އެމްޑީޕީގެ ޗެއަރޕާސަން ކަމުގެ މަޤާމަށް ކުރިމަތިލެއްވުމުގެ ޝަޢުޤުވެރިކަމެއް މިވަގުތު ނެތްކަމަށް އދ.ގެ އާންމު މަޖިލީހުގެ ރައީސް އަދި ރާއްޖޭގެ ފޮރިން މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ.
އެމްޑީޕީގެ ޗެއަރޕާސަންގެ މަޤާމު ހަމަވީ މިއަދުއެވެ. ފަސް އަހަރު ދުވަހަށް އެމްޑީޕީގެ ޗެއަރޕާސަން އައްޔަންކުރާނެ ތާރީޚެއް ކަނޑައެޅުމަށް މިރޭ އެމްޑީޕީގެ ޤައުމީ މަޖިލީހުގެ ޖަލްސާއެއް ބޭއްވުމަށް ވަނީ ނިންމާފައެވެ. މިހާތަނަށް ޗެއަރޕާސަންގެ މަޤާމުގައި ހުންނެވީ ހެންވޭރު ހުޅަނގު ދާއިރާގެ މެންބަރު ޙަސަން ލަޠީފްއެވެ.
އެމްޑީޕީގެ ޗެއަރޕާސަންގެ މަޤާމަށް ކުރިމަތިލައްވާކަން މިހާތަަނަށް އިއުލާންކޮށްފައިވަނީ އިކޮނޮމިކް މިނިސްޓަރ ފައްޔާޟް އިސްމާޢީލާއި، އެސްޓީސއޯގެ މެނޭޖިންގ ޑިރެކްޓަރ ޙުސައިން ޢަމްރު ރަޝާދުއެވެ. މީގެ އިތުރުން ފޮރިން މިނިސްޓަރ ޢަބްދުﷲ ޝާހިދުވެސް ކުރިމަތިލައްވަން ޝަޢުގުވެރިވެވަޑައިގަންނަވާކަމުގެ އަޑުތަކެއް ވަނީ ފެތުރިފައެވެ.
ނަމަވެސް ޝާހިދު ވަނީ އެކަން ދޮގުކުރައްވާފައެވެ. ޝާހިދު ވިދާޅުވީ އިތުރު މަޤާމަކަށް ކުރިމަތިލެއްވުމުގެ ޝަޢުޤެއް މިވަގުތު ނެތްކަމަށެވެ. އަދި އެމްޑީޕީގެ ޗެއަރޕާސަން ކަމުގެ މަޤާމަށް ކުރިމަތި ނުލައްވާނެކަމަށްވެސް ޝާހިދު ވިދާޅުވިއެވެ.
އެމްޑީޕީގެ އަސާސީގަވާއިދުގައި ބުނެފައިވަނީ، އިންތިޚާބު ބޭއްވުމުގެ 60 ދުވަސްކުރިން އެއިންތިޚާބަކަށް ވާދަކުރުމުގެ ފުރުސަތު ގުޅުވާލައި، ކެމްޕެއިން ކުރުމުގެ ފުރުސަތު ދޭންވާނެކަމަށެވެ.
