އެމެރިކާއިން ހަދިކުރި ފައިޒަރ ވެކްސިންތަކަކީ ރާއްޖޭގެ އެންމެންނަށް ބޫސްޓަރ ޝޮޓް ޖެހުމަށް ކުރަމުންދާ މަސައްކަތަށް ވަރަށް ބޮޑު ކުރިއެރުމެއްކަމުގައި ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
އދގެ ކޮވެކްސް ފެސިލިޓީ މެދުވެރިކޮށް އެމެރިކާއިން އިއްޔެ ދިވެހިރާއްޖެއަށް 210،600 ޑޯޒްގެ ފައިޒަރ ވެކްސިން ހަދިޔާކުރުމާ ގުޅިގެން ފޮރިން މިނިސްޓަރ އަބްދުﷲ ޝާހިދު، އެމެރިކާގެ ސެކްރެޓަރީ އޮފް ސްޓޭޓް އެންތަނީ ބްލިންކެން އާއި އެމެރިކާ ސަރުކާރަށް ޝުކުރު އަދާކުރައްވައިފައެވެ.
މިނިސްޓަރ ޝާހިދު ވިދާޅުވީ މި ވެކްސިންތަކަކީ ރާއްޖޭގެ އެންމެންނަށް ބޫސްޓަރ ޝޮޓް ޖެހުމަށް ކުރަމުންދާ މަސައްކަތަށް ވަރަށް ބޮޑު ކުރިއެރުމެއްކަމަށެވެ. އެމެރިކާއިން މިހާތަނަށް 4 ލައްކައަށްވުރެ ގިނަ ޑޯޒްގެ ވެކްސިން ރާއްޖެއަށް ވަނީ ހަދިޔާކޮށްފައެވެ. އަދި މީގެ އިތުރުންވެސް ކޯވިޑް-19 އާ ދެކޮޅަށް ސަރުކާރުން ކުރަމުންދާ މަސައްކަތަށް އެމެރިކާ ސަރުކާރުގެ އެހީތެރިކަން ވަނީ ވަރަށް ބޮޑަށް ލިބިފައެވެ.
މި ބަލިމަޑުކަން ފެށުނީންސުރެ އެމެރިކާއިން ދަނީ ރާއްޖެއާއެކު ކޯވިޑް-19 އާއި ދެކޮޅަށް މަސައްކަތް ކުރަމުންނެވެ. އެގޮތުން މިހާތަނަށް އެމެރިކާއިން ވަނީ ގާތްގަނޑަކަށް 440,000 ޑޯޒް ފައިޒާ ވެކްސިނާއި، 7 މިލިއަން އެމެރިކާ ޑޮލަރުގެ އިމަރޖެންސީ ސަޕްލައިއާއި، ތަމްރީނާއި، އެންމެ ބޭނުންޖެހިފައިވާ ޚިދުމަތްތައް ފޯރުކޮށްދިނުމަށް އެހީތެރިވެދީފައެވެ. އަދި ތަކެތީގެ އެހީގެ ގޮތުގައި މިނިސްޓްރީ އޮފް ހެލްތަށް 60 ވެންޓިލޭޓަރާއި 100,000 ރެޕިޑް ޑައިގްނޯސްޓިކް ޓެސްޓްވަނީ ފޯރުކޮށްދީފައެވެ.
