ޔޫކުރެއިންގައި ކުރިޔަށްދާ ހަގުރާމަ ހުއްޓާލުމާއި ގުޅޭގޮތުން ޔޫކުރެއިންގެ ރައީސް ޒެލެންސްކިއާއެކީ ސީދާ މަޝްވަރާއަށް ދިއުމަށް އިންޑިއާގެ ބޮޑުވަޒީރު ނަރެންދުރަ މޯޑީ ރަޝިއާގެ ރައީސް ލާޑިމިރު ޕުޓިން އަށް އޮވާލައްވައިފިކަމަށް އިންޑިއާގެ ސަރުކާރުގެ އިސް ފަރާތްތަކާއި ހަވާލާދީ ރޮއިޓާރސްއިން ރިޕޯޓު ކޮށްފިއެވެ.
ރޮއިޓާސްއިން ރިޕޯޓު ކޮށްފައިވާ ގޮތުގައި، މޯޑީވަނީ ހޯމަދުވަ ޕުޓިންއާއި ފޯނުން ގުޅުއްވާ މަޝްވަރާ ކުރައްވާފައެވެ.
"ބޮޑުވަޒީރު މޯޑީވަނީ، މިހާރު ކުރިޔަށްދާ ދެގައުމުގެ މަޝްވަރާތަކުގެ އިތުރުން، ޒެލެންސްކީއާއެކީ ސީދާ މަޝްވަރާއަށް ދިއުމަށް ރަޝިއާގެ ރައީސްގެ އަރިހުން އެދިވަޑައިގެންފަ،" އިންޑިއާގެ ސަރުކާރުގެ އިސް އޮފިޝަލުން ވިދާޅުވެފައި ވާކަމަށް ރޮއިޓާރސްއިން ރިޕޯޓު ކޮށްފައި ވެއެވެ.
ފާއިތުވެދިޔަ ފެބްރުއަރީމަހުގެ 24ވަނަ ދުވަހު ރަޝިއާއިން ޔޫކުރެއިންއަށް އުދުވާނީ ހަމަލާ ދޭން ފެށިތާ 2 ހަފްތާ ފާއިތުގެން ގޮސްފައިވާއިރު، މި ހަގުރާމާގައި އާންމު ރައްޔިތުންގެ ގިނަބަޔަކު މަރުވެ، ގެދޮރަށާއި މުދަލަށް ދަނީ ބޮޑެތި ގެއްލުންތައް ލިބެމުންނެވެ. އަދި ދުނިޔޭގެ ދެވަނަ ބޮޑު ހަނގުރާމައަށްފަހު، ޔޫރަޕަށް ކުރިމަތި ވެފައިވާ އެންމެ ބޮޑު އިންސާނީ ކާރިސާ މިހާރު ވަނީ ޔޫރަޕަށް ކުރިމަތިވެފައެވެ. އަދި މި ހަނގުރާމާގައި މިހާތަނަށް ޔޫކުރެއިންގެ 1.5 މިލިއަން މީހުންވަނީ ރެފިއުޖީންނަށް ވެގެން ގޮސްފައެވެ.
ހަގުރާމާގައި އާންމުންނަށް ބޮޑެތި ގެއްލުންތައް ލިބެމުން ދާއިރު ޔޫކުރެއިންގެ ރައީސް ޒެލެންސްކީވަނީ ރަޝިއާގެ އަސްކަރިއްޔާއާއި ހަގުރާމަ ކުރުމަށްޓަކާ އެގައުމަށް ފައިޓަރޖެޓްތައް ފޯރުކޮށް ދިނުމަށް ހުޅަގުގެ ގައުމުތަކަށް ގޮވާލައްވާފައެވެ. އަދި ރަޝިއާގެ ތެލާއި ގޭސް ގަތުން ހުއްޓާލުމަށްވެސް ޒެލެންސްކީ ވަނީ ގޮވާލައްވާފައެވެ.
އެމެރިކާގެ ސެލެޓްރީ އޮފް ސްޓޭޓް އެންތަނީ ބްލިންކަން ވިދާޅުވެފައިވާ ގޮތުގައި ރަޝިއާގެ ގޭހާއި ތެޔޮ ގަތުން ހުއްޓާލުމާއި ގުޅޭގޮތުން އެމެރިކާއިން މިހާރުދަނީ ޔޫރަޕްގެ ގައުމުތަކާއެކީ މަޝްވަރާތައް ކުރަމުންނެވެ. އަދި ޔޫކުރެއިންއަށް ފައިޓަރޖެޓްތައް ފޯރުކޮށް ދިނުމުގެ ތައްޔާރީތައް މިހާރު ކުރިތަށްދާކަމަށްވެސް އެމެރިކާގެ ސަރުކާރުގެ އިސް ބައެއް ފަރާތްތަކާ ހަވާލާދީ ބައެއް މީޑިއާތަކުން ވަނީ ރިޕޯޓު ކޮށްފައެވެ.
