ކަނޑުމަތީގައި ފުލުހުން ހިނގި އޮޕަރޭޝަނެއްގައި 12 ކިލޯގެ މަސްތުވާތަކެއްޗާ އެކު ހައްޔަރުކުރި މީހުންގެ ތެރޭގައި ފިލްމީ ތަރި އަދި ލަވިޔުންތެރިޔާ ޙުސައިން ޞަބާހު ހިމެނޭކަން ކަށަވަރުވެއްޖެއެވެ.
މިކަން ޚަބަރު އޮންލައިންނަށް ވަނީ ކަށަވަރުވެފައެވެ. ނަމަވެސް ޞަބާހު ހައްޔަރުކުރިކަން ފުލުހުން ހާމަކޮށްފައެއް ނުވެއެވެ. ފުލުހުން ބުނެފައިވަނީ ހައްޔަރުކޮށްފައިވަނީ އިންޑިއާ މީހެއްކަމަށެވެ. ނަމަވެސް އެ މަސްތުވާތަކެތި މާލެ ގެނައުމުގައި ޞަބާހުގެ ލޯންޗު ބޭނުންކުރިކަން ވަނީ އެނގިފައެވެ. އެހެންކަމުން ފުލުހުން ވަނީ އެ ލޯންޗުވެސް ފުލުހުންގެ ބެލުމުގެ ދަށަށް ގެންގޮސްފައެވެ. މީގެ އިތުރުން އިންޑާމީހާއާއި ޞަބާހުގެ އިތުރުން އިތުރު ބައެއްވެސް ހިމެނޭކަން ވަނީ އެނގިފައެވެ.
މި މައްސަލާގައި ފުލުހުން ހަމައެކަނި ބުނެފައިވަނީ، އިންޓެލިޖެންސަށް ލިބުނު މައުލޫމާތަކާ ގުޅިގެން ކަނޑުމަތިން މަސްތުވާތަކެއްޗާއެކު އުމުރުން 37 އަހަރުގެ އިންޑިއާ ފިރިހެނަކު ހައްޔަރުކޮށްފައިވާ ކަމަށެވެ. ފުލުހުން ބުނި ގޮތުގައި ހައްޔަރުކުރި މީހާ އަކީ މީގެ ކުރިން ވެސް މަސްތުވާތަކެތީގެ މައްސަލައެއްގައި ދެ ފަހަރެއްގެ މަތިން ފުލުހުންގެ ބެލުމުގެ ދަށަށް ގެންދިޔަ މީހެކެވެ. އެކަމަކު އޭނާ ދޫވީ ކިހިނެއް ކަމެއް ފުލުހުން ނުބުނެއެވެ.
ފުލުހުން އެ މައްސަލަ ބަލަމުން އަންނަ ކަމަށް ވެސް ވަނީ ބުނެފައެވެ.
ކޮމެންޓު ފޮނުވާ