އެމްޑީޕީގެ ޗެއާޕާސަންގެ މަޤާމުގައި ފާއިތުވެދިޔަ ފަސް އަހަރު ހުންނެވި އަލްއުސްތާޛު ޙަސަން ލަޠީފް އެމްޑީޕީން ބޭނުންވި ހުރިހާ ކާމިޔާބީއެއް ހާސިލް ކޮށްދެއްވާފައިވާކަމަށް އެމްޑީޕީން ބުނެފިއެވެ.
ދިވެހިރައްޔިތުންގެ ޑިމޮކްރެޓިކް ޕާރޓީ (އެމް.ޑީ.ޕީ.) ގެ ޗެއާޕާރސަންކަމުގެ 5 އަހަރުގެ ދައުރު ފުރިހަމަކޮށްދެއްވައި، އެ މުއްދަތުގައި އެމްޑީއަށް ކޮށްދެއްވި އަގުހުރި ޚިދުމަތްތަކަށް އަލްއުސްތާޛު ޙަސަން ލަޠީފަށް އިޚްލާޞްތެރިކަމާއެކު އެމްޑީޕީން ވަނީ ޝުކު އަދާކޮށްފައެވެ. ހަސަންގެ މަޤާމުގެ ދައުރު ހަމަވީ މިއަދަށެވެ.
އަލްއުސްތާޛު ޙަސަން ލަޠީފް ޗެއާޕާރސަންކަމުގެ މަޤާމަށް އިންތިޚާބުވެވަޑައިގަތުމާއެކު އެ މަޤާމާ ޙަވާލުވެވަޑައިގެންފައިވަނީ 12 ފެބްރުއަރީ 2017 ވަނަ ދުވަހުގައެވެ. ހަސަނަކީ މި ޕާރޓީގެ ޗެއާޕާރސަންކަމުގެ 5 އަހަރު ދުވަހުގެ މުއްދަތު މިހާތަނަށް އެއްކޮށް ފުރިހަމަކުރެއްވި ހަމައެކަނި ބޭފުޅާއެވެ.
އެމްޑީޕީން ބުނެފައިވަނީ އެޕާރޓީގެ އިދާރީ ހިންގުމުގެ އެންމެ އިސް ފަރާތެއްގެ ގޮތުގައި ހުންނަވައި، ފާއިތުވެދިޔަ ފަސް އަހަރުގެ ތެރޭގައި އިދާރީ ހިންގުމަށް ގިނަގުނަ ހެޔޮ ބަދަލުތަކެއް އެމަނިކުފާނު ގެންނަވާފައިވާކަމަށެވެ. އިދާރީ މަޤާމުތަކުގައި ތިއްބަވާ މުވައްޒަފުންގެ މެދުގައި މަޞްލަޙަތު ހިފެހެއްޓެވުމަށް އަދާކުރެއްވި ޒިންމާއިން ފެށިގެން ޕާރޓީގެ އެކިއެކި ގުނަންތައް ވަރުގަދަކުރެއްވުމާއި މެމްބަރޝިޕް އިތުރުކުރެއްވުމާއި ދިވެހިރާއްޖޭގައި އޮތް އެންމެ ބޮޑު ސިޔާސީ ޕާރޓީގެ ގޮތުގައި އެމްޑީޕީ ނަގަހައްޓަވައި ދެއްވާފައިވާކަމަށް އެމްޑީޕީން ވަނީ ބުނެފައެވެ.
މިދިއަ ސަރުކާރުގެ ޚުދުމުޚުތާރު އަނިޔާވެރިކަމުގެ ތެރޭގައި ވެސް މި ޕާރޓީ ރުކުރުވާލައި، ސިޔާސީ ޙަރަކާތްތައް އެންމެ މަތީ ދަރަޖައަކަށް އިންތިޒާމްކޮށްދެއްވައި ސާބިތުކަން ހިފަހައްޓަވާ ދެއްވުމުގައި ޗެއާޕާރސަންގެ ހައިސިއްޔަތުން އެމަނިކުފާނު ލީޑަރޝިޕް ދައްކުވައިދެއްވާފަ. އަދި އަލްއުސްތާޛު ޙަސަން ލަޠީފުގެ ޗެއާޕާރސަންކަމުގެ ދަށުން، މި ޕާރޓީގެ އެންމެ މުހިއްމު އެއް މަޤުޞަދުކަމުގައިވާ އެކިއެކި ޤައުމީ އިންތިޚާބުތަކަށް މި ޕާރޓީގެ ފަރާތުން ވާދަކޮށް ހުރިހާ އިންތިޚާބެއް މި ޕާރޓީއަށް ކާމިޔާބުކޮށް ދެއްވާފައިވާކަން ފާހަގަކުރަން.
– އެމްޑީޕީން ބުނެފައިވެއެވެ.
އެމްޑީޕީގެ ޗެއާޕާސަން ކަމުގައި ހަސަންގެ ފަސް އަހަރުގެ ދައުރު މިއަދަށް ހަމަވުމާއި ގުޅިގެން އިންތިޚާބަށް ކުރިމަތިލުމުގެ ފުރުސަތު މިއަދު ހުޅުވާލާނެއެވެ. އަދި މިއިންތިޚާބު އޭޕްރީ 16 ވަނަ ދުވަހު ބޭއްވުމަށް ވަނީ ނިންމާފައެވެ.
