އެތަރި އޮއްސުނީ އަމިއްލަ އެދުން މާބޮޑަށް އިސްކޮށް، ޢާއިލާގެ ތެރޭގައި ހުރިހާކަމެއް ބާއްވަން ކުރި މަސައްކަތުން ކަމުގައި ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.

ޝައިޚު ޒައިދު މިހެން ވިދާޅުވީ ކުރީގެ ރައީސް މުހައްމަދު ނަޝީދަށް ނިސްބަތްކޮށް ކަމަށް ބެލެވެއެވެ. އެމްޑީޕީގެ ތެރޭގައި ޗެއާޕާސަންގެ އިންތިޚާބުގެ ފޯރިގަދަވެފައިވާއިރު، މިއިންތިޚާބަކީ އެމްޑީޕީގެ ރައީސް މުހައްމަދު ނަޝީދާއި، ރައީސް ޞާލިހާއިމެދު އޮތް ވާދަވެރިކަން ވަރަށް ބޮޑަށް ފެނިގެންދާ އިންތިޚާބެކެވެ.

މިއިންތިޚާބުގައި ރައީސް ނަޝީދަށް ތާއީދުކުރައްވާ ބޭފުޅުންގެ ތާއީދު އޮތީ އިންތިއަށެވެ. އަދި ރައީސް ޞާލިހަށް ތާއީދު ކުރައްވާ ބޭފުޅުންގެ ތާއީދު އޮތީ މިނިސްޓަރ ފައްޔާޟަށެވެ. ފައްޔާޟަކީ މިސަރުކާރުގެ ވަޒީރުންގެ ތެރެއިން ރައީސް ނަޝީދު ޝަކުވާ މީގެކުރިންވެސް އެންމެބޮޑަށް އޮތް ވަޒީރެވެ. ނަމަވެސް ރައީސް ޞާލިހުވަނީ ފައްޔާޟާއި މެދު ފުރިހަމަ އިތުބާރު އޮތްކަމަށް ވިދާޅުވެ، ފައްޔާޟު ދިފާއު ކުރައްވާފައެވެ.

ޝައިޚު ޒައިދު ވިދާޅުވީ މިއަދު އެތަރި އޮއްސިފައިވާކަމަށެވެ. މިހެން މިކަން ވާންޖެހުނު އެންމެބޮޑު އެއްސަބަބަކީ ވެރިކަމުގެ ބާރުތަކާއި، ޕާޓީގެ ބާރުތައްވެސް އަމިއްލަ ގޭގެ ތެރޭގައި ބޭއްވުމަށް ކުރެއްވި މަސައްކަތުންކަމަށް ވަރަށް ބޮޑަށް ބެލެވޭ ކަމަށެވެ. ކުރިން ރައީސް ނަޝީދަކީ ރާއްޖޭގެ ވަރަށް ބޮޑު ތާއީދެއް އޮތް ބޭފުޅެކެވެ. ނަމަވެސް މިއަދު އެމްޑީޕީ ތެރޭގައި އޮތް ވަދަވެރިކަމުގައި ރައީސް ނަޝީދުގެ ތާއީދު ކުޑަވެ ރައީސް ޞާލިހުގެ ތާއީދު ދަނީ އެމްޑީޕީ ތެރޭގައި ގަދަވަމުންނެވެ.

އެސަޕޯޓް މިހާރު ދެން އެއްވެސް ވަރަކަށް ނެތޭ ބުންޏަސް ދޮގަކަށް ނުވާނެ. އެ ތަރި މިހާރު އޮއްސިއްޖެ. މިހެން މިކަންވާން މެދުވެރިވީ ޢާއިލާތެރޭ ހުރިހާ ކަމެއް ބާއްވަން އުޅުއްވުމާ އަމިއްލަ އެދުންފުޅު މާބޮޑަށް ކުރިޔަށް ނެރުއްވުމުން ކަމަށް ވަރަށް ބޮޑަށް ބެލެވޭ. މިހުންނަނީ ބޮޑެތި ޢިބްރަތްތައް.

– އަލީ ޒައިދު ވިދާޅުވިއެވެ.

އެމްޑީޕީ ތެރޭގައި އޮތް ވާދަވެރިކަމަކީ ކުރިއަށް އޮތް ރިޔާސީ އިންތިޚާބުގައި އެމްޑީޕީގެ ޓިކެޓް ހޯދުމަށް ކުރަމުންދާ މަސައްކަތުގެ ބޮޅެއްކަމަށް މަސްރަހު ދިސާރާ ކުރައްވާ ފަރާތްތަކުން ދެކެއެވެ. އެމްޑީޕީގެ ޗެއާޕާސަންގެ މަޤާމު މިނިސްޓަރ ފައްޔާޟު ކާމިޔާބު ކުރައްވައިފިނަމަ، ރިޔާސީ ޓިކެޓް ހޯދުމަށް ރައީސް ޞާލިހަށް ވަރަށް ބޮޑަށް ފަސޭހަ ވެގެންދާނެކަމަށް ގިނަ ބަޔަކު ދެކެއެވެ.