ލ.ގަމު މުކުރިމަގު ސްކޫލުގައި ދެ ކްލާސްރޫމް ހަދަން ޖަޕާނު ސަރުކާރުން 1.2 މިލިޔަން ރުފިޔާ ހަދިޔާކޮށްފިއެވެ.
މިއީ ހިލޭ އެހީގެ ގޮތުގައި އެ ގައުމުގެ "ގްރާސް ރޫޓްސް ހިއުމަން ސެކިއުރިޓީ ޕްރޮޖެކްޓް" (ޖީޖީޕީ) ގެ ދަށުން ހަދިޔާކުރި ފައިސާއެވެ. މި އެއްބަސްވުމުގެ ދަށުން މުކުރިމަގު ސްކޫލުގައި އެލްކޭޖީ އާއި ޔޫކޭޖީއަށް ޚާއްސަ ދެ ކްލާސްރޫމް ޢިމާރާތް ކުރާނެއެވެ. އަދި ގުދުރަތީ ކާރިޘާތަކުގައި އިވެކުއޭޝަން ޝެލްޓަރެއް ހަދަންވެސް އެއެހީ ބޭނުން ކުރެވޭނެކަމަށް ރާއްޖޭގައި ހުންނަ ޖަޕާނުގެ އެމްބަސީން ވިދާޅުވެއެވެ.
Signing of the grant agreement between the Government of Japan and Mukurimagu School (L.Gan) to provide MVR 1,224,733 in aid for Mukurimagu School's upgrade under Japan's Grant Assistance for Grass-Roots Human Security Projects. pic.twitter.com/sWTEwjVimF
— Ministry of Education (@MoEdumv) March 7, 2022
މިއެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި އެޑިއުކޭޝަން މިނިސްޓްރީގެ ސްޓޭޓް މިނިސްޓަރ ޑރ.އަބްދުﷲ ރަޝީދު ވަނީ ފެށުނީއްސުރެ ޖަޕާނު ސަރުކާރުން ރާއްޖޭގެ ތަޢުލީމީ ދާއިރާއަށް އެކި ގޮތްގޮތުން އެހީތެރިކަން ފޯރުކޮށްދޭކަން ފާހަގަކުރައްވާފައެވެ. މިގޮތުން އަތޮޅުތަކުގެ ސްކޫލްތައް ޢިމާރާތްކުރުމަށާއި ތަރައްޤީކުރުމަށް ޖަޕާނު ސަރުކާރުން އެހީތެރިވެދީފައިވާކަން ސްޓޭޓް މިނިސްޓަރ ފާހަގަކުރެއްވިއެވެ.
ޖަޕާނު ސަރުކާރުން ރާއްޖެއަށް ކަނޑައަޅާފައި ހުންނަވާ ސަފީރު ޓަކުޗީ މިޑޯރީ ވިދާޅުވީ ޖަޕާނުން ފޯރުކޮށްދިން އެހީގައި ދަރިވަރުންނަށް ކިޔަވައިދިނުމަށްޓަކައި އެންމެ އެކަށީގެންވާ ކްލާސްރޫމްތައް އެޅިގެންދާނެކަމަށެވެ. އަދި މުދައްރިސުންނަށްވެސް ފިލާވަޅުތައް އުނގަންނައިދިނުމުގައި ފަސޭހަވެގެންދާނެކަނަށް އޭނާ ފަހަގަކުރެއެވެ.އެވެ.
އެ އެހީގެ އެއްބަސްވުމުގައި ޖަޕާނުގެ ފަރާތުން ސޮއިކުރެއްވީ އެ ގައުމުން ރާއްޖެ އަށް ކަނޑައަޅާފައި ހުންނަވާ ސަފީރު ޓަކުޗީ މިޑޯރީ އެވެ. މުކުރިމަގު ސްކޫލްގެ ފަރާތުން ސޮއިކުރެއްވީ ޕްރިންސިޕަލް އަބްދުﷲ ޝަރީފެވެ.
ކޮމެންޓު ފޮނުވާ