މިދިޔަ ޑިސެމްބަރު މަހު 119 ކިލޯގެ މަސްތުވާތަކެއްޗާއެކު ހައްޔަރުކުރި މީހުންގެ ތަޙްޤީޤް މުއްދަތު ޕްރޮސެކިއުޓަރ ޖެނެރަލްގެ އޮފީސް (ޕީޖީ)އިން ދެވަނަ ފަހަރަށް އިތުރުކޮށްދީފިއެވެ.
ދިވެހިރާއްޖެއަށް މަސްތުވާތަކެތި އެތެރެކޮށް ވިޔަފާރިކުރާކަަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ޑްރަގް އެންފޯސްމަންޓާއި ކައުންޓަރ ނާކޮޓިކްސް އިންޓެލިޖެންސް ގުޅިގެން މިދިޔަ ޑިސެމްބަރު މަހުގެ 12 އިން 14 އަށް މާލެއާއި ހުޅުމާލޭގައި ހިންގި އޮޕަރޭޝަންތަކުގައި ވަނީ 51 އަހަރުގެ ފިރިހެނަކާއި 25 އަހަރުގެ ފިރިހެނަކާއި 29 އަހަރުގެ ފިރިހެނެއް ހައްޔާރުކޮށްފައެވެ. މި އެންމެންނަކީވެސް ދިވެހިންކަމަށް ފުލުހުން ބުނެފައިވެއެވެ.
މި މައްސަލާގެ ތުހުމަތު 5 މީހުންނަށް ކުރެވެއެވެ. ނަމަވެސް ފުލުހުން ހައްޔަރުކުރީ މި ތިން މީހުން އެކަންޏެވެ.
އެ ތިން މީހުންގެ ކޯޓް ޢަމުރުގައި ބަޔާޏްކުރާ ގޮތުގައި، ބަންދުކޮށްގެން ތަހުގީގު ކުރުމަށް އޮންނަ 30 ދުވަހުގެ މުއްދަތު 11 ޖެނުއަރީގައި ހަމަވާތީ އެންމެ ފުރަތަމަ ޕީޖީ އޮފީހުން ފުލުހުންގެ ތަހުގީގުގެ މުއްދަތަށް އިތުރު 15 ދުވަސް ދިނެވެ.ނަމަވެސް އެ މުއްދަތު 26 ޖެނުއަރީގައި ހަމަވާތީ އިތުރު 15 ދުވަސް އަނެއްކާވެސް ވަނީ އިތުރުކޮށްދީފައެވެ. އެހެންކަމުން އެ މުއްދަތު ދެން ހަމަވާނީ އަންނަ ފެބުރުއަރީ 10އަށެވެ.
ޤާނޫނު ބުނާގޮތުން އެންމެ ގިނައިން ޕީޖީއަށް މުއްދަތު އިތުރުކުރެވޭނީ 30 ދުވަހުގެ މުއްދަށެވެ. އެހެންކަމުން ފެބުރުއަރީ 10އަކަށް ޕީޖީން މި މައްސަލަ ނިންމާ ދައުވާކުރަން ޖެހޭނެއެވެ.
މި އޮޕަރޭޝަންތަކުގައި މާލޭގެ ތިން ގެއަކާއި ހުޅުމާލޭގެ ގެއަކާއި ޓެކްސީ އަކާއި ޕްރައިވެޓް ކާރެއް އަދި ތިން ސައިކަލް ބަލައިފާސްކޮށްފައިވެއެވެ. މިގޮތުން ޑިސެމްބަރު 12 ވަނަ ދުވަހު މާލެއިން ޓެކްސީއެއް ހުއްޓުވައި ބަލައިފާސްކޮށް ގިނަ އަދަދެއްގެ މަސްތުވާތަކެތި ފުލުހުންގެ ބެލުމުގެ ދަށަށް ގެނެސް ދެ މީހަކު ހައްޔަރުކޮށްފައިވެއެވެ. އަދި ޑިސެމްބަރު 13 ވަނަ ދުވަހު ސައިކަލެއް ބަލައިފާސްކޮށް، ސައިކަލްގެ މަޑިދަށުން ގިނަ އަދަދެއްގެ މަސްތުވާތަކެތި ހޯދާފައިވާއިރު، ޑިސެމްބަރު 14 ވަނަ ދުވަހު މައްސަލައާ ގުޅުންހުރި އިތުރު މީހަކު ހައްޔަރުކޮށް ހުޅުމާލެއިން ކާރެއް ހުއްޓުވައި ބަލައިފާސްކޮށްފައިވާކަމަށް ފުލުހުން ވިދާޅުވެއެވެ. އަދި އެކާރު ބަލައިފާސްކޮށް ގިނަ އަދަދެއްގެ މަސްތުވާތަކެތި ހޯދާފައިވާކަމަށާއި މި އޮޕަރޭޝަނުގައި ޖުމްލަ 119 ކިލޯގެ މަސްތުވާތަކެތި ހޯދާފައިވާކަމަށް ފުލުހުން ބުނެފައިވެއެވެ.
