ގިނަ ބަޔަކު އިންތިޒާރު ކުރަމުންދާ ރިތިކް ރޯޝަނާއި ދީޕިކާ ޕަޑުކޯންގެ އަލަތު ފިލްމު "ފައިޓާ" ރިލީޒް ކުރަނީ 2023 ގައި ކަން އިއުލާން ކޮށްފިއެވެ.
މިއީ މިދެތަރިން ސްކްރީން ހިއްސާކުރާ ފުރަތަމަ ފިލްމެވެ. މި ފިލްމުގެ އިންތިޒާރުގައި ސަޕޯޓަރުން ތިބި އިރު މި ފިލްމުގެ ޝޫޓިން މި އަހަރުގެ ތެރޭގައި ފަށަން ވަނީ ހަމަޖެހިފައެވެ. ފިލްމު އަޅުވަން ކަނޑައަޅާފައިވާ ތާރީހަކީ އަންނަ އަހަރުގެ ސެޕްޓެމްބަރު މަހުގެ 28 ވަނަ ދުވަހެވެ.
ޑައިރެކްޓަރ ސިދާތު އާނަންދުގެ މި ފިލްމުގެ މުހިންމު ރޯލަކުން އަނިލް ކަޕޫރު ވެސް ފެނިގެން ދާނެއެވެ. ފިލްމުގެ ވާހަކަ ލިޔެފައި ވަނީވެސް ސިދާތެވެ.
މި ފިލްމުގެ ލީޑު ދެތަރިން މިހާރުވެސް އަންނަނީ ވަރަށް ބިޒީކޮށް ފިލްމުތަކުގެ ޝޫޓިންތަކުގައި މަސައްކަތް ކުރަމުންނެވެ. ރިތިކް މިހާރު ކުރަމުން އަންނަ މަސައްކަތަކީ "ވިކްރަމް ވޭދާ"ގެ މަސައްކަތެވެ. މި ފިލްމުގައި ރިތިކާއެކު ފެނިގެން ދާނީ ސައިފް އަލީ ޚާނެވެ.
އަނެއް ކޮޅުން ދީޕިކާ އަންނަނީ ސާހްރުކް ޚާންގެ ފިލްމު "ޕަތާން"ގެ މަސައްކަތްތައް ކުރަމުންނެވެ. މި ފިލްމަކީ ބޮޑު ބަޖެޓަކުން އަދި ގިނަ މަޝްހޫރު ތަރިން ތަކަކާއެކު ހަދަމުން އަންނަ ފިލްމެކެވެ.
