ރަޝިޔާއިން ޔޫކްރެއިންއަށް ހުއްޓުމެއްނެތި ދެމުންދާ ހަމަލާތަކަށް ސާބިތުވެ، ޔޫކްރެއިންގެ ރައީސް ޒެލެންސްކީ ދައްކަވާ ހިތްވަރަށް ރައްޔިތުންގެ ރައީސް މުހައްމަދު ނަޝީދު ތަޢުރީފް ކުރައްވައިފިއެވެ.

ރަޝިއާ ސިފައިން ޔޫކުރެއިންއަށް އަރާ، އެގައުމުގެ ވެރިރަށް ކީވް ހިފުމަށް، އެސިޓީއަށް މިހާރު ހަމަލާ ދޭން ފަށާފައިވާއިރު، އެގައުމު ދޫކޮށް ދިއުމަށް އެމެރިކާއިން ޔޫކުރެއިންގެ ރައީސް ޒެލެންސްކިއަށް ދިން ދައުވަތު ގަބޫލު ނުކޮށް އަބުރާ ރައްދުކޮށްފައިވާ ކަމަށް އެމެރިކާގެ މީޑިއާތަކުން ރިޕޯޓުތައް ވަނީ ބުނެފައެވެ.

ޔޫކްރެއިންގެ ރައީސް މިހާލަތުގައިވެސް ދައްކަވަމުންދާ ހިތްވަރަށް ތަޢުރީފް ކުރައްވައި ރައީސް ނަޝީދު ވިދާޅުވީ، ޔޫކްރެއިންގެ ރައްޔިތުންގެ ހައްގުގައި ޒެލެންސްކީ ދައްކަވަމުންދާ ސާބިތުކަމަށް ތަޢުރީފް ހައްގުކަމަށެވެ. މިއީ ރާއްޖޭގެ ސިޔާސީ އިސްބޭފުޅަކު މިހނގުރާމާގައި ޔުކްރައިނަށް ހިތްވަރުދީ ކުރެއްވި ފުރަތަމަ ޓުވީޓުކަންވެސް ފާހަކަކޮށްލެވެއެވެ.

Impossible not to be impressed by the bravery of Ukrainian President Zelenskyy @ZelenskyyUa, standing strong in the face of aggression ???????? ????????

— Mohamed Nasheed (@MohamedNasheed) February 26, 2022

އެމެރިކާގެ ވޮޝިންގޓަން ޕޯސްޓުންވެސް، ޔޫކުރެއިންއާއި އެމެރިކާގެ އޮފިޝަލުންނާ ހަވާލާދީ ރިޕޯޓު ކޮށްފައިވާ ގޮތުގައި، ޔޫކުރެއިން ދޫކޮށް ދިއުމަށް ޒެލެންސްކީއަށް އެހީތެރިކަން ފޯރުކޮށްދިނުމަށް އެމެރިކާ އޮތީ ތައްޔާރަށެވެ. ރަޝިއާއިން ޔޫކުރެއިންއަށް ދެމުންދާ އުދުވާންއާއި ދެކޮޅަށް ޒެލެންސްކީ ދައްކަވާފައިވާ ހިތްވަރަށް ސޯޝަލް މީޑިއާގައިވަނީ އޭނާއަށް ގިނަބަޔަކު ތައުރީފް ކޮށްފައެވެ.

ޒެލެންސްކީވަނީ، އޭނާ ގައުމު ދޫކޮށް ފިލާފައި ނުވާކަން ޔަގީން ކޮށްދިނުމުގެ ގޮތުން، މިހަފްތާގެ ހުކުރު ދުވަހު، އަރިސް ބޭފުޅުންނާއެކު ވެރިރަށުގައި ކޮށްފައިވާ ވީޑިއޯއެއް ފޭސްބުކުގައި އާންމު ކޮށްފައެވެ. ރަޝިއާ ސިފައިން ޔޫކުރެއިންއަށް އަރާ އެގައުމުގެ ވެރިރަށް ހިފުމަށް ހަމަލާ ދެމުންދާތާ 3 ވަނަ ދުވަހަށް އަލިވިލިފައިވާ ވާއިރު، ރަޝިއާ ސިފައިން މިހާރު ވަނީ އެގައުމުގެ ވެރިރަށް ކީވްގެ ބޯޑަރާއި ހަމައަށް ވާސިލްވެ، ވެރިރަށަށް ހަމަލާ ދޭން ފަށާފައެވެ.

ޔޫކުރެއިންގެ އަސްކަރިއްޔާއިން ބުނުފައިވަނީ، ވެރިރަށް ކީވްގެ ހުޅަނގުން އެ ސިޓީއަށް ވަނުމަށް މަސައްކަތް ކޮށްފައިވާ ޔަޝިއާ ޓޭންކުތަކުގެ ފައުޖަކަށް ހަމަލާދީ ޓޭންކުތައް ގޮއްވާލާފައި ވާކަމަށެވެ. ޔޫކުރެއިންގެ މިލިޓަރީ ލޯ އެންފޯރސްމަންޓް ސާރވިސް އޮފް ޔޫކުރެއިން ބުނެފައިވަނީ ކީވްގެ ބެރެސްޓެއިސްކާ ޑިސްޓްރިކްޓްގައި ހަރަކާތްތެރިވަމުން ދިޔަ "އިސްތިއުމާރީ ބާރުގެ ހަގުރާމަތީ ސާމާނުގެ ގާފިލާއެއް" ހަލާކު ކޮށްލާފައި ވާކަމުގައެވެ.