ކޯވިޑްގެ ސަބަބުން ބޮޑެތި ތަރިންގެ ފިލްމުތައް ސިނަމާއަށް ގެނައުމަށް ވަނީ ގިނަ ދަތިތަކާ ކުރިމަތިވެފައެވެ. ބައެއް ފިލްމު ޕްރޮޑިއުސަރުން ބޭނުންވަނީ ފިލްމުތައް ސީދާ ތިއޭޓަރުގައި އެޅުވުމަށެވެ. އެހެން ކަމުން ފިލްމުތައް އެޅުވުމަށް ތާރީހެއް ނުލިބި ވަނީ ތޮއްޖެހިފައެވެ.
ނަމަވެސް ޝާހިދު ކަޕޫރުގެ ފޭނުންނަށް އޮތީ އުފާވެރި ޚަބަރެކެވެ. ޝާހިދުގެ ސްޕޯސްޓް ޑަރާމާ "ޖާޒީ"އަށް މިވަނީ ތާރީހެއް ލިބިފައެވެ. މި ފިލްމުން ޝާހިދާއެކު ފެނިގެން ދާނީ މުރުނާލް ޓާކުރެވެ.
ގިނަ ދުވަސްތަކެއްގެ އިންތިޒާރަށް ފަހު މި ފިލްމު މިހާރު ވަނީ މި އަހަރުގެ އެޕްރިލް 14 ވަަނަ ދުވަހު ރިލީޒް ކުރުމަށް ތާވަލް ކޮށްފައެވެ.
މި ފިލްމަކީ 2019 ވަނަ އަހަރު ހަމަ އެ ނަމުގައި ގެނެސްދިން ތެލެގޫ ފިލްމުގެ ރިމޭކެކެވެ. ތެލަގޫ ފިލްމު ވެސް ޑައިރެކްޓްކުރި ގޯތަމް ތިއްނަނޫރީ ޑައިރެކްޓްކޮށްފައިވާ މި ފިލްމުގައި ޝާހިދު ފެންނާނީ އުމުރުން 30 އަހަރުން މަތިވުމުންވެސް އަލުން ކުޅުމަށް އެނބުރިއަންނަ ކްރިކެޓް ކުޅުންތެރިއެއްގެ ރޯލުންނެވެ.
ނޮވެމްބަރު މަހު އާންމުކުރި މި ފިލްމުގެ ޓްރެއިލާ އިން ފިލްމުގެ އަސަރުގަދަކަން ހާމަވެއެވެ.
މީގެ ކުރިން ވަނީ ފިލްމުގެ ޕްރޮމޯޝަން ތަކެއް ވެސް ޖައްސާފައެވެ. ނަމަވެސް އިންޑިއާގައި ކޯވިޑްގެ ހާލަތު ގޯސްވުމާއެކު ފިލްމު އެޅުވުން ފަސްކުރީއެވެ. ކޯވިޑްގެ ސަބަބުން ޑިޖިޓަލް ޕްލެޓް ފޯމްތަކުގައިވެސް އަންނަނީ ގިނަ ފިލްމު ތަކެއް ރިލީޒް ކުރަމުންނެވެ.
ކޮމެންޓު ފޮނުވާ