ޔުއެފާ ޗެމްޕިއަންސް ލީގު ފުޓްބޯޅަ މުބާރާތުގެ ގަދަ 16 ގެ ދެވަނަ ލެގުގައި މިރޭ ކަރީމް ބެންޒެމާ އޭނާގެ ފެންވަރު ދައްކާލުމަށްފަހު، ރެއާލް މެޑްރިޑް ގޮވައިގެން މުބާރާތުގެ ކުއާޓާ ފައިނަލަށް ދަތުރުކޮށްފިއެވެ.
ރެއާލްގެ އަމިއްލަ ދަނޑުގައި ކުޅުނު މި މެޗުގައި ޕީއެސްޖީގެ މައްޗަަށް މެޑްރިޑުން ކުރިހޯދީ ފަހަތުން އަރައި 1-3 ގެ ނަތީޖާއަކުންނެވެ. ޕީއެސްޖީ އާއި ރެއާލް ބައްދަލުކުރި ފުރަތަމަ ލެގުގެ މެޗު 0-1 ގެ ނަތީޖާއަކުން ކާމިޔާބުކުރީ ޕީއެސްޖީއެވެ. އެހެންކަމުން 2-3 ގެ އެގްރިގޭޓް ނަތީޖާއިން ޗެމްޕިއަންސް ލީގުގެ އެންމެ ކާމިޔާބު ޓީމު ރެއާލް ވަނީ ވަނީ ކުއާޓާއިން ޖާގައެއް ޔަގީންކޮށްފައެވެ.
ރެއާލް އާއި ޕީއެސްޖީ ބައްދަލުކުރި މެޗުގެ ފުރަތަމަ ހާފް ނިމުނީ 39 ވަނަ މިނެޓުގައި ކިލިއަން އެމްބާޕޭ ކާމިޔާބުކޮށްދިން ލަނޑާއެކު ޕީއެސްޖީ ކުރީގައި އޮވެގެންނެވެ. މި މެޗުގެ ފޯރިގަދަ ކުޅުން ފެނިގެންދިޔައީ ދެވަނަ ހާފުގައެވެ.
އެގޮތުން ދެވަނަ ހާފް ފަށައިގެން 61 ވަނަ މިނެޓުގައި ރެއާލްގެ ކެޕްޓަން ބެންޒެމާ ވަނީ ލަނޑެއް ޖަހާ މެޗުގެ ނަތީޖާ އެޓީމަށް ހަމަހަމަކޮށްދީފައެވެ. އަދި 76 ވަނަ މިނެޓުގައި ބެންޒެމާ ވަނީ އިތުރު ލަނޑެއް ޖަހާ ރެއާލް އަށް ލީޑު ނަގައިދިނުމަށްފަހު ޕީއެސްޖީ ހާސްކޮށްލާފައެވެ. ދެވަނަ ލަނޑު ޖެހިތާ ދެ މިނެޓު ފަހުން ބެންޒެމާ ވަނީ އިތުރު ލަނޑެއް ޖަހާ އޭނާގެ މި މެޗުގައި އޭނާގެ ހެޓްރިކް ފުރިހަމަކޮށްފައެވެ. މި ލަނޑަށްފަހު ޕީއެސްޖީގެ ކުޅުންތެރިންގެ މޫނުމަތިން ފެނިގެންދިޔައީ ހާސްކަމާއި، މަޔޫސްކަމެވެ. ގާތްގާތުގައި ބެންޒެމާ ޖެހި ދެ ލަނޑާއެކު މެޗުގެ އޮއިވަރު ރެއާލް ކޮޅަށް އެނބުރިގެން ދިޔުމާއެކު ޕީއެސްޖީން ވަނީ އެޓީމުގެ ކުޅުން ރަނގަޅުކޮށް ލަނޑެއް ޖަހަން ވަރަށް މަސައްކަތްކޮށްފައެވެ. ނަމަވެސް ރެއާލްގެ ޑިފެންސް ލައިނުން ވަނީ ޕީއެސްޖީއަށް އިތުރު ލަނޑެއް ޖެހިޔަނުދީ އެޓީމު ހިފާއްޓާފައެވެ.
މީގެ އިތުރުން ޗެމްޕިއަންސް ލީގުގެ ގަދަ 16 ގައި މިރޭ މެންޗެސްޓަރ ސިޓީ އާއި ޕޯޗުގަލްގެ ސްޕޯޓިން ލިސްބަން ވާދަކުރި މެޗު ނިމުނީ ލަނޑެއް ނުޖެހި އެއްވަރުވެގެންނެވެ. ނަމަވެސް މި ދެ ޓީމު ވާދަކުރި ފުރަތަމަ ލެގުގައި ސިޓީން 0-5 އިން ސްޕޯޓިންގް ލިސްބަންގެ މައްޗަށް ކުރިހޯދާފައި އޮތުމުގެ ސަބަބުން ސިިޓީވެސް ވަނީ ޗެމްޕިއަންސް ލީގުގެ ކުއާޓާ ފައިނަލުން ޖާގައެއް ކަށަވަރުކޮށްފައެވެ.
މިހާތަނަށް ޗެމްޕިއަންސް ލީގުގެ ކުއާޓާ ފައިނަލަށް ދަތުރުކުރި ޓީމު ތަކަކީ، ލިވަޕޫލް، ބަޔާން މިއުނިކް އަދި ރެއާލް މެޑްރިޑްގެ އިތުރުން މެންޗެސްޓަރ ސިޓީއެވެ.
