ކޮމަންޑޫ ދާއިރާގެ ބައި-އިލެކްޝަންގައި އެމްޑީޕީގެ ކެނޑިޑޭޓް ރާޝިދަށް ވޯޓު ނުދީފިނަމަ ވަޒީފާއިން ވަކިކުރާނެކަމުގެ އިންޒާރުދީ ނުފޫޒް ފޯރުވި ފެނަކައިގެ މުވައްޒިފުގެ ދިފާއުގައި ނަޝީދު ނިކުންނެވުމުން، އެމްޑީޕީގެ ތިލަފަތް ބަރުވެފައިވަނީ އަނިޔާވެރިކަމަށް ކަން އިތުރަށް ސާފުވެފައިވާކަަމުގައި ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.
ނިމުނު ކޮމަންޑޫ ދާއިރާގެ އިންތިޚާބުގައި އެމްޑީޕީގެ ކެނޑިޑޭޓް ރާޑޯއަށް ވޯޓު ނުދީފިނަމަ ވަޒީފާއިން ވަކިކުރާނެކަމުގެ އިންޒާރު ފެނަކަ މުވައްޒިފުންނަށް ދިން އެ ކުންފުނީގެ ލޮޖިސްޓިކްސް ޑިޕާޓްމަންޓުގެ އިސްވެރިއެއްގެ ގޮތުގައި ހުންނެވި ޒާހިރު އުސްމާން (ސުކުނާ)، ފެނަކަ ކުންފުނީގެ ބައެއް މުވައްޒަފުންނަށް ބިރު ދައްކާފައިވާކަމަށް ބުނާ އޮޑިއޯއެއް ވަނީ ލީކްވެފައެވެ.
މިއޯޑިއޯ މިއަދު މަޖިލީހަށް ނައިފަރު ދާއިރާގެ މެމްބަރު އަހުމަދު ޝިޔާމް އިއްވުމުން ނަޝީދުވަނީ ނުފޫޒު ފޯރުވުމަށް ވާހަކަ ދެއްކެވި މީހާ ދިފާއުކުރައްވައި ވާހަކަ ދައްކަވާފައެވެ. ނަމަވެސް އެމްޑީޕީގެ ސޯޝަލް މީޑިއާ އެކްޓިވިސްޓުންނާއި، މަޖިލިސް މެމްބަރުންވެސް ދަނީ އެނާ ވަޒީފާއިން ވަކި ކުރުމަށް ގޮވާލަމުންނެވެ.
ނަޝީދުގެ ވާހަކަތަކާއި ގުޅިގެން ދީނީ އިލްމުވެރިޔާ ޝައިޚު އަލީ ޒައިދު ވިދާޅުވީ އެމްޑީޕީއަށް ވޯޓު ނުދީފިނަމަ ވަޒީފާއިން ކަނޑާ ވައްޓާލާނެކަމަށް ބުނި މީހާގެ ދިފާއުގައި ނަޝީދު ނިކުންނެވުމުން، އެމްޑީޕީގެ އިންސާފު އޮތީ ކިހިނެތްކަން ހާމަވާކަމަށެވެ. ނަޝީދުގެ ވާހަކަތަކުން އެމްޑީޕީގެ އިންސާފުގެ ތިލަފަތް އޮތީ އަނިޔާވެރިކަމަށް ބަރުވެފައިކަން ރައްޔިތުންނަށް އިތުރަށް ސާބިތުވެފައިވާކަމަށް ޒައިދު ވިދާޅުވިއެވެ.
އެމްޑީޕީ އަށް ވޯޓްހޯދުމަށް މުވައްޒަފުންނަށް ބިރުދައްކައި "ކަނޑާ ވައްޓާލާނެ" ކަމަށްބުނި ފެނަކަ ބޭފުޅާ ދިފާޢުކޮށް އެމްޑީޕީގެ ބައެއް އިސްފަރާތްތައް މިދައްކާވާހަކައިން ތިލަފަތް އޮތީ އަނިޔާވެރިކަމަށް ބަރުވެފައިކަން ރައްޔިތުންނަށް އިތުރަށް ސާބިތުވެއްޖެއެވެ. ޢަދުލު އިންސާފު ކޮބާހެއްޔެވެ؟!
– ޝައިޚު އަލީ ޒައިދު ވިދާޅުވިއެވެ.
މި އޯޑިއޯ މަޖިލީހުގައި އިއްވުމަށް ނައިފަރު ދާއިރާގެ މެންބަރު އަޙްމަދު ޝިޔާމް އެދިވަޑައިގަތެވެ. މިއާއެކު މަޖިލީހުގެ އެއްވެސް މެމްބަރަކު އިއުތިރާޒު ނުކުރައްވާ ނަމަ އޯޑިއޯ މަޖިލީހުގައި އިއްވުމުގެ ހުއްދަ ދެވިދާނެ ކަމަށް ނަޝިދު ވިދާޅުވެ އެ ހުއްދަ ދެއްވިއެވެ. އަދި ޝިޔާމްގެ މައިކްގައި ފޯނު ޖައްސަވައިގެން މުޅި މަޖިލީހަށް އޯޑިއޯ އިއްވެވިއެވެ. އެ އޯޑިއޯ އެއްވަވާ ޝިޔާމް ވަނީ އެއީ އިންސާނުން އިންސާނުންނާ މުއާމަލާތުކޮށް ވާހަކަ ދައްކަން ޖެހޭ ގޮތެއް ނޫން ކަމަށާއި އެ މައްސަލަ ބަލަން މަޖިލީހުގެ ކޮމިޓީތަކަށް ހުށަހަޅުއްވާނެ ކަމަށް ވިދާޅުވެފައެވެ.
ޝިޔާމް އެ އޯޑިއޯގެ ވަކި ހިސާބަކަށް ދިއުމުން، ޝިޔާމްގެ މައިކްގެ އަޑު ކަނޑާލެއްވުމަށް ފަހު، ނަޝީދު ވިދާޅުވީ ވަޒީފާ އިން ވަކިނުކުރާނެ ކަމާއި ނުފޫޒު ނުފޯރުވާ ކަމަށް އޯޑިއޯގެ ކުރީކޮޅު ސާފުކޮށް ބުނާކަމަށެވެ.
ނަޝީދު ވިދާޅުވީ، ޒާހިރަކީ ކޮމަންޑޫ ވޯޓު ހައްގުވާ މީހެއްކަމަށާއި، އޭނާއަކީ ކެމްޕެއިން ކުރުމުގެ ހައްގު ވެސް އޮތް މީހެއްކަމަށެވެ. އޭނާ އެންމެ ފުރަތަމަ ވެސް ފާހަގަ ކުރެއްވީ ނުފޫޒު ނުފޯރުވާނެ ކަމަށްކަމަށް ނަޝީދު ވިދާޅުވިއެވެ.
މި އޯޑީއޯ ލީކުވެގެން ދިއުމާއެކު، އެމްޑީޕީގެ ބައެއް އެކްޓިވިސްޓުންނާއި އަދި މަޖިލިސް ބައެއް މެމްބަރުންވެސް ވަނީ މިއީ އެމްޑީޕީގެ ސިޔާސަތެއް ނޫންކަމަށް ބުނެ އަޑު އުފުލާފައެވެ. އަދި މުވައްޒަފުންނަށް އިންޒާރު ދިންކަމަށް ބުނާ ފެނަކަ ކުންފުނީގެ އިސްމުވައްޒަފު ވަޒިފާއިން ވަކި ކުރުމަށްވެސް ވަނީ ގޮވާލާފައެވެ.
ބައެއް ފަރާތްތަކުން ތުހުމަތު ކޮށްފައިވާ ގޮތުގައި، މުވައްޒަފުންނަށް ފެނަކައިގެ އިސް މުވައްޒަފު ބިރުދައްކާ އިންޒާރު ދީފައިވަނީ، ފެނަކައިގެ އެމްޑީ އެގޮތަށް އަންގައިގެންނެވެ. އަދި ފެނަކައިގެ ލޮޖިސްޓިކްސް ޑިޕާޓްމަންޓުގެ އިސް ވެރިއެއްގެ ގޮތުގައި ހުންނެވި ޒާހިރު އުސްމާނަކީ ފެނަކައިގެ އެމްޑީ ސައީދުއާއި ގާތް ގުޅުމެއް އޮންނަ ފަރާތެއްކަމަށްވެސް ފެނަކައިގެ ބައެއް މުވައްޒިފުން ނަން ހާމަ ނުކުރުމަށް އެދި މައުލޫމާތު ދީފައި ވެއެވެ.
މައުލޫމާތު ލިބިފައިވާ ގޮތުގައި ޒާހިރު އުސްމާނަކީ ފާއިތުވެދިޔަ ޕީޕީއެމްގެ ވެރިކަމުގައި އެޕާޓީގެ ހަރަކާތްތަކުގައިވެސް އިސް ދައުރެއް އަދާ ކުރައްވާފައިވާ ފަރާތެކެވެ.
