ރައްޔިތުންގެ މަޖިލީހުގެ ކުރެންދޫ ދާއިރާގެ އެމްޑީޕީގެ މެމްބަރު އަބްދުލްޣަނީ އަބްދުލްޙަކީމްގެ މައްޗަށް ސިވިލް ކޯޓުން ކޮށްފައިވާ ސާބިތު ދަރަނީގެ ހުކުމް، ހައިކޯޓުން ދަމަހައްޓައިފިއެވެ.
އެލިއާ އިންވެސްޓްމަންޓްސް އަށް 523،673 ރުފިޔާ ދައްކަން މެންބަރު ޣަނީގެ މައްޗަށް ސިވިލް ކޯޓުން ހުކުމްކޮށްފައިވަނީ 2019 ވަނަ އަހަރުގެ އޮކްޓޯބަރު 17ގައެވެ. ސިވިލް ކޯޓުގެ ޙުކުމުގައި ވަނީ އޭނާގެ 51 އިންސައްތަ ހިއްސާ އޮންނަ ލޮގް ވޫޑް މޯލްޑިވްސް ޕްރައިވެޓް ލިމިޓެޑުން ފަސް މަސް ތެރޭގައި އެލިއާއަށް އެ ފައިސާ ދެއްކުމަށެވެ.
ސިވިލް ކޯޓުން ނިންމާފައިވަނީ އެ މައްސަލާގައި ހޯދަން އެދުނު އަސްލު ފައިސާ ކަމުގައިވާ 455،368.05 ރުފިޔާއަކީ ލޮގްވުޑް މޯލްޑިވްސް އަދި ޣަނީވެސް ދައްކަވަންޖެހޭ ފައިސާ ކަމަށެވެ. އެ ފައިސާ ޣަނީ ދައްކަންޖެހެނީ އެ އެއްބަސްވުމުގައި ގެރެންޓާއެއްގެ ގޮތުގައި ޣަނީ ސޮއިކުރައްވާފައިވާތީ ކަމަށް ސިވިލް ކޯޓުގެ ޙުކުމުގައިވެއެވެ.
ޣަނީ ވަނީ އެ މައްސަލަ ހައިކޯޓުގައި އިސްތިއުނާފްކޮށްފައެވެ. އެއީ ދެ ކުންފުންޏެއްގެ ދެމެދުގައި ހިނގި އެއްބަސްވުމެއްގައި އޭނާ ފަރުދީ ގޮތުން ޒިންމާ އޭނާގެ މައްޗަށް އުފަންވެގެން ނުދާ ކަމަށް ބުނެއެވެ. އެމައްސަލައިގައި ވަނީ އެއެއްބަސްވުމަކީ އެލިއާ އިންވެސްޓްމަންޓްސް އާއި ލޮގް ވޫޑް މޯލްޑިވްސްއާ ދެމެދު ދަރަނި އަދާކުރުމާ ބެހޭ ގޮތުން ވެވުނު އެއްބަސް ވުމެއްކަމަށާއި، މެނޭޖިން ޑިރެކްޓަރެއްގެ ހައިސިއްޔަތުން އެއްބަސްވުމުގައި ޣަނީ ސޮއިކޮށްފައި ވަނީ އަމިއްލަ ޝަހުސީ އަދި ޒާތީ ހައިސިއްޔަތުން ނޫންކަމަށެވެ.
ހައިކޯޓުންވެސް މި މައްސަލަ ނިންމާފައިވަނީ މެންބަރު ޣަނީއާއި ދެކޮޅަށެވެ.
ހައިކޯޓުގެ ޙުކުމުގައި ބަޔާންކޮށްފައިވަނީ، އާއްމު އުސޫލުން ކުންފުންޏަކީ އެތަނެއްގެ މެމްބަރުންނާއި ވަކިން އުފެދިފައިވާ ގާނޫނީ ޝަހުސެއްކަމަށެވެ. އެހެންކަމުން ކުންފުންޏެއްގެ ޑިރެކްޓަރުންނަކީ އޭނާގެ ކުންފުނީގެ ދަރަންޏަށް ފަރުދީ ގޮތުން ޒިންމާވާންޖެހޭ ފަރާތެއް ނޫންކަމަށާއި، ނަމަވެސް، އެ މައްސަލައިގައި ހުށަހަޅާފައިވާ ލިއުންތަކަށް ބަލާއިރު ޚުސޫމާތު އުފެދިގެން އުޅޭ އެއްބަސްވުމުގައި އިސްތިއުނާފު ކުރާ ފަރާތުން އެއްބަސްވުމުގައި ބައިވެރިވެފައި ވަނީ ކުންފުނީގެ ޑިރެކްޓަރެއްގެ ހައިސިއްޔަތަކުން ނޫން ކަން ވަރަށް ވެސް ސާފުކޮށް އެނގޭ ކަމަށް ހައިކޯޓުގެ ޙުކުމުގައިވެއެވެ.
އިސްތިއުނާފްކުރާ ފަރާތުން އެއްބަސްވުމުގެ ދަށުން ދައްކަން ޖެހޭ ފައިސާއަށް ގެރެންޓީ ދީފައި ވަނީ ފަރުދީ ގޮތުން އެ ފައިސާއަށް ޒިންމާވާނޭކަމަށް ޔަގީންކަން ދީ އެފަދައިން އެއްބަސްވެގެން ކަން އެނގެން އޮންނަ ކަމަށް ވެސް ހައި ކޯޓްގެ ޙުކުމުގައިވެއެވެ.
ހައި ކޯޓުގެ މި ޙުކުމާއެކު މެންބަރު ޣަނީގެ ގޮނޑިއާމެދު ވަނީ ސުވާލު އުފެދިފައެވެ. އެއީ ސާބިތު ދަރަންނެއް އޮވެ ހުކުމާ އެއްގޮތަށް ފައިސާ ނުދެއްކުމަކީ މެންބަރު ކަމުގެ ގޮނޑި ގެއްލޭނެކަމަކަށްވާތީއެވެ.
ނަމަވެސް ބައެއް ޤާނޫނީ ވަކީލުން ވިދާލުވާގޮތުގައި މި މައްސަލަ ސުޕްރީމް ކޯޓުގައ އިސްތިއުނާފް ކުރުމުގެ ހައްގު އޮތުމުން، މެންބަރުކަމުގެ ގޮނޑިއެއް ޣަނީއަކަށް ނުގެއްލޭނެއެވެ.
