ބޮޑު މަގުބޫލު ކަމެއް ހޯދި ފިލްމު ޕީކޭގެ ލީޑުން ފެނިގެންދިޔަ ދެ ތަރިން ކަމުގައިވާ އާމިރު ޚާނާއި އަނުޝްކާ ޝަރުމާ އެކުގައި އަނެއްކާވެސް ފިލްމެއް ކުޅެން އުޅޭ ކަމަށް ޚަބަރުތައް ބުނެފިއެވެ.
އެ ދެ ތަރިން އެކުގައި ފެނިގެން ދާނީ ސްޕެނިޝް ފިލްމެއް ކަމުގައިވާ "ކެމްޕިއަންސް" ގެ ހިންދީ ރިމޭކަކުންނެވެ.
އާމިރު ޚާން މިވަގުތު އަންނަނީ އޭނާ ގެ ކުރިއަށް އޮތް ފިލްމް "ލާލް ސިންގް ޗައްޑާ"ގެ ޕްރޮމޯޝާންގައި މަސައްކަތް ކުރަމުންނެވެ. މި ފިލްމު ރިލިޒް ކުރުމަށް ހަމަޖެހިފައިވަނީ އޯގަސްޓް މަހުގެ 11 ވަނަ ދުވަހުއެވެ.
އަނުޝްކާ އާއެކު އާމިރު ފެނިގެންދާ ފިލްމު ޑައިރެކްޓް ކުރަނީ "ޝުބް މަންގަލް ސާވްދާން"ގެ ޑައިރެކްޓަރ އާރްއެސް ޕްރަސަނާއެވެ. މި ފިލްމު ކުޅުވުމަށް އަނުޝްކާއާ މިހާރު މަޝްވަރާ ކުރަމުން އަންނަ ކަމަށާއި ނަމަވެސް އަދި ފިލްމަށް ސޮއި ނުކުރާ ކަމަށް ޚަބަރުތައް ބުނެއެވެ.
"ލާލް ސިންގް ޗައްޑާ" އަށް ފަހު މި ފިލްމުގެ މަސައްކަތް އާމިރު ފަށާނެ ކަމަށް ޚަބަރުލިބެއެވެ. ސްޕެނިޝް ބަހުން 'ކެމްޕިއަންސް' އަކީ ޗެމްޕިއަންސް އެވެ. މި ފިލްމަކީ ނުކުޅެދުންތެރިކަން ހުންނަ ކުދިންތަކެއް އޮލިމްޕިކް ޓީމަކަށް ހެދުމަށް ކުރާ މަސައްކަތް ދައްކުވައިދޭ ފިލްމެކެވެ.
އަނުޝްކާ މިވަގުތު އަންނަނީ އޭނާގެ ސްޕޯޓް ޑްރާމާގެ މަސައްކަތް ކުރަމުންނެވެ. އެއީ "ޗަކްދާ އެކްސްޕްރެސް" އެވެ.