ފީފާ ކްލަބް ވަރލްޑް ކަޕްގެ ފައިނަލަށް ޗެލްސީ ދަތުރުކޮށްފިއެވެ.
ޗެލްސީ މި މުބާރާތުގެ ފައިނަލަށް ދަތުރުކުރީ ސެމީ ފައިނަލްގައި އޭއެފްސީ ޗެމްޕިއަންސް ލީގު އެންމެ ފަހުން ކާމިޔާބުކުރި ސައުދީ އަރަބިއާގެ އަލް ހިލާލްގެ މައްޗަށް ކުރި ހޯދައިގެންނެވެ.
ޔުނައިޓެޑް އަރަބް އެމިރޭޓްސް (ޔޫއޭއީ) ގައި މިރޭ ކުޅުނު މެޗު ޗެލްސީން ކާމިޔާބުކުރީ 0-1 ގެ ނަތީޖާއަކުންނެވެ.
މި މެޗުގައި ޗެލްސީން ޖެހި ހަމައެކަނި ލަނޑު މެޗުގެ ފުރަތަމަ ހާފުގައި އެޓީމަށް ކާމިޔާބުކޮށްދިނީ، ރުމެލޫ ލުކާކޫއެވެ. ޗެލްސީގެ ކައި ހަވާޓްޒް ނަގައިދިން ހުރަސް އަލް އަހްލީގެ ކުޅުންތެރިއެއްގެ ބޮލުގައި ޖެހިފައި ވެއްޓުނު ބޯޅަ ލުކާކޫ ވަނީ އެއް ފަހަރުން ޖަހައި ގޯލަށް ވައްދާލާފައެވެ.
ކްލަބް ވަރލްޑް ކަޕްގެ ފައިނަލުގައި ޗެލްސީ ވާދަކުރަން ޖެހޭނީ ސެމީ ފައިނަލުގެ ފުރަތަމަ މެޗުގައި އެފްރިކާގެ ޗެމްޕިއަން އަލް އަހްލީގެ މައްޗަށް ކުރި ހޯދި ސައުތު އެމެރިކާގެ ޗެމްޕިއަން ޓީމު، ބްރެޒިލްގެ ޕަލްމެއިރާސްއެވެ.
ކްލަބް ވަރލްޑް ކަޕްގެ ފައިނަލަށް 2012 ވަނަ އަހަރުވެސް ޗެލްސީ ވަނީ ދަތުރުކޮށްފައެވެ. ނަމަވެސް އެފަހަރުގެ ފައިނަލުގައި ބްރެޒިލްގެ ކޮރިންތިއަންސްއާ ވާދަކޮށް 0-1 އިން ޗެލްސީ ވަނީ ބަލިވެފައެވެ.
ޗެލްސީ އާއި ޕަލްމެއިރާސް ވާދަކުރާ މި މުބާރާތުގެ ފައިނަލް މެޗު އޮންނާނީ އަންނަ ހޮނިހިރު ދުވަހުގެ ރޭ ރާއްޖެ ގަޑިން 9:30 ގައެވެ.
