ރާއްޖޭގައި ވެރިކަންކުރެއްވި ބޭފުޅުންނަށް މިއަދު ދިމާވެގެން އުޅުއްވާކަމަކީ ހެޔޮއެދޭ އިޚްލާސްތެރިން ވަކިކުރަން ނޭނގުމުގެ ހިތި ނަތީޖާކަމަށް މޯލްޑިވްސް ޓްރޭޑް ޔޫނިއަންގެ ނާއިބު ރައީސް ސަޢުދުﷲ އަޙްމަދު ވިދާޅުވެއްޖެއެވެ. ސަޢުދު މިހެން ވިދާޅުވީ، ރައީސުލްޖުމްހޫރިއްޔާއަށް ޤާނޫނު އަސާސީން ލިބިދީފައިވާ ބާރުގެ ބޭނުން ކުރައްވަނީ ވަރަށް ސިޔާސީކޮށްކަމަށް ވިދާޅުވެ އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ ހިތްޕުޅު ހަމަޖެހިވަޑައިނުގެން ރައީސް ޞާލިހުވެސް އިންނަވާ ވަޓްސް އަޕް ގްރޫޕަކަށް މެސެޖެއް ފޮނުއްވާފައިވަނިކޮށެވެ.
ސަޢުދު ވިދާޅުވީ ރައީސް މައުމޫނަކީ 2008އާއި ހަމައަށް ބޮޑު ސިޔާސީ ލީޑަރެއްކަމަށެވެ. ނަމަވެސް މިއަދު އެމަނިކުފާނަކީ ތިންހާސް މީހުން ހަމަނުވާ ޕާޓީއެއްގެ ވެރިއެއްކަން ފާހަގަކުރައްވާ ސަޢުދު ވަނީ މާޒީން ފިލާވަޅު ދަސްކުރުން މުހިންމުކަމަށް ވިދާޅުވެފައެވެ.
Verikan kuri meehunah miadhu dhimaavegen ulhey kamakee heyo edhey ihulaastehreen vaki kuran neygumuge hithi natheejjaa.RM akee 2008ga bodu siyaasee leadereh miadhu 3k hama nuvaa party ehge veriyeh.maazeen filaavalhu dhaskurun muhinmu.@KhabaruOnline
— Saudulla Ahmed (@saudullaahmed1) February 28, 2022
ސަޢުދު ވިދާޅުވީ އާރާއި ބާރުގަ ތިބޭއިރު އިޚްލާސްތެރީން ނުފެންނާނެކަމަށާއި، ފެންނަނީ ނޭފަތާ ހަމަޔަށްކަމަށެވެ.
މާދަން މަޤާމު ގެއްލި އާރާއި ބާރު ދިޔައީމަ ދެން އެނގޭނީ އަދި ތިމަންނާއަށް މިކަންތައް ކުރެވުނީ ގޯސްކޮށްކަން. މީ ގިނަ މީހުންނަށް އަދި ވެރިކަންކުރި މީހުންނަށް ދިމާވެފައިހުރި ޙާލަތު.
– ޓްރޭޑް ޔޫނިއަންގެ ނާއިބު ރައީސް ސަޢުދުﷲ އަޙްމަދު ވިދާޅުވިއެވެ.
Aaraai baaruga thibey iru ihulaasthereen nufehnaane.fehnaanee neyfathaa hamayah.maadhan maqaam gelli aaraai baaru dhiyaeema dhen engeynee adhi thimahnaa ah mikanthah kurevunee goas koh kan.mee gina meehunah adhi verikan kuri meehunah dhimaavefa huri haalath.@KhabaruOnline
— Saudulla Ahmed (@saudullaahmed1) February 28, 2022
ސަޢުދު މިހެން ވިދާޅުވެފައިވާއިރު، އެމްޑީޕީގެ ޤައުމީ މަޖިލީހަށް ރައީސް ނަޝީދު ފޮނުއްވި މެސެޖުގައި ވިދާޅުވެފައިވަނީ ޤާނޫނު އަސާސީގެ 115 ވަނަ މާއްދާގެ ބޭނުން ރައީސް ޞާލިހު ކުރައްވަމުން ގެންދަވަނީ ވަރަށް ސިޔާސީ ގޮތަކަށް ކަމުގައެވެ. ޤާނޫނު އަސާސީގެ 115 ވަނަ މާއްދާގެ ދަށުން ރައީސުލްޖުމްހޫރިއްޔާއަށް ދައުލަތް ހިންގުމުގެ ބޮޑެތި ބާރުތަކެއް ލިބިދީފައެވެ. ރައީސް ނަޝީދު ވިދާޅުވީ ރައީސް ޞާލިހު މިބާރުތަކުގެ ބޭނުން ކުރަމުންދަނީ ސިޔާސީ ގޮތަކަށް ކަމުގައެވެ.
ރައީސުލްޖުމްހޫރިއްޔާ ޤާނޫނު އަސާސީގެ 115 ވަނަ މާއްދާ މި ބޭނުން ކުރައްވަނީ ވަރަށް ސިޔާސީކޮށް. ރައީސުލްޖުމްހޫރިއްޔާއަށް ދަންނަވަން، އެމްޑީޕީގެ އެތެރޭގެ އިންތިޚާބާއި ދިމާކޮށް، ޕާޓީން މަޤާމު ތަކުގައި ތިއްބަވާ ބޭފުޅުން ވަކިކޮށްގެން، ނުވާނެ. ވަކި ކުރަނީނަމަ އަޅުގަނޑުވެސް ވަކި ކުރައްވާ.
– ރައީސް ނަޝީދު ވިދާޅުވިއެވެ.
ރައީސް ނަޝީދު މިފަދައިން ވިދާޅުވީ ކުރިއަށް އޮތް އެމްޑީޕީގެ އެތެރޭގެ އިންތިޚާބުގައި ސަރުކާރުގެ ވަޒީފާތަކުގައި ތިބި އެމްޑީޕީގެ މެމްބަރުންނަށާއި، ސިޔާސީ މަޤާމުތައް ފުރުއްވާ އެމްޑީޕީގެ ބޭފުޅުންނަށް ވަކި ގޮތަކަށް ތާއީދު ކުރުމަށް މަސައްކަތް ކުރަމުންދާކަމަށް ބައެއް ފަރާތްތަކުން ތުހުމަތު ކުރަމުންދާ ވަގުތެއްގައެވެ.
މިއިންތިޚާބުގައި ޗެއާޕާސަންގެ މަޤާމަށް ވާދަކުރައްވާ މިނިސްޓަރ ފައްޔާޒު އިސްލާއި، އިމްތިޔާޒު ފަހުމީގެ މެދުގައި އޮތް ސިޔާސީ ވާދަވެރިކަމަކީ ރައީސް ޞާލިހާއި، ރައީސް ނަޝީދުގެ ސިޔާސީ ވާދަވެރިކަމެއްކަމަށް ގިނަ ބަޔަކު ދަނީ ބުނަމުންނެވެ. އަދި މިއިންތިޚާބަކީ ކުރިއަށް އޮތް 2023 ވަނަ އަހަރުގެ ރިޔާސީ އިންތިޚާބުގައި އެމްޑީޕީން ނެރޭނެ ކެނޑިޑޭޓެއް ސާފުވެގެންދާނެ އިންތިޚާބެއްކަމަށްވެސް ގިނަ ބަޔަކު ދެކެއެވެ.
