އިނގިރޭސި ރާނީ ކޯވިޑް19 އަށް ޕޮޒިޓިވް ވެއްޖެއެވެ.
އިނގިރޭސި ޝާހީ ގަޑުވަރުން ބުނެފައިވަނި، ރާނީގެ ކިބައިން ފެންނަމުން ދަނީ، ވަރަށް އާދައިގެ އަލާމާތްތަކެއް ކަމަށާއި، އަދި އާދައިގެ ޒިންމާތައް ކުރިޔަށް އޮތް ހަފްތާތަކުގައި އަދާކުރައްވަމުން ގެންދިއުމަށް ހަމަޖެހިފައި ވާކަމަށެވެ.
"ރާނީ ފަރުވާ ހޯއްދަވަމުން ގެންދަވާއިރު، ގައިޑްލައިންތަކަށް ފުރިހަމަޔަށް އަމަލް ކުރައްވަމުން ގެންދަވާނެ،" ބަކިންހަމް ޕެލަސްއިން ނެރެފައިވާ ބަޔާނުގައި ބުނެފައި ވެއެވެ.
މިހާރު އުމުރުން 95 އަހަރުގެ ރާނީ ވަނީ ފާއިތުވެދިޔަ ހަފްތާގައި ކޯވިޑަށް ޕޮޒިޓިވް ވެފައިވާ، ރާނިއަށްފަހު އިނގިރޭސި ރަސްކަމަށް ވަޑައިގަންނަވާނޭ، ވަލީ އަހުދު ޕްރިންސް ޗާރލްސްއާއި ކޮންޓެކްޓް ވެފައެވެ.
އަދި ބައެއް މީޑިއާތަކުން ރިޕޯޓު ކޮށްފައިވާ ގޮތުގައި، ރާނީ ދިރިއުޅުއްވަމުން ގެންދަވާ ވިންޑްސަރ ކާސަލްގެ ގިނަ މުވައްޒިފުންވެސް ވަނީ ކޯވިޑަށް ޕޮޒިޓިވް ވެފައެވެ.
ރާނީ ކޯވިޑަށް ޕޮޒިޓިވް ވެފައި މިވަނީ، އިނގިރޭސިވިލާތުގައި އެންމެ ދިގު މުއްދަތަކަށް ރަނިކަން ކުރެއްވި ބޭފުޅަކަށް ރާނީ ވެވަޑައިތްތާ މަދު ހަފްތާތަކެއްގެ ތެރޭގައެވެ. ރާނީ ވަނީ އެކަމަނާގެ ރަނިކަމަށް 70 އަހަރު ފުރުމުގެ އަލިމަސް ޔޫބީލް މި ފެބްރުއަރީމަހުގެ 6ވަނަ ދުވަހު ފާހަގަ ކުރައްވާފައެވެ.
ރާނީ ކޯވިޑްގެ ފުރަތަމަ ވެކްސިން ޖަހާފައިވަނީ 2021ވަނަ އަހަރުގެ ޖެނުއަރީމަހުގެ 9 ވަނަ ދުވަހުއެވެ.
އިނގިރޭސި ވަލީ އަހުދު ޕްރިންސް ޗާރލްސްގެ އަނބި ކަނބަލުން، ޑަޗެސް އޮފް ކޯންވެލް ވަނީ، ޗާރލްސް ޕޮޒިޓިވް ވިތާ ކުޑަ ދުވަސްކޮޅެއް ފަހުން ކޯވިޑަށް ޕޮޒިޓިވް ވެފައެވެ. މިއީ ޗާރލްސްގެ އަނބިކަނބަލުން ޑަޗެސް ކޯވިޑަށް ޕޮޒިޓިވް ވީ ފުރަތަމަ ފަހަރެވެ. އަދި ޗާރލްސް ކޯވިޑަށް ޕޮޒިޓިވް ވީ ދެވަނަ ފަހަރެވެ.
