މުޅި ދުނިޔޭގައިވެސް ބޮޑު މަގުބޫލު ކަމެއް ހޯދި ކާޓޫން "ޓޮމް އެންޑް ޖެރީ"ގެ ފުރަތަމަ އެޕިސޯޑް ރިލީޒް ކުރިތާ 82 އަހަރު ވެއްޖެއެވެ.
މިއީ ކުޑަކުދިންގެ އިތުރުން ބޮޑެތިމީހުން މެދުގައި ވެސް ވަރަށް މަގުބޫލު، ބަލައި ފޫހި ނުވާ ކާޓޫނެކެވެ. ނެރޭޝަނެއް ނެތް މި ކާޓޫނަށް 82 އަހަރު ފުރުނު އިރު، މި ކާޓޫން ގައި ދައްކުވައިދެނީ ބުޅަލަކާއި މީދަލެއްގެ ހައިޖާނު ގަނޑެކެވެ.
ޓޮމް އާއި ޖެރީ އެކަކު އަނެކަކަށް ދޭ ލަނޑުތަކުން މީހުން ހެއްވާލާ މި ކާޓޫން ވެފައި ވަނީ އެފަދަ ދެވަނައެއް ނުވާ އެއްޗަކަށެވެ.
1940 ވަނަ އަހަރުގެ ފެބްރުވަރީ މަހުގެ 10 ވަނަ ދުވަހު ފުރަތަމަ އެޕިސޯޑު ރިލީޒް ކުރި މި ކާޓޫނަކީ ކުދި ބޮޑު އަދި ދުވަސް ވީ މީހުންވެސް ދަންނަ ކާޓޫނެކެވެ.
ވިލިއަމް ހަންނާއާއި ޖޯސެފް ބަރބެރާ އުފައްދާފައިވާ މި ކާޓޫނުގެ ފުރަތަމަ އެޕިސޯޑުގައި ކާޓޫނަށް ފުރަތަމަ ދިން ނަމަކީ "ޖެސްޕަ އެންޑް ޖިންކްސް"އެވެ.
