އެވަޓަންގެ ކީން ޕީއެސްޖީ އަަށް

އެވަޓަނަށް ކުޅެމުން އަންނަ މޮއިސް ކީން ޕީއެސްޖީއަށް ސޮއިކޮށްފިއެވެ.

އުމުރުން 20 އަހަރުގެ ފޯވާޑް ޕީއެސްޖީއާ ގުޅުނީ ލޯނު އެއްބަސްވުމެއްގެ ދަށުން މި ސީޒަނުގެ ނިޔަލަށެވެ.

ޕީއެސްޖީން ކީންގެ ސޮއި ހޯދިއިރު، އޭނާ އެންމެ ފުރަތަމަ ވިދާލީ ޔުވެންޓަސްއިންނެވެ. ޔުވެންޓަސްއަށް ކުޅެދިން 21 މެޗުގައި އަށް ލަނޑު ޖެހި ކީން ވަނީ އެ ޓީމާއެކު އިޓާލިއަން ލީގު ދެ ފަހަރު އަދި އިޓާލިއަން ކަޕް ކާމިޔާބުކޮށްފައެވެ.

ކީން އެވަޓަންއާއި ގުޅުނީ ފަސް އަހަރުގެ އެއްބަސްވުމެއްގެ ދަށުން 27.5 މިލިޔަން ޔޫރޯއަށެވެ. އެކަމަކު އެވަޓަންގައި އޭނާއަށް އެންމެ އެދެވޭ ކުޅުމެއް ދެއްކިފައެއް ނުވެއެވެ. އެގޮތުން މިހާތަނަށް އެވަޓަނަށް ކުޅެދިން 37 މެޗުގައި ކީންއަށް ކާމިޔާބުކުރެވިފައިވަނީ އެންމެ ހަތަރު ލަނޑެވެ.

ލޯނު އުސޫލުން ޕީއެސްޖީން ކީންގެ ސޮއި ހޯދިއިރު، އެ ޓީމުން މި ޓްރާންސްފާ ބާޒާރުގައި ވަނީ ލޯނު އެއްބަސްވުމެއްގެ ދަށުން ރޯމާއަށް ކުޅެމުން އައި އިޓަލީގެ ޑިފެންޑަރު އަލެސަންދްރޯ ފްލޮރެންޒީ އާއި ޕޯޓޯއަށް ކުޅެމުން އައި ޕޯޗުގަލުގެ މިޑްފީލްޑަރު ޑެނީލޯ ޕެރޭރާގެ ސޮއިވެސް ހޯދާފައެވެ.