ބޮލީވުޑްގެ މަގުބޫލު އެކްޓަރު އަމީތާބް ބައްޗަންގެ ކުރިއަށް އޮތް ފިލްމު "ޖުންދު"ގެ ޓްރެއިލާ ދައްކާލައިފިއެވެ.
މި ފިލްމަކީ ސްޕޯޓް ޑްރާމާއެކެވެ. މިއީ ހަގީގީ ދިރިއުޅުމުގެ ހަޔާތުނާމާއެއް ދައްކުވައިދޭނެ ފިލްމެކެވެ. މި ފިލްމުގައި ދައްކައިދޭނީ އިންޑިއާގެ ނާގްޕޫރަށް ނިސްބަތްވާ "ސްލަމް ސޮކާ ޖަމްއިއްޔާ"ގެ މުއައްސިސް ވިޖޭ ބަރްސޭގެ ހަޔާތެވެ.
މި ފިލްމުގައި އަމިތާބު ފެނިގެން ދާނީ ޕްރޮފެސަރ ވިޖޭ ބަރްސޭގެ ރޯލުންނެވެ. އަދި މި ފިލްމަކީ ފަގީރު އަވަށެއްގައި ދިރިއުޅޭ ކުދިންތަކަކަށް، އެކުދިންގެ ދިރިއުޅުމުގެ މަޤްޞަދު އަންގައިދީ އެކުދިންނަށް ފުޓްބޯޅަ ޓީމެއް އުފައްދައިދިނުމަށް ޕްރޮފެސަރަކު ކުރާ މަސައްކަތްތައް ދައްކުވައިދޭ ފިލްމެކެވެ.
އަންނަ މަހުގެ 4 ވަނަ ދުވަހުގައި ރިލީޒް ކުރުމަށް ތާވަލް ކޮށްފައިވާ މި ފިލްމުން މުޖުތަމަޢަށް މުހިންމު މެސެޖެއް ދެއެވެ. އެގޮތުން، މަގުމަތީގައި ޒުވާނުން ބިތްޖެހިފައި، ކުރާނެ ކަމެއް ނެތި ތިބޭ ތިބުމުގެ ޒިންމާ އެކުދިންނެކޭ އެއްވަރަށް މުޖުތަމަޢުން ނަގަން ޖެހޭކަން އަންގައިދެއެވެ.
