އިދިކޮޅަށް ބަސް ބުނާ ކޮންމެ މީހަކު ރަހީނުކޮށް ހިލިހިލާ ޖަހައިގެން އަނިޔާ ކޮށްގެން އިންޑިއާ އައުޓް ހަރާކަތް ނުހުއްޓުވޭނެކަމަށް އިދިކޮޅު ޕްރޮގްރެސިވް ކޯލިޝަނުން ބުނެފިއެވެ.
ޢާންމު ތަނެއްގައި އިންޑިއާ އައުޓް ލިޔެގެން އިއްޔެ ހައްޔަރު ކުރި ށ. ފޭދޫގެ ޒުވާން 2 ކުދިން މިހާރުން މިހާރަށް ދޫކޮށްލުމަށް ސަރުކާރަށް ގޮވާލައި އިދިކޮޅުން ނެރުނު ބަޔާނުގައި ބުނެފައިވަނީ ރީނދޫ ކުލަ ލާފައިވާ ށ. ފޭދޫ ޢާންމު ތަނެއްގެ ފާރުގައި އިންޑިއާ އައުޓް ޖެހިކަމަށް ބުނެ، އިއްޔެގެ ވަގުތެއްގައި އެ ރަށު ޒުވާން 2 ކުއްޖަކު ހައްޔަރުކޮށް، ރޭ ހަތަރުދަމު ށ. ފުނަދޫ ޕޮލިސް ސްޓޭޝަނަށް ގައި ރަހީނުކޮށްފައި ބޭތިއްބުމަށްފަހު، މިއަދު ކޯޓަށް ގެންގޮސް އެ ކުދިންގެ ބަންދަށް 7 ދުވަސް ޖަހާފައިވާތީ، އެކަމުގެ ކަންބޮޑުވުން ފާޅުކޮށް، ސަރުކާރުގެ މިޢަމަލު އެންމެ ހަރުކަށި އިބާރާތުން ކުށްވެރިކުރާކަމަށެވެ.
ޕީޕީއެމުން ބުނެފައިވަނީ، ޢިމާރާތެއްގެ ފާރެއްގައި މާތްވެގެންވާ އިސްލާމް ދީނާއި ދިވެހި ޖުމްހޫރިއްޔާގެ ޤާނޫނުއަސާސީއާއި ޚިލާފު ނުވާ އެއްޗެއް ލިޔުން ނުވަތަ އެފަދަ ޝުޢޫރެއް ދުލާއި ގަލަމުން ފާޅުކުރުމަކީ ދިވެހިޖުމްހޫރިއްޔާއާއި ޤާނޫނުތައް ހުއްދަ ކުރާކަމެއްކަމަށެވެ. އަދި އެފަދަ ކަމެއް މަނާކުރާ އެއްވެސް ޤާނޫނެއް ނެތް އިރު، އެފަދަ ޝުޢޫރެއް ޢާންމު ތަނެއްގައި ބަޔަކު ލިޔުން އެއީ މުޖުތަމަޢުއަށް ހުރި ނުރައްކަލެއްގެ ގޮތުގައި ދެކި ހައްޔަރުކޮށް މުއްދަތު ޖަހާ ހިލިހިލާ ޖަހަގެން ގެންގުޅުން މިއީ އެއްވެސް ހާލެއްގައި ދިވެހި ރައްޔިތުން ބަލައިގަންނާނެ ކަމެއް ނޫންކަމަށެވެ.
އަދި މިފަދައިން ޒުވާނުންގެ ބަޔަކު ހައްޔަރުކޮށް މުއްދަތު ޖެހުމުން ދިވެހި ސަރުކާރު އިންޑިއާގެ އުނގަށް ވެއްޓިފައިވާ މިންވަރު އެދަނީ އިތުރަށް ހާމަވެ ފަލީހަތްވަމުން. އިންޑިއާ ސަރުކާރުން ބޭނުންހާ ގޮތެއްހަދާ، އިންޑިއާގެ އަސްކަރިއްޔާއަށް މިފަސްގަނޑުން ޖާގަދީ، ޤައުމުގެ އަގު ބޮޑެތި ހަޒާނާ އިންޑިއާއަށް ވިއްކާލައިގެން ތިބެ، އެ ފަރާތްތަކާއި އިދިކޮޅަށް ބަސް ބުނާ ކޮންމެ މީހަކު ރަހީނުކޮށް ހިލިހިލާ ޖަހައިގެން އަނިޔާ ކުރެވިދާނެ ކަމަށް އެމްޑިޕީއަށާއި އެމްޑީޕީގެ ސަރުކާރަށް ހީވުމަކީ ވަރަށް ބޮޑު ކުށްހީއެއް.
– ޕީޕީއެމްގެ ބަޔާނުގައި ބުނެފައިވެއެވެ.
އެހެންކަމުން ޢާންމު ތަނެއްގައި އިންޑިއާ އައުޓް ޖެހި ކަމަށް ބުނެ ހައްޔަރުކޮށްފައިވާ ށ. ފޭދޫ ޒުވާން 2 ކުދިން މިހާރުން މިހާރަށް ދޫކޮށްލުމަށް ދިވެހި ސަރުކާރަށް ވަނީ ގޮވާލާފައެވެ. އަދި މިމައްސަލަ އަވަސް މައްސަލައެއްގެ ގޮތުގައި ބައްލަވާ ފިޔަވަޅު އެޅުމަށް ހިޔުމަންރައިޓްސް ކޮމިޝަން އޮފް ދަ މޯލްޑިވްސްއަށްވެސް ވަނީ ގޮވާލާފައެވެ. ސަރުކާރުން ކުރާ ކޮންމެ ކަމެއްގައި ދިވެހިރާއްޖޭގައި ހުންނަ އިންޑިއާ އެމްބަސީގެ ހުއްދަ ހޯދަން ޖެހޭ ހިސާބަށް ޤައުމު ގޮސްފައިވާތީ ހިތާމަކުރާކަމަށްވެސް މިބަޔަނުގައި ވަނީ ބުނެފައެވެ.
ރާއްޖޭގެ އެކި ރަށްރަށުގައި މީހުން ދިރިއުޅޭ ގޭގޭގެ ފާރުގައައި، އެނޫން ތަންތަނުގައިވެސް "އިންޑިއާ އައުޓް" ޖެހުމަށް ޕީޕީއެމްގެ ރައީސް ޔާމީން ވަނީ ގޮވަލާފައެވެ.
