ޒިކުރާ މިސްކިތުގެ މައްސަލާގައި ހުކުމް އިއްވަން އޮތް ދުވަހު މައްސަލަ އަނބުރާ ގެންގޮސްފި

ޒިކުރާ މިސްކިތް އެޅުމަށް އެސްޖޭ ކޮންސްޓްރަކްޝަނާއެކު ވެފައިވާ އެއްބަސްވުން ބާޠިލްކުރި މައްސަލާގައި އެކުންފުނި 111 މިލިއަން ރުފިޔާގެ ބަދަލެއް ހޯދުމަށް ކޮށްފައިވާ ދައުވާގެ ހުކުމް އިއްވަން ތައްޔާރުވެފައިވަނިކޮށް، އެ މައްސަލަ އެސްޖޭއިން އަނބުރާ ގެންގޮސްފިއެވެ.

ކުރީގެ ޒިކްރާ މިސްކިތް ހުރި ބިމުގައި، މިސްކިތް ތަޅާލުމަށްފަހު އޮފީސް ބައިތަކާއެކު "ދާރުލް ޛިކްރާ"ގެ ނަމުގައި ވަޤުފު އިމާރާތެއް އިމާރާތްކުރުމަށް އެސްޖޭ ކޮންސްޓްރަކްޝަނާ ހަވާލުކޮށްފައިވާ މަޝްރޫޢުގެ ދަށުން އެކުންފުނިން އެއްވެސް މަސައްކަތެއް ކުރިއަށް ގެންގޮސްފައިނުވެއެވެ.

"ދާރުލް ޛިކްރާ"ގެ ނަމުގައި ވަޤުފު އިމާރާތެއް އިމާރާތްކުރުމަށް ކޮންޓްރެކްޓަރ ފައިނޭންސް އުސޫލުން އެސް.ޖޭ ކޮންސްޓްރަކްޝަނާ ރައީސް ޔާމީންގެ ސަރުކާރުން ހަވާލުކޮށްފައިވަނީ 2018 ވަނަ އަހަރުގެ ޖުލައި މަހުގެ 9 ވަނަ ދުވަހުއެވެ.

ޒިކުރާ މިސްކިތް އެޅުމަށް ދައުލަތުގެ ބަޖެޓުން ޚަރަދު ކުރުމަށް ހަމަޖެހިފައިވަނީ 30 މިލިޔަން ރުފިޔާއެވެ. އަދި ބާކީ ފައިސާ ޚަރަދުކުރުމަށް ހަމަޖެހިފައިވަނީ އެސް.ޖޭ ކޮންސްޓްރަކްޝަނުންނެވެ. މި މަޝްރޫޢުގެ ޖުމްލަ އަގަކީ 130 މިލިޔަން ރުފިޔާއެވެ. މި މަސައްކަތް ހަވާލުކޮށްފައިވަނީ 25 މަސްދުވަހުގެ ތެރޭގައި ނިންމާ ހަވާލުކުރުމަށެވެ. ނަމަވެސް އެމުއްދަތުގެ ތެރޭގައި އެސްޖޭ ކޮންސްޓްރަކްޝަނުން ފުރިހަމަކުރަންޖެހޭ ކަންކަން ފުރިހަމަކޮށްފައި ނުވާކަމަށް ބުނެ ސަރުކާރުން ވަނީ އެއްބަސްވުން އުވާލާފައެވެ. އެހެންކަމުން އެ އެއްބަސްވުން އުވާލުމުން އެކުންފުންނަށް ލިބުނު ގެއްލުމުގެ ބަދަލު ނަގައިދިނުމަށް އެދި އެސްޖޭ ކޮންސްޓަރަކްޝަނުން ވަނީ މައްސަލަ 2019 ވަނަ އަހަރުގެ އޭޕްރީލް މަހުގެ 30 ވަނަ ދުވަހު ކޯޓަށް ހުށައަޅާފައެވެ. އަދި އެ މައްސަލަ އެސްޖޭ ކުންފުންޏަށް ކާމިޔާބު ނުވުމުން އެ ކުންފުނީގެ ފަރާތުން ވަނީ ހައިކޯޓްގައި މައްސަލަ އިސްތިއުނާފްކޮށްފައެވެ.

މި މައްސަލާގައި ހުކުމާއި ހަމައަށް ގޮސްފައިވަނިކޮށް ސަރުކާރުން ވަނީ އެ ކުންފުންޏާއެކު އެއްބަސްވުމަކަށް އައިސް ހުޅުމާލޭގައި އެސްޖޭ ކުންފުނީގެ ޚަރަދުގައި މިސްކިތެއް ޢިމާރާތްކުރުމަށް އެއްބަސްވެފައެވެ.

އެ މައްސަލާގެ ހުކުމް އިއްވަން ހަމަޖައްސާފައި ވަނިކޮށް އެ މައްސަލަ އަނބުރާ ގެންދަން ސިޓީ ފޮނުވުމުން އެ މައްސަލައިގެ ދައުވާ ފޯމް ހައި ކޯޓުން ވަނީ ބާތިލްކޮށްފައެވެ.

މަޖީދީ މަގުގައި ޒިކުރާ މިސްކިތް ހުރި ބިމުގައި 10 ބުރީގެ އިމާރާތެއް ހަދަން އެސް.ޖޭ ކޮންސްޓްރަކްޝަނަށް ދަޢުލަތުން ދެއްކި، 30،000،000.00 (ތިރީސް މިލިއަން ރުފިޔާ) އަނބުރާ ދަޢުލަތަށް ނެގުމުގެ ބަދަލުގައި، ހުޅުމާލޭ ދެވަނަ ދިޔަވަހީގައި މިސްކިތެއް ބިނާކުރަން އެކުންފުންޏާއެކު ސަރުކާރުން އެއްބަސްވީ މިދިޔަ މަހުގެ 22ގައެވެ.

މިއެއްބަސްވުމުގައި ވަނީ ހުޅުމާލޭގެ ދެވަނަ ފިޔަވަހީގައި މިސްކިތެއް އެމާރާތްކުރުމަށެވެ. މި މިސްކިތުގެ އަގު 35,087,951.86 (ތިރީސް ފަސްމިލިއަން އަށްޑިހަ ހަތްހާސް ނުވަސަތޭކަ ފަންސާސް އެއްރުފިޔާ އަށްޑިހަ ހަ ލާރި) އަށް އަރައެވެ. މި މިސްކިތް އިމާރާތްކުރުމަށް 30 މިލިއަން ރުފިޔާއަށްވުރެ އިތުރަށް ހިނގާ ޚަރަދު، އެސް.ޖޭ ކޮންސްޓްރަކްޝަން ޕވޓ ލޓޑގެ ފަރާތުން ޚަރަދު ކުރާގޮތަށް އެ ކުންފުނިން ވަނީ އެއްބަސްވެފައެވެ.

ދެވަނަ ފިޔަވަހީގައި ތަރައްޤީކުރުމަށް ހަމަޖެހިފައިވާ މިސްކިތަކީ 3000 މީހުންނަށް އެއްފަހާ ނަމާދުކުރެވޭނެ ޖާގައިގެ މިސްކިތެކެވެ. އަދި މިސްކިތުގައި އަންހެނުން ނަމާދުކުރާނެ އިންތިޒާމްވެސް ހިމެނެއެވެ. މިއީ އެންމެ ޒަމާނީ ފެންވަރަށް ތަރައްޤީކުރާ މިސްކިތެކެވެ.

މިސްކިތް ނިންމުމަށް އެބަސްވެފައިވަނީ 1އަހަރާ 2މަސް ދުވަހުންނެވެ.