ޔުއެފާ ޗެމްޕިއަންސް ލީގުގެ ގަދަ 16 ގައި މިރޭ ލެވަންޑޯސްކީގެ ހެޓްރިކާއެކު ސަލްޒްބާގް ބޮޑު ތަފާތަކުން ބަލިކޮށް ބަޔާން މިއުނިކް ކުއާޓާ ފައިނަލަށް ދަތުރުކޮށްފިއެވެ.
ޗެމްޕިއަންސް ލީގުގެ ގަދަ 16 ގެ ދެވަނަ ލެގުގައި މިރޭ ބަޔާން ސަލްޒްބާގް ބަލިކުރީ 1-7 ގެ ނަތީޖާއަކުންނެވެ. މި ދެ ޓީމު ބައްދަލުކުރި ފުރަތަމަ ލެގުގެ މެޗު ނިމުނީ 1-1 އިން ދެ ޓީމު އެއްވަރުވެގެންނެވެ. އެހެންކަމުން 2-8 ގެ އެގްރިގޭޓް ނަތީޖާއަކުން ބަޔާން މިވަނީ މުބާރާތުގެ ކުއާޓާ ފައިނަލުން ޖާގައެއް ކަށަވަރުކޮށްފައެވެ.
ބަޔާންގެ ދަނޑުގައި މިރޭ ސަލްޒްބާގް އާއި ދެކޮޅަށް ކުޅުނު މެޗުގައި ބަޔާން އިން ޖެހި ފުރަތަމަ ލަނޑަކީ އެޓީމަށް ލިބުނު ޕެނަލްޓީއަކުން ކާމިޔާބުކުރި ލަނޑެކެއެވެ. މެޗުގެ 12 ވަނަ މިނެޓުގައި މި ޕެނަލްޓީ ކާމިޔާބުކޮށްދިނީ ލެވަންޑޯސްކީއެވެ. އަދި މެޗުގެ 21 ވަނަ މިނެޓުގައި ލިބުނު އިތުރު ޕެނަލްޓީއަކުން ލެވަންޑޯސްކީ ވަނީ ބަޔާންއަށް ލީޑު ފުޅާކޮށްދީފައެވެ. މި މެޗުގައި ލެވަންޑޯސްކީ އޭނާގެ ހެޓްރިކް ފުރިހަމަ ކުރީ ދެވަނަ ޕެނަލްޓީ ކާމިޔާބުކުރިތާ 2 މިނެޓު ފަހުންނެވެ. މިއީ ޗެމްޕިއަންސް ލީގުގެ ތާރީހުގައި ކުޅުންތެރިއަކު ހެދި އެންމެ އަވަސް ހެޓްރިކްއެވެ. މެޗުގެ ފުރަތަމަ ހާފް ނިމުމުގެ ކުރިން ބަޔާނުން ވަނީ އަދި އިތުރު ލަނޑެއް ޖަހާފައެވެ. އެގޮތުން ބަޔާންގެ ހަަތަރު ވަނަ ލަނޑު 31 ވަނަ މިނެޓުގައި ކާމިޔާބުކޮށްދިނީ، ސާޖް ގްނަބްރީއެވެ.
މެޗުގެ ދެވަނަ ހާފް ފަށައިގެން ބަޔާން މިއުނިކުން ޖެހި ތިން ލަނޑުގެ ތެރެއިން ދެ ލަނޑު ކާމިޔާބުކޮށްދިނީ ތޯމަސް މުލާއެވެ. އަނެއް ލަނޑު ކާމިޔާބުކޮށްދިނީ، ލެރޯއީ ސާނޭއެވެ. މި މެޗުގައި ސަލްޒްބާގް އިން ޖެހި ހަމައެކަނި ލަނޑު ދެ ވަނަ ހާފުގައި އެޓީމަށް ކާމިޔާބުކޮށްދިނީ، ބްރެންޑެން އާރޮންސަންއެވެ.
