ރައްޔިތުންގެ މެޖޯރިޓީ ނޫނެކޭ ބުނާ މީހަކަށް ވެރިކަމުގައި ހުރެވިގެން ނުވާނެކަމަށް ވިދާޅުވެ ހިތަދޫ މެދު ދާއިރާގެ ކުރީގެ މެމްބަރު އިބްރާހީމް ދީދީ ރައީސް ނަޝީދަށް ފާޑުވިދާޅުވެއްޖެއެވެ.
ރާއްޖޭގައި ވެރިކަމުގެ ނިޒާމް މިހާރު އޮންނަގޮތުން އެއްވެސް ޕާޓީއަކަށް ނުވަތަ ކެނޑިޑޭޓަކަށް 50 އިންސައްތައަށްވުރެ މަތިން ވޯޓް ނުލިބޭނަމަ ވެރިކަމަކަށް ނާދެވޭނެއެވެ. އެހެންކަމުން އިންތިޚާބުގެ %30 ވޯޓް ލިބުމުން ވެރިކަމަށް އާދެވޭގޮތަށް ޤާނޫނު އަސާސީއަށް އިޞްލާހު ގެނައުމަށް އެމްޑީޕީ ޤައުމި މަޖިލީހަށް އެޕާޓީގެ ރައީސް މުޙައްމަދު ނަޝީދު ވަނީ ރޭ ހުށައަޅުއްވާފައެވެ.
ރައީސް ނަޝީދުގެ އެ ހުށައެޅުއްވުމަށް ފާޑުވިދާޅުވެ އިބްރާހީމް މުޙައްމަދު ދީދީ ވިދާޅުވީ، ޤާނޫނޫ އަސާސީގައި އޮތީ ވެރިކަމުގެ ބާރުތައް ފެށިގެން އަންނަނީ ރައްޔިތުންގެ ކިބައިންކަމަށާއި، ވެރިކަން ދެމި އޮންނާނީވެސް އެގޮތުގައިކަމަށެވެ. އެހެންކަމުން އިންތިޚާބުގެ %30 އެއީ ރައްޔިތުންގެ މެޖޯރިޓީއެއް ނޫންކަމަށާއި، %70 ނޫނެކޭ ބުނާ މީހަކަށް ވެރިކަމުގައި ހުރެވިގެން ނުވާނެކަމަށް އިބްރާހީމް މުޙައްމަދު ދީދީ ވިދާޅުވިއެވެ.
ޤާނޫނޫ އަސާސީގައި އޮތީ ވެރިކަމުގެ ބާރުތައް ފެށިގެން އަންނަނީ ރައްޔިތުންގެ ކިބައިންކަމަށް. އަދި ދެމި އޮންނާނީވެސް އެގޮތުގައިކަމަށް. %30 އެއީ ރައްޔިތުންގެ މެޖޯރިޓީއެއް ނޫން. %70 ނޫނެކޭ ބުނާ މީހެއް ނޫން ވެރިކަމުގައި ހުންނަން ވާނީ.
– އިބްރާހީމް މުޙައްމަދު ދީދީ
ރިޔާސީ އިންތިހާބެއްގައި އެންމެ ގިނަ ވޯޓް ކާމިޔާބު ކުރާ މީހަކު ވެރިކަމަށް ގެންނަގޮތަށް ގާނޫނު އަސާސީ އަށް ބަދަލު ގެންނަން ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ހުށައެޅުއްވީ ރޭ އޮތް އެމްޑީޕީ ޤައުމީ މަޖިލީހަށެވެ.
ރައީސް ނަޝީދުގެ ހުށައެޅުއްވުމުގައި ވަނީ ރިޔާސީ އިންތިހާބުގައި ވާދަކުރާ ކެންޑިޑޭޓުންގެ ތެރެއިން އެންމެ ގިނަ ވޯޓު ލިބޭ ކެންޑިޑޭޓަކީ ޖުމްލަ ވޯޓުގެ 30 އިންސައްތަ އަށްވުރެ މަދު ނޫން އަދަދަކަށް ވޯޓު ހޯދާފައިވާ ކެންޑިޑޭޓެއް ނަމަ، ދެ ވަނަ ބުރަކަށް ނުގޮސް އެ ކެންޑިޑޭޓަކީ މޮޅުވި ކެންޑިޑޭޓެއްގެ ގޮތުގައި ކަނޑައެޅުމަށް ކޮންގްރެެސް އިން ނިންމުމަށެވެ. މިފަދައިން ކަނޑައެޅުމުން އެއްވެސް ކެންޑިޑޭޓަކަށް 30 އިންސައްތަ ވޯޓު ނުލިބިއްޖެނަމަ، އެންމެ ގިނަ ވޯޓު ހޯދާ ކެންޑިޑޭޓުންގެ މެދުގައި ދެވަނަ ބުރަކަަށް ގޮސް، ދެވަނަ ބުރުގައި އެންމެ ގިނަ ވޯޓު ލިބޭ ކެންޑިޑޭޓަކީ މޮޅުވި ކެންޑިޑޭޓުގެ ގޮތުގައިވެސް ގާނޫނު އަސާސީގައި ކަނޑައެޅުމަށެވެ.
ރައީސް ނަޝީދުގެ މި ހުށައެޅުއްވުމާއެކު އެމްޑީޕީގައި އިސްކޮށް ކުރިން ހަރަކާތްތެރިވެވަޑައިގެންނެވި ބޭފުޅުން އަންނަނީ ނަޝީދުގެ އެ ހުށައެޅުމަށް ފާޑުވިދާޅުވަމުންނެވެ.
ކޮމެންޓު ފޮނުވާ