔަ އަހަރުގެ މޭމަހުގެ 6ވަނަ ދުވަހު ރައީސް ނަޝީދަށް އަމާޒުކޮށް ދިން ޓެރަރިސްޓު ހަމަލާއަށް ފަރުވާ ހޯއްދެވުމަށް ރާއްޖެއިން ބޭރުގައި ހުންނަވާ، ނަޝީދުވަނީ، ރައީސް ސާލިހާއެކީ އިތުރަށް ދެން ސިޔާސީ މަސައްކަތް ނުކުރައްވާނޭކަން ފާޅުގައި އިއުލާން ކުރައްވާފައެވެ. ނަޝީދު މިކަން އިއުލާން ކުރައްވާފައިވަނީ، އޭރު ރައްޔިތުންގެ މަޖިލިހުގައި ކުރިޔަށްދިޔަ ނަފްރަތުގެ ބިލާއި ގުޅޭގޮތުން އެމްޑީޕީގެ ޕާލަމެންޓްރީ ގުރޫޕުގައި ހިގައިދިޔަ ހިންހަމަ ނުޖެހުންތަކާއި އުދާސްތަކާއި ހަމައިންނެވެ.

އަދި އެއަށްފަހު އުފެދުނު އުދާސްތަކުގައި ފަހުން ރައީސް ސާލިހު އެމްޑީޕީގެ ގައުމީ މަޖިލީހާއި އަދި ޕާލަމެންޓްރީ ގުރޫޕުގެވެސް ތާއީދު އެމަނިކްފާނަށް އޮތްކަމަށް ވިދާޅުވެ، އާންމު ފޯރަމެއްގައި، ނޫސްވެރިންގެ ބައްދަލު ވުމެއްގައި ވާހަކަ ދެއްކެވުމާއިއެކު ނަޝީދުގެ ބަސްމަގު ބަދަލުވެ، ފަހުން ރައީސް ސާލިހަށް އަމާޒުކޮށް ސީދާގޮތުން ރައްދު ދެއްވާފައި ނުވާކަން ފާހަގަ ކޮށްލެވެއެވެ.

އެހެންނަމަވެސް، އެމްޑީޕީގެ އެތެރޭގައި އުފެދިފައިވާ ކޯޅުންތަކަށް ފިނިކަމެއް ނައިސް، އެހޫނުގައި، އެ ޕާޓީގެ މެމްބަރުން ރައްޔިތުންގެ މަޖިލިހުގެ ތަޅުމުގައި ރައީސް ސާލިހުގެ އިސްތިއުފާއަށްވެސް ގޮވާފައިވެއެވެ.

އަދި ޕާޓީގެ ތެރޭގައި މިގޮތުން އުފެދިގެން ގޮސްފައިވާ ހައިޖާންތަކަށް އެއްވެސް ފިނިކަމެއް އައިސްފައިނުވާކަން އެންމެ ބޮޑަށް ފާޅުވެ، ކަށަވަރުވެ ޔަގީންވެގެން ދަނީ މިހާރު ކުރިޔަށްދާ އެމްޑީޕީގެ ޗެއަރޕާރސަން އިންތިޚާބުގެ ކެމްޕޭންގެ ވާދަވެރި ކަމުންނެވެ. މިގޮތުން މިވާދަވެރިކަން، ޒާތީ ގޮތުން ފާޑުކިއުމާއި، އަދި ނުވިތާކަށް އެއްބަޔަކު އަނެއް ބަޔަކަށް ވަގަށް ގޮވުމާއި ހަމައަށް ފުޅާވެގެން ގޮސްފައި ވާއިރު، އެންމެފަހުން ރައީސް ނަޝީދު މިވަނީ ފާޅުގައި ކެމްޕޭނަށް ނިކުންނަވަން ޖެހިދާނެ ކަމުގެ އިންޒާރުވެސް ދެއްވާފައެވެ.

"އަޅުގަޑު ފާޅުގައި ނިކުންނާނަން"

މިހާރު ކުރިޔަށްދާ އެމްޑީޕީގެ ޗެއަރޕާރސަން އިންތިޚާބުގެ ކެމްޕޭނުގައި ރައީސް ސާލިހާއި ރައީސް ނަޝީދާއި ދެބޭފުޅުންގެ މެދުގައި އޮތް ވާދަވެރި ކަމަކީ "އެންމެން ދަންނަ ބޮޑު ސިއްރެއްގެ" ގޮތުގައި އޮތް ވާދަވެރިކަމެކެވެ.

މިގޮތުން މި އިންތިޚާބުގައި ވާދައްކުރައްވާ ދެ ކެނޑިޑޭޓުން ކަމުގައިވާ ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެމްބަރު އިމްތިޔާޒު ފަހުމީއާއި އިކޮނޮމިކް މިނިސްޓަރ ފައްޔާޒު އިސްމާއިލަކީ ދެރައީސުންގެ ފަރާތުން އިންތިޚާބުގައި ވާދަ ކުރައްވަމުން ގެންދަވާ ދެ ކެނޑިޑޭޓުންކަމީ އިންތިޚާބުގެ ވާދަވެރިކަމުގެ ތެރެއިން އެނގި ކަށަވަރުވާން އޮތް ކަމެކެވެ.

ޒަމާނުއްސުރެ އެމްޑީޕީގައި ރައީސް ނަޝީދަށް އިޚްލާސްތެރި މެމްބަރުންގެ ގޮތުގައި ތިއްބެވި، މަޖިލީހާއި ޕާޓީގެ އިސް ބައެއް ބޭފުޅުން ގެންދަވަނީ އިމްތިޔާޒު ފަހުމީއަށް ކެމްޕޭން ކޮށްދެއްވުމުގައި މުހިންމު ދައުރެއް އަދާ ކުރައްވަމުންނެވެ. ހަމަ އެއާއެކު، ސަރުކާރު ކުންފުނިތަކުގެ އެމްޑީންނާއި، ކުންފުނިތަކުގެ ގިނަ މުވައްޒިފުންނާއި އަދި ސިޔާސީ މަގާމްތަކުގައި ތިއްބެވި ގިނަ މުވައްޒިފުން ފާޅުގައި ކެމްޕޭން ކުރަމުން ގެންދަވާތަން ފެންނަމުން ދަނީ އިކޮނޮމިކް މިނިސްޓަރު ފައްޔާޒް އިސްމާއިލްއަށެވެ.

އޭގެ ނަތީޖާއެއްގެ ގޮތުން، ފާއިތުވެދިޔަ ތަނުގައި، އިންތިގެ ކެމްޕޭނުންވަނީ، މިކެމްޕޭނުގައި ވަޒީފާގެ ބިރު ދެއްކުމާއި، ކެމްޕޭނަށް އަމާޒުކޮށް ވަޒިފާތައް ދެމުންދާކަމުގެ ތުހުމަތުން ފެށިގެން، އަދި ރައީސް ނަޝީދު އެޕާޓީން ބޭރުކުރުމަށް މަސައްކަތް ކުރަމުން ދާކަމުގެ ތުހުމަތުވެސް ފައްޔާޒު އިސްމާއިލްގެ ކެމްޕޭނަށް އަމާޒުކޮށް ކޮށްފައެވެ. އެހެންނަމަވެސް މި ހުރިހާ ތުހުމަތުތައްވެސް ފައްޔާޒު ދޮގު ކުރައްވާފައިވާކަން މިފުރުސަތުގައި ފާހަގަ ކޮށްލާން ޖެހެއެވެ.

އެހެންނަމަވެސް، ހިގަމުންދާ ވާދަވެރިކަންބޮޑު ކެމްޕޭނުގައި ނަޝީދު އެންމެފަހުން މިވަނީ ސީދާކޮށް، ކެމްޕޭނަށް ނިކުންނަވަން ޖެހިދާނޭކަން އިއުލާން ކުރައްވާފައެވެ. އެމްޑީޕީގެ ޤައުމީ މަޖިލިސް ވަޓަސްއަޕް ގްރޫޕްގައި ރޭ ލިޔުއްވި މެސެޖެތަކުގައި ނަޝީދުވަނީ ފެނަކަ ކޯޕަރޭޝަނުން ރަށްރަށުގައި ހުންނަ ފެނަކައިގެ މުވައްޒިފުންނަށް އެމްޑީޕީގެ ޗެއާޕާސަން އިންތިޚާބުގައި ވަކި ގޮތަކަށް ވޯޓުލުމަށް އަންގާތީ އެކަމާއި ނުރުހުން ފާޅުކުރައްވާފައެވެ.

ފެނަކަ ކޯޕަރޭޝަންގެ މެނޭޖިން ޑިރެކްޓަރު އަހުމަދު ސައީދަށް އަމާޒު ކުރައްވާ ގައުމީ މަޖިލީހުގެ ވަޓްސްއަޕް ގުރޫޕަށް ފޮނުއްވެވި މެސެޖްތަކުގައި ނަޝީދު ވަނީ ރަށްރަށުގައި ތިބި ފެނަކަގެ މުވައްޒިފުންގެ ތެރެއިން އެމްޑީޕީގެ މެންބަރުންނަށް ވަޒީފާގެ ބިރު ދައްކަމުންދާ ކަމަށް ތުހުމަތު ކުރައްވާފައެވެ. އަދި ސައީދު މަަސައްކަތް ކުރައްވަނީ އެމަނިކުފާނު އެމްޑީޕީން ބޭރުކޮށްލެއްވުމަށްވެސް ނަޝީދު ވިދާޅުވެފައި ވެއެވެ.

އަދި އިންޒާރު ދެއްވާ ވިދާޅުވީ ވަކި ކެންޑިޑޭޓަށް ތާއީދު ހޯދުމަށާއި ވަޒީފާގެ ބިރު ދެއްކުމަށް ދެން އެއްވެސް މުވައްޒިފަކަށް ސައީދު ގުޅުއްވައިފިނަމަ އެމަނިކުފާނުވެސް ފާޅުގައި ނިކުންނަވާނެ ކަމަށެވެ.

ފެނަކަ އެމްޑީ ސައީދު، ފެނަކަ އަކީ މަނިކުފާނުގެ އަމިއްލަ ތަނެއް ނޫންކަން ހަނދާން ކުރާތި. ރަށްރަށުގެ ފެނަކަ މުވައްޒިފުންނަށް ބިރެއް ނުދެއްކޭނެ. ސައީދު އަޅުގަނޑު މި ޕާޓީ އިން ވަކިކުރާން އުޅުނަސް ފެނަކަ ހުރިހާ މުވައްޒިފުން އެކަމާ ނުރުހޭނެ. އެ މީހުންނަކީ ތަންދޮރު ދަންނަ މީހުން. ދެން ސައީދު މީހަކާ ގުޅައިފިނަމަ އަޅުގަނޑު ފާޅުގައި ނިކުންނާނަން.

ނަޝީދު ވިދާޅުވެފައި ވެއެވެ.

ކޮންމެއަކަސް، ނަޝީދު ފާޅުގައި ވަކި ކެނޑިޑޭޓަކަށް ތާއީދުކުރައްވާކަން ފާޅުކުރަވަމުން، ގައުމީ މަޖިލިސް ވަޓްސްއަޕް ގުރޫޕުގައި ކުރެއްވި މެސެޖްތަކުން، މޭރުން ކުރެވެން އޮތް އެއް ހަގީގަތަކީ، ޗެއަރޕާރސަން އިންތިޚާބުގައި ނަޝީދު އިމްތިޔާޒު ފަހުމީއަށް ތާއީދު ކުރައްވާއިގެން ހުންނެވީ ސިއްރިޔާތުގައި ނޫންކަމެވެ. އަދި ފެނަކަ އެމްޑީ ސައީދަށް ނަޝީދު ދެއްވާފައި ރައްދުތަކުންނާއި، ދައްކަވާފައިވާ ވާހަކަފުޅުތަކުން މިއިންތިޚާބުގެ ވަކި ހިސާބަކުން، ފާޅުގައި އެމަނިކްފާނު ކެމްޕޭނަށް ނިކުންނަވާނޭކަން މިއީ ވަރަށްވެސް ސާފުކޮށް މޭރުން ކުރެވެން އޮތް ކަމެކެވެ.

ނަޝީދު ފާޅުގައި ނިކުންނަވައިފިނަމަ ދެން ކަން ވެގެންދާނި ކިހިނެއް؟

އެމްޑީޕީގެ އެތެރޭގެ ހިންގުމުގެ ގިނަ ބާރުތަކެއް އެބޭފުޅަކަށް ލިބިގެންދާ އެއް ފަރާތަކީ އެޕާޓީގެ ޗެއަރޕާސަންއެވެ. އެހެންކަމުން، ޕާޓީގެ ލީޑަރޝިޕަށް މިއީ އަބަދުވެސް މުހިންމު މަގާމެކެވެ. އަދި އަމުދުން، އެމްޑީޕީގެ ކުރިޔަށް އޮތް ކޮންގްރެސްއާއި، އަދި 2023ގެ ރިޔާސީ އިންތިޚާބުގެ ޓިކެޓް ކަށަވަރު ކުރުމަށްޓަކާ ރައީސް ސާލިހަށްވެސް މިއިންތިޚާބުގެ ނަތިޖާއަކީ އިންތިހާއަށް މުހިންމު ނަތީޖާއެއްކަމުގައި ގަބޫލުކަރަން ޖެހެއެވެ.

އެހްނަނަމަވެސް، މިއިންތިޚާބުގައި ދެ ރައީސުންގެ މަސްލަހަތު އިންތިހާއަށް ހިމެނިގެން ގޮސްފައި އޮތްނަނަމެވެސް، އެއްވެސް ރައީސަކު އިންތިޚާބުގެ ކެމްޕޭނާއި ގުޅިގެން ފާޅުގައި ބަސްވިދާޅުވެ، ވަކިއަތަކަށް ކެމްޕޭން ކުރުމުގެ މޭރުމުން ފާއިތުވެދިޔަ ތަނުގައި ވާހަކަ ދައްކަވާފައެއް ނުވެއެވެ. އެހެންނަމަވެސް، އެމްޑީޕީގެ ގައުމީ މަޖިލިސް ވަޓްސްއަޕް ގުރޫޕަށް ނަޝީދު ރޭ ކުރެއްވި މެސެޖްތަކަކީ، އެމަނިކްފާނު ހުންނެވީ އިމްތިޔާޒު ފަހުމީއަށް އެއްވެސް ފޮރުވުމެއް ނެތި ތާއީދުކޮށްގެންކަން ސީދާބަހުން ސާބިތު ކޮށްދިނުމުގެ އިތުރުން، މިއަދު ގިނަބަޔަކު ގަބޫލުކުރާ އެއް ހަގިގަތަކީ، މިއީ ފާޅުގައި ކެމްޕޭނަށް ނިކުންނެވުމަށް ނަޝީދު ހޯއްދަވަމުން ގެންދަވާ ހުއްޖަތެއްގެ ގޮތުގައިވެސް މެއެވެ.

އަދި ގަބޫލުކުރަންޖެހޭ އެއް ހަގީގަތަކީ މިއިންތިޚާބުގެ ކެމްޕޭނަށް ނަޝީދު ފާޅުގައި ނިކުންނެވުމަކީ، އިމްތިޔާޒު ފަހުމީއަށް ލިބިގެންދާނެ ކުރިއެރުމަކަށް ވެގެންދާނޭ ކަންވެސްމެއެވެ. ސަބަބަކީ، ކޮންމެ ގޮތަކަށް ހާލަތު އޮތްނަމަވެސް، އެމްޑީޕީގައި އަދިވެސް ނަޝީދުގެ މަގުބޫލުކަން އޮތްމިންވަރާއި، ޕާޓީގެ ގުރާސް ރޫޓުގައި އަދިވެސް އެމަނިކްފާނުގެ ނުފޫޒު އޮންނާނޭ ކަމުގައި ގަބޫލުކުރަން ޖެހޭތީއެވެ.

ހަމަ އެއާއެކު ގަބޫލުކުރަންޖެހޭ އަނެއް ހަގީގަތަކީ، ގައުމުގެ ރައީސެއްގެ ހައިސިއްޔަތުން، އަދި އެމްޑިޕީގެ އިސް ލީޑަރުގެ ހައިސިއްޔަތުން، އެމްޑީޕީގެ އެތެރޭގައި ރައީސް ސާލިހަށް އޮތް ތާއީދުވެސް ކުޑަ ކަމުގައި ދެންނެވޭނެ އެއްވެސް ޖާގައެއް ނެތްކަމެވެ. އެހެންނަމަވެސް އަދި ސާފުވާން ނެތްކަމަކީ، އިމްތިޔާޒު ފަހުމީގެ ކެމްޕޭނަށް ނަޝީދު ފާޅުގައި ނިކުންނަވައިފި ހާލަތެއްގައި، ފައްޔާޒަށް ތާއީދުކުރާކަން ހާމަކޮށް ދެއްވުމުގެ ގޮތުން ރައީސް ސާލިހު ދެން ނިންމަވާނޭ ނިންމެވުމަކާއި އަމަލްކުރާނޭ ގޮތެވެ. އެއީ ގިނަބަޔަކު ޝައުގުވެރިކަމާއެކީ ދެކެން ބޭނުންވާނޭ މަންޒަރެއްކަމީ ކަށަވަރުވެ ޔަގީންވާން އޮތް ކަމެކެވެ.