ބޮލީވުޑްގެ ފިލްމްތަކުން ބެލުންތެރިންގެ ހިތް ފަތަހަ ކޮށްފައިވާ އިނގިރޭސި ވިލާތަށް ނިސްބަތްވާ އެކްޓްރެސް އެމީ ޖެކްސަން ލޯބީގެ ގޮތުން މިހާރު ގުޅިގެން އުޅެނީ އިނގިރޭސި އެކްޓަރު އެޑް ވެސްޓްވިކްއާ ކަމަށް މީޑިއާ ތަކުން ބުނެފިއެވެ.
އެޑް މަޝްހޫރު ވެގެން ގޮސްފައިވަނީ "ގޮސިޕް ގާލް" ޑްރާމާއިންނެވެ. މި ޑްރާމާގެ އެއް ލީޑް އެކްޓަރު އެޑް އާއެކު އެމީ ޑޭޓް ކުރަމުން ދާތާ އަދި މާގިނަ ދުވަސް ނުވާ ކަމަށް ވެސް ރިޕޯޓްތައް ބުނެއެވެ.
އެމީ ވަނީ ވިޔަފާރިވެރިއެއް ކަމުގައިވާ ޖޯޖް ޕެންޔަޓީއާ 2015 ވަނަ އަހަރު އެންގޭޖް ވެފައެވެ. އަދި މިދެމީހުންނަށް ވަނީ ފިރިހެން ކުއްޖަކުވެސް ލިބިފައިއެވެ. އެއީ 2019 ވަނަ އަހަރުއެވެ.
ނަމަވެސް މީގެ ދެތިން މަހެއް ކުރިން ފެށިގެން ޖޯޖް އާއި އެމީގެ ގުޅުން ރަނގަޅު ނޫންކަމަށް މީޑިއާތަކުން ވަނީ ބުނެފައެވެ. އަދި މިކަމުގެ ހެއްކަކީ އޭނާގެ އިންސްޓަގްރާމުން ޖޯޖް އާއި އެކު ހުރި ފޮޓޯތައް ޑިލީޑް ކޮއްލުން ކަމަށް ވެސް ވަނީ ބުނެފައެވެ. އަދި 2021 ވަނަ އަހަރު ދެމީހުން ވަކިވެފައި ވާކަމަށްވެސް ވަނީ ބުނެފައެވެ.
އެޑް އާއި އެމީ ބައްދަލުވީ ސައުދީ އަރަބިޔާގެ ރެޑް ސީ އިންޓަނޭޝަނަލް ފިލްމް ފެސްޓިވަލުން މިދިއަ ޑިސެމްބަރު މަހުއެވެ. އަދި އެއަށްފަހު ދެމީހުންގެ ގުޅުން ބަދަހިވެ ލޮތްބަށް ބަދަލުވެފައި ވާކަމަށް ރިޕޯޓްތައް ބުނެއެވެ.
