ޔޫކުރެއިންއަށް އުދުވާނީ ހަމަލާދީ، އެގައުމުގެ ވެރިރަށް ކީވް ހިފުމަށް ހަނގުރާމަ ކުރަމުންދާ ރަޝިއާގެ ފައުޖުތައް ވެރިރަށަށް އެރުމާއި ގުޅިގެން، ވެރިރަށުގެ މަގުތަކުގައި ޔޫކުރެއިން ސިފައިންނާއި ރަޝިއާ ސިފައިންނާ ދެމެދު ހަގުރާމަ ފެށިއްޖެމަކަށް ބައިނަލްއަގުވާމި މީޑިއާތަކުން ރިޕޯޓު ކޮށްފިއެވެ.
ޔޫކުރެއިންގެ ވެރިރަށް ރަޝިއާ ސިފައިން ވަދެގެންފައިވަނީ އިއްޔެއާއި ރޭ ކީވް ހިފުމަށް އެގައުމުން ދެމުންދިޔަ ވަރުގަދަ ހަމަލާތަކަށް ޔޫކުރެއިންގެ އަސްކަރިއްޔާއިން ދިން ވަރުގަދަ ރައްދު ހަމަލާތަކަށްފަހުއެވެ. އަދި ވަކީން ޚާއްސަކޮށް ކީވްގެ ދެކުނުން އެ ސިޓީއަށް ވަދެގަތުމަށް މަސައްކަތް ކުރަމުންދާ ރަޝިއާގެ ފައުޖުތަކަށް ޔޫކުރެއިން ސިފައިން އަދިވެސް ވަރުގަދައަށް ރައްދު ހަމަލާ ދެމުންދާކަމަށްވެސް މީޑިއާތަކުން ދަނީ ރިޕޯޓު ކުރަމުންނެވެ.
ޔޫކުރެއިންގެ ފައުޖުތަކުން އެގައުމުގެ ސަރުކާރުކާރު ވައްޓާލުމަށްވެސް ރަޝިއާގެ ރައީސް ލާޑިމިރު ޕުޓިންވަނީ ގޮވާލައްވާފައެވެ. އެހެންނަމަވެސް ޔޫކުރެއިންގެ ރައީސް ޒެލެންސްކީ ވަނީ އަމާން ނުދެއްވާނެކަމަށް ވިދާޅުވެ، މަގުތަކަށް ނިކުމެ ރަޝިއާގެ ފައުޖުތަކާއި ހަގުރާމަ ކުރުމަށް އެގައުމުގެ ރައްޔިތުންނަށް ގޮވާލައްވާފައެވެ.
ޔޫކުރެއިންގެ ރަސްމީ ފަރާތްތަކުން ބުނެފައިވާ ގޮތުގައި ރަޝިއާގެ ހަމަލާތަކުގައި މިހާތަނަށް 198 އާންމުން ވަނީ މަރުވެފައެވެ. މީގެ ތެރޭގައި 3 ކުޑަކުދިންވެސް ހިމެނޭއިރު، މިހާތަނަށް އައިއިރު ރަޝިއާގެ ހަމަލާތަކުގައި 1115 މީހުން ޒަޚަމް ވެފައިވާކަމަށްވެސް ޔޫކުރެއިން ބުނެފައި ވެއެވެ.
ރަޝިއާ ސިފައިން ޔޫކުރެއިންގެ ވެރިރަށް ކީވް ހިފުމަށް، އެސިޓީއަށް ވަދެގެންފައި ވާއިރު، ޔޫކުރެއިން ދޫކޮށް ދިއުމަށް ޔޫކުރެއިންގެ ރައީސް ޒެލެންސްކިއަށް އެމެރިކާއިން ދިން ދައުވަތު ގަބޫލު ނުކޮށް އޭނާ އަބުރާ ރައްދުކޮށްފައިވާ ކަމަށް އެމެރިކާގެ މީޑިއާތަކުން ވަނި ރިޕޯޓު ކޮށްފައެވެ.
"ހަގުރާމަ މިއޮތީ މިތާގަ. އަހަރެން ބޭނުމީ ހަތިޔާރު، ފިލައިގެން ދާކަށް ނޫން" ޒެލެންސްކީ ވިދާޅުވެފައިވާކަމަށް ހުޅަނގުގެ މީޑިއާތަކުން ރިޕޯޓު ކޮށްފައި ވެއެވެ.
އެގައުމު ދޫކޮށް އެމެރިކާއަށް ދިއުމަށް ވޮޝިންގޓަން ދިން ދައުވަތު ގަބޫލު ނުކުރައްވާ ޔޫކުރެއިންގެ ރައީސް ޒެލެންސްކީ ވިދާޅުވިކަމަށް، މައުލޫމާތު އެނގިހުރި އެމެރިކާގެ އިންޓެލިޖަންސް އޮފިޝަލަކާ ހަވާލާދީ އެސޯޝިއޭޓް ޕްރެސްއިން ރިޕޯޓު ކޮށްފައި ވެއެވެ.
އެމެރިކާގެ ވޮޝިންގޓަން ޕޯސްޓުންވެސް، ޔޫކުރެއިންއާއި އެމެރިކާގެ އޮފިޝަލުންނާ ހަވާލާދީ ރިޕޯޓު ކޮށްފައިވާ ގޮތުގައި، ޔޫކުރެއިން ދޫކޮށް ދިއުމަށް ޒެލެންސްކީއަށް އެހީތެރިކަން ފޯރުކޮށްދިނުމަށް އެމެރިކާ އޮތީ ތައްޔާރަށެވެ.
ރަޝިއާއިން ޔޫކުރެއިންއަށް ދެމުންދާ އުދުވާންއާއި ދެކޮޅަށް ޒެލެންސްކީ ދައްކަވާފައިވާ ހިތްވަރަށް ސޯޝަލް މީޑިއާގައިވަނީ އޭނާއަށް ގިނަބަޔަކު ތައުރީފް ކޮށްފައެވެ.
ކުރިން، ހެއްވާ މަޖާބައި ކުޅެމުންއައި ފިލްމީ ތަރިއެއް ކަމުގައިވާ ޒެލެންސްކީ މިހާތަނަށް ވިދާޅުވަމުން ގެންދަވާފައިވަނީ، އެންމެ ފަހު ނޭވައާއި ހަމައަށްވެސް ރަޝިއާއާއި ދެކޮޅަށް ހަގުރާމަ ކުރައްވާނެ ކަމަށެވެ.
ޒެލެންސްކީވަނީ، އޭނާ ގައުމު ދޫކޮށް ފިލާފައި ނުވާކަން ޔަގީން ކޮށްދިނުމުގެ ގޮތުން، މިހަފްތާގެ ހުކުރު ދުވަހު، އަރިސް ބޭފުޅުންނާއެކު ވެރިރަށުގައި ކޮށްފައިވާ ވީޑިއޯއެއް ފޭސްބުކުގައި އާންމު ކޮށްފައެވެ.
"އަރެމެން މިތިބީ މިތަނުގައި،" ޒެލެންސްކީ ވިދާޅުވެފައި ވެއެވެ. "އަހަރެމެން ތިބޭނީ މި ގޮތުގައި".
