"ބާހޫބަލީ" އިން ބޮޑު މަގުބޫލުކަމެއް ހޯދި ސައުތުގެ ސުޕަރސްޓާ ޕްރަބާސް ވަރަށް އަވަހަށް ކައިވެނި ކުރާނެކަމަށް ބުނެފިއެވެ.
ޕްރަބާސް އަކީ ސައުތު އިންޑިއާގެ އެންމެ އަގުބޮޑު އަދި އެންމެ ޑިމާންޑް ބޮޑު ތަރިންގެ ތެރޭގައި ފާހަގަކޮށްލެވޭ ތަރިއެކެވެ. އޭނާއަކީ މިހާރު ސުޕަރސްޓާރުންގެ ދަރަޖާގައި ގުނާލެވޭ ތަރިއެކެވެ. މިއާއެކު އޭނާ ވަނީ 2019 ވަނަ އަހަރު ފިލްމް "ސާހޯ" އިން ބޮލީވުޑަށް ތައާރަފު ވެފައެވެ. އޭނާ މިހާރުވެސް ބޮލީވުޑްގެ ދެ ފިލްމެއްގެ މަސައްކަތް ވެސް އަންނަނީ ކުރަމުންނެވެ.
ޕްރަބާސްގެ ކުރިއަށް އޮތް ފިލްމު "ރާދޭ ޝިޔަމް" ގެ ޕްރޮމޯޝަން އިވެންޓެއްގައި ވާހަކަދައްކަމުން އޭނާ ބުނެފައިވަނީ ކައިވެނި ކުރުމަށް ވަރަށް ޕްރެޝަރުތަށް އަންނަ ކަމަށެވެ. އަދި މަންމަ އަބަދުވެސް ކައިވެނި ކުރުމަށް އެދެމުން އަންނަ ކަން ހާމަ ކުރަމުން އޭނާ ބުނެފައިވަނީ "ބާހޫބަލީ" އަށް ފަހު މީހަކާ އިންނާނެ ކަމަށް މަންމަ ގާތުގައި ބުނި ކަމަށެވެ.
އަދި މިހާތަނަށް މީޑިއާ އިން އޭނާގެ ލޯބިވެރިންގެ ނަންތައް ކިޔާފައިވަނީ ނުބައިކޮން ކަމަށާއި، މިހާދުވަހުވެސް ކައިވެނި ނުކުރެވި އޮތީ އެހެންވެގެން ކަމަށް ވެސް އޭނާ ބުނެފައި ވެއެވެ. ނަމަވެސް އޭނާގެ މަންމަ މިހާރު ހުރީ ދޫދޭ ގޮތަށް ނޫންކަމަށާއި އޭނާ މީހަކާ ދެވުމަށް މަންމަ ހުރީ ކަމަރު ބަނދެގެން ކަމަށްވެސް ވަނީ ބުނެފައެވެ.
މީގެ ދެއަހަރު ކުރިން ވެސް ޕްރަބާސް ކައިވެނި ކުރަން އުޅޭ ކަމަށް ވަނީ ބުނެފައެވެ. އޭރު ބުނެފައިވަނި އޭނާ ކައިވެނި ކުރަނީ އާއިލާއާ ގާތް ގުޅުމެއް އޮންނަ، އެމެރިކާގައި ދިރިއުޅޭ އިންޑިއާގެ ވިޔަފާވެރިއެއްގެ ދަރިއަކާ ކަމަށެވެ. އެކަމަކު އަންހެން ކުއްޖާގެ ނަމެއް ހާމައެއް ނުކުރެއެވެ.
މިހާރު އުމުރުން 42 އަަހަރުގެ ޕްރަބާސް އަކީ އަންހެން ކުދިންގެ މެދުގައި ވަރަށް މަގުބޫލު އެކްޓަރެކެވެ. އަދި ގިނަ ޒުވާނުންގެ ހިތުގެ ރާޖާވެސް މެއެވެ.
މިމަހުގެ 11 ގައި ރިލިޒް ކުރާ "ރާދޭ ޝިޔަމް" އަކީ ޕްރަބާސް އާއި ޕުޖާ ހޭގްޅޭގެ ރޮމޭންސް ވަރަށް ރަނގަޅަށް ދައްކުވައިދީފައިވާ ފިލްމެކެވެ.
