ދުނިޔޭގެ އެންމެ ވަރުގަދަ އެއް ޓެކް ކުންފުނިކަމުގައިވާ މަޝްހޫރު އެޕްލް ކުންފުނިން ރަޝިއާގައި ކުރަމުން އަންނަ ހުރިހާ ވިޔަފާރިއެއް ހުއްޓުމަކަށް ގެނެސްފިއެވެ.
އެޕްލް ކުންފުނި ހިމެނިގެން ދިޔައީ، ރަޝިއާއިން ޔޫކުރެއިންއަށް އެރުމާއި ގުޅިގެން ދުނިޔޭގެ އެންމެ ބޮޑެތި ވިޔަފާރި ކުންފުނިތަކުން ރަޝިއާގައި ވިޔާފާރިކުރުން ހުއްޓުމަކަށް ގެންނަން ފަށާފައިވާ ކުންފުނިތަކުގެ ތެރެއިން، އެންމެ ފަހުން އެގައުމުގައި ވިޔަފާރި ކުރުން ހުއްޓާލި ކުންފުނި ކަމުގައެވެ.
އައިފޯނުގެ ޕްރޮޑަކްޓައް ދުނިޔޭގައި ވިއްކަމުންދާ މި ކުންފުނިން ބުނެފައިވާ ގޮތުގައި، ރަޝިއާގެ އަސްކަރިއްޔާއިން ޔޫކުރެއިންއަށް އަރާ އެގައުމަށް ދެމުންދާ ހަމަލާތަކާއި ގުޅިގެން އެކުންފުނިން ކަންބޮޑުވާ ކަމަށާއި، އަދި އެކުންފުނިވަނީ، މި ހަމަލާތަކުގައި އަނިޔާ ލިބެމުންދާ ޔޫކުރެއިންގެ ރައްޔިތުންނާ އެކީ ކަމަށެވެ.
އެޕްލް ކުންފުނިން ބުނެފައިވާ ގޮތުގައި، އެޕްލް ޕޭގެ ޚިދުމަތާއި އަދި އެޕްލް މެޕްގެ ޚިދުމަތްވެސް ރަޝިއާއަށް ލިބޭ މިންވަރު މިހާރު ވާނީ ދަށް ކުރެވިފައެވެ.
އެޕްލްއިން ރަޝިއާގައި ވިޔަފާރިކުރުން ހުއްޓާލާފައިވާއިރު، ގޫގުލްއިންވެސް ބުނެފައިވަނީ، އެކުންފުނިންވެސް ރަޝިއާ ސަރުކާރުން ފަންޑުކުރާ ޕަބްލިޝަރއެއް ކަމުގައިވާ RT ޓީވީ ނެޓްވާރކް ގޫގުލްގެ ހުރިހާ ފީޗަރތަކުން މިހާރު ނަގާފައިވާ ކަމުގައެވެ.
ރަޝިއާގެ ނިއުސް އޭޖެންސީއެއް ކަމުގައިވާ RIA ރިޕޯޓު ކޮށްފައިވާ ގޮތުގައި ރަޝިއާގައި ބޭނުން ކުރެވޭ މޯބައިލް ބޭންކިން އެޕްލިކޭޝަނެއް ކަމުގައިވާ VTB ބޭންކުގެ އެޕްލިކޭޝަން، އެޕްލްގެ އައިއޯއެސް ބޭނުންކުރާ ފޯނުތަކުގައި ބޭނުންކުރުން ވަރަށް އަވަހަށް ހުއްޓުމަކަށް އަންނާނެއެވެ.
އެޕްލްއިން ނެރުނު ބަޔާނުގައި ބުނެފައިވާ ގޮތުގައި އެޕްލް މެޕްގައި ވަގުތުން ގެނެސްދޭ ކަންކަމާއި އަދި ޓްރެފިކްގެ މައުލޫމާތު ޔޫކުރެއިންގައި މިހާރު ލިބެމުން ނުދާނެ ކަމުގައެވެ. އަދި މިއީ ޔޫކުރެއިން ރައްޔިތުންގެ ސަލާމަތަށްޓަކާ އެޅި ފިޔަވަޅެއް ކަމުގައިވެސް އެޕްލްއިން ބުނެފައި ވެއެވެ.
ހަގުރާމަ ފެށުނުފަހުން ގޫގުލްއިންވަނީ، ރަޝިއާގެ ސަރުކާރުން ފަންޑުކުރާ ކުންފުނިތަކަށް ގޫގުލްގެ އިސްތިހާރުކުރުމަށް ޔޫޓިއުބުގައި ބޭނުންކުރާ ބައެއް ޓޫލްތަކާއި ފީޗަރތައް ބޭނުން ނުކުރެވޭ ގޮތް ހަދާފައެވެ.
ރަޝިއާއިން ޔޫކުރެއިންއަށް އެރުމާއި ގުޅިގެން، ދުނިޔޭގެ ގިނަ ގައުމުތަކުންނާއި ބޮޑެތި ކުންފުނިތަކުން ދަނީ ރަޝިއާއި ދެކޮޅަށް ދަތިކުރުމުގެ ފިޔަވަޅުތައް އަޅަމުންނެވެ.
