އއ. މަތިވެރި އެސޯސިއޭޝަން ފޯރ ރެކްރިއޭޝަން އެންޑް ސްޕޯޓްސް (މާރންސް) ގެ މާރންސް ސްޕޯޓްސް އެކަޑަމީ ރަސްމީކޮށް އިފްތިތާޙްކޮށްފިއެވެ.

މަތިވެރި ފުޓްސަލް ދަނޑުގައި ބޭއްވި ހާއްސަ ރަސްމިއްޔާތެއްގައި މާރންސް ސްޕޯޓްސް އެކަޑަމީ އިފްތިތާޙްކޮށްދެއްވީ، 2008 ވަނަ އަހަރު ސާފް ޗެމްޕިއަންޝިޕް ފުޓުބޯޅަ މުބާރާތް ރާއްޖެއަށް ކާމިޔާބުކޮށްދިން ކެޕްޓަން އައްސަދު އަބްދުލްޣަނީއާއި، ރާއްޖޭގައި އުފެދުނު އެންމެ މޮޅު ކުޅުންތެރިޔާ އަލީ އަޝްފާޤު (ދަނގަޑޭގެ) އިތުރުން ރާއްޖޭގެ އެންމެ ބާރު ދުވުން ތެރިޔާ ހަސަން ސާއިދުއެވެ.

އެކަޑަމީ އިފްތިތާޙު ކުރުމަށް ބޭއްވި މި ރަސްމިއްޔާތުގައި ވާހަކަ ދައްކަވަމުން މާރންސް ޖަމިއްޔާގެ ރައީސް އިސްމާއީލް ނަސީމް ވިދާޅުވީ، ދެމެހެއްޓެނިވި ގޮތެއްގައި އެކަޑަމީ ހިންގުމަށް ގިނަ މަސައްކަތްތަކެއް ކުރުމަށް ނިންމާފައިވާ ކަމަށެވެ. އެގޮތުން މަތިވެރީގައި ޒުވާން ހުނަރުވެރި ކުޅުންތެރިންތަކެއް އުފެއްދުމަށް ހުރިހާ އެންމެން ގުޅިގެން މަސައްކަތް ކުރުމަކީ އެންމެ މުހިންމު ކަންތައް ކަމުގައި އޭނާ ފާހަގަކުރެއްވިއެވެ.

އިސްމާއީލް ނަސީމް އިތުރަށް ވިދާޅުވީ، މާރންސް ޖަމިއްޔާ އުފެއްދުމަށް އެ ޖަމިއްޔާގެ އެންމެހާ މެންބަރުންގެ ފަރާތުން ލިބިގެންދިޔަ އެއްބާރުލުމަށް ޝުކުރު ދަންނަވާ ކަމަށެވެ. އަދި ކުރިއަށް އޮތް ތަނުގައި ޖަމިއްޔާގެ ފަރާތުން ރަށުގެ ތަރައްގީއާއި، ޒުވާނުން ބާރުވެރި ކުރުމަށް ގަދައަޅާ މަސައްކަތް ކުރާނެ ކަމަށް އޭނާ ވިދާޅުވިއެވެ.

މި ރަސްމިއްޔާތުގެ ޝަރަފްވެރި މެހެމާން އައްސަދު އަބްދުލްޣަނީ ވާހަކަ ދައްކަވަމުން އެކަޑަމީގެ ކުދިންނާ މުޚާތަބުކޮށް ވިދާޅުވީ، މޮޅު ކުޅުންތެރިއަކަށް ވުމަށްޓަކައި ގަދަ އަޅާ މަސައްކަތްކުރަންޖެހޭ ކަމަށާއި، އެގޮތުން ދީނީ ކަންތައްތަކަށް ފަރުވާ ބަހައްޓައި ގަވައިދުން ފަރިތަކުރުންތަކުގައި ބައިވެރިވާންޖެހޭ ކަމަށެވެ. އަލީ އަޝްފާގު މިސާލުން ރާއްޖޭގެ އެންމެ މޮޅު ކުޅުންތެރިއާއަށް ވުމަށް އެދޭނަމަ ގަދަ އަޅާ މަސައްކަތްކޮށް ކޯޗުންނާއި މައިންބަފައިންގެ ނަސޭހަތް ހެޔޮކޮށް ހިތުމަށްވެސް އައްސަދު ވަނީ ކުދިންގެ ކިބައިން އެދިފައެވެ.

މާރންސް އެކަޑަމީ ރަސްމީކޮށް އިފްތިތާހުކުރުމަށް ބޭއްވި މި ރަސްމިއްޔާތުގައި ވަނީ އެކަޑަމީގައި ބޭނުންކުރާ ބޯޅައިގައި ސޮއިކުރުމުގެ ހާއްސަ ހަރަކާތެއްވެސް ގެންގޮސްފައެވެ. އެކަޑަމީ ރަސްމީކޮށް އިފްތިތާޙްކުރި މި ރަސްމިއްޔާތުގައި މަތިވެރިއަށް އުފަން މުހައްމަދު އިމްރާންވެސް ވަނީ އެރަށުގައި ރަނގަޅު ފެންވަރުގެ ކީޕަރުން އުފެއްދުމަށް ހާއްސަ މަސައްކަތެއް ކުރާނެކަން ފާހަގަކޮށް، އެރަށުން 10 ކީޕަރަކު މުޅިން އަލަށް ރާއްޖޭގެ ފުޓުބޯޅައަށް ނެރެދޭނެކަމަށް ބުނެފައެވެ.

މިރަސްމިއްޔާތުގައި ވަނީ މަތިވެރީގައި މިހާތަނަށް އުފެދުނު އެންމެ އިތުބާރު އަދި އެންމެ ދުވަސްވީ ގޯލު ކީޕަރު (އއ. މަތިވެރި / ފީރޯޒުގެ އަހުމަދު ފިރާގު)ގެ އަގު ވަޒަންކޮށް ހާއްސަ ހަނދާނީ ފިލާއެއް އަރުވާފައެވެ. މި ފިލާ ހަވާލުކޮށްދެއްވީ ރާއްޖޭގައި މިހާތަނަށް އުފެދުނު އެންމެ މޮޅު ފުޓުބޯޅަ ކުޅުންތެރިޔާ އަލީ އަޝްފާގުއެވެ.

އިމްރާން އަކީ ރާއްޖޭގެ ފުރަތަމަ ޑިވިޝަންގެ ވެލެންސިޔާ، މާޒިޔާ، ވިކްޓްރީ، ޓީސީ އަދި މިލަންދޫ ޓީމަށްވެސް ކުޅެފައިވާ ގޯލު ކީޕަރެކެވެ. މީގެ އިތުރުން އޭނާ ވަނީ 2019 ވަނަ އަހަރާއި ހަމައަށް ރާއްޖޭގެ ސީނިއަރ ގައުމީ ފުޓުބޯޅަ ޓީމުގެ ދެވަނަ ގޯލު ކީޕަރުގެ މަގާމުވެސް އަދާކޮށްފައެވެ. މި ރަސްމިއްޔާތު ނިމިގެންދިޔައީ ސިމްބޮލިކްސް ރެކޯޑްސް އިން ތައްޔާރުކޮށްފައިވާ މާރންސް ޖަމިއްޔާގެ ހާއްސަ ލަވަޔާއެކުއެވެ.

އއ.މަތިވެތީ މާންސް ޖަމްއިއްޔާއަކީ އެރަށުގެ ތަރައްޤީއަށާއި، ރަށުގެ އިޖުތިމާއީ ކަންކަމުގައި އިސްނަގައިގެން ހަރަކާތްތެރިވާ ޖަމްއިއްޔާއެކެވެ. ރަށުގައިި ހިންގޭ އެކިއެކި މަސައްކަތްތަކުގައާއި، ހިންގޭ އެކި މުބާރާތްތަކާއި، އާންމު ފަރުދުންނާއި ގުޅުންހުރި ގިނަ ކަންކަމުގައި މާންސް ޖަމްއިއްޔާއިން ގެންދަނީ ބައިވެރިވަމުންނެވެ.