ކްރިމިނަލް ކޯޓަށް މަދުވާ ވަސީލަތްތައް ހޯދުމަށް ދަުލަތުން މިދިޔަ އަހަރު ބޮޑު ބަޖެޓެއް ދިނުމުންވެސް، އެ ވަސީލަތްތައް ހޯދާފައި ނުވާކަން ހާމަވެއްޖެއެވެ.
ކްރިމިނަލް ކޯޓުގައި ޝަރީޢަތްތައް ހިންގުމަށް ބޭނުންވާ ބައެއް ވަސީލަތްތައް ނެތުމުން، އެ ވަސީލަތްތައް ހޯދުމަށް މިދިޔަ އަހަރު ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)އިން އަށް ލައްކަ ރުފިޔާގެ ބަޖެޓެއް ދިނެވެ. ނަމަވެސް މިދިޔަ އަހަރު ނިމުނު އިރުވެސް އެ ކޯޓަށް އެއިން އެއްވެސް ވަސީލަތެއް ހޯދިފައެއް ނުވެއެވެ.
މިދިޔަ އަހަރު ކްރިމިނަލް ކޯޓަށް ހަތަރު ލައްކަ ރުފިޔާގެ އައިޓީ ސާމާނު ހޯދުމަށް ބިޑަށް ހުޅުވާލިއެވެ. ނަމަވެސް ބިޑް ކޮމިޓީގެ ބައްދަލުވުންތައް ނުބޭއްވި އެއްވެސް ވަސީލަތެއް މިދިޔަ އަހަރު ހޯދިފައެއް ނުވެއެވެ.
ކްރިމިނަލް ކޯޓްގެ ތަފާސް ހިސާބުތައް ދައްކާގޮތުން މިދިޔަ އަހަރު އެކޯޓަށް ރަނގަޅު ޕާރފޯމެންސްއެއް ދެއްކިފައެއް ނުވެއެވެ. އެގޮތުން 2020 ވަނަ އަހަރު ނިމި 2021 ވަނަ އަހަރު ފެށުނު އިރު 1732 މައްސަލަ އެކޯޓްގައި ނުނިމި އޮތްއިރު، މިދިޔަ އަހަރުގެ ތެރޭގައި 773 މައްސަލައެއް އަލަށް އެ ކޯޓަށް ހުށައަޅާފައިވެއެވެ. ނަމަވެސް އެކޯޓަށް މިދިޔަ އަހަރު ނިނމިފައިވަނީ 701 މައްސަލައެވެ. 1800އަށް ވުރެ ގިނަ މައްސަލަ ނުނިމި ކޯޓްގައި އެބައޮތެވެ.
މިދިޔަ އަހަރު ކްރިމިނަލް ކޯޓުގެ ޝަރީޢަތަށް ބޭނުންވާ ވަސީލަތްތައް ހޯދުމަށް ފައިސާ ދިން ނަމަވެސް އެފައިސާއިން ވަސީލަތްތައް ހަމަކޮށްފައި ނުވާކަން ހާމަވެފައި މިވަނީ، އެމްއެމްޕީއާރުސީގެ ކޮރަޕްޝަންގެ މައްސަލާގައި ދައުވާ އުފުލާފައިވާ ކުރީގެ ރައީސް ޔާމީންގެ ޝަރީޢަތް ލައިވް ކޮށްދިނުމަށް އެމަނިކުފާނުގެ ފަރާތްޕުޅުން ކޯޓްގައި އެދިފައި ވަނިކޮށެވެ. ނަމަވެސް ކޯޓުން ވަނީ މިހާތަަނށް އެ ޝަރީޢަތް ލައިވް ކުރެވޭނެ ވަސީލަތް ނެތްކަމަށް ބުނެ ލައިވް ނުކުރެވޭނެކަމަށް ބުނެފައެވެ.
