މިއަދު ވެރިކަން ކުރާ އެމްޑީޕީއަކީ ވަގުންގެ ޕާޓީއެއް ކަމަށާއި، އެޕާޓީގެ ލީޑަރޝިޕްގައި ތިއްބެވި ގިނަ ބޭފުޅުންކީވެސް ވައްކަމުގެ ބޮޑެތި ތުހުމަތު ކުރެވޭ ބައެއްކަމުގައި ކުރީގެ ނައިބް ރައީސް ޑރ.ޖަމީލް ވިދާޅުވެއްޖެއެވެ.

އިދިކޮޅު ކޯލިޝަނުން ކޮމަންޑޫ ދާއިރާގެ ބައިލެކްޝަންގައި ވާދަކުރައްވާ މޫސާ ފަތުޚީގެ ކެމްޕެއިންގައި މިރޭ ފޯކައިދޫގައި ބޭއްވި ޖަލްސާގައި ވާހަކަ ދައްކަވަމުން ޖަމީލް ވިދާޅުވީ، އެމްޑީޕީން އިދިކޮޅު ޕީޕީއެމްގެ ލީޑަރާއި، ޕީޕީއެމްގެ ބޮލުގައި ވައްކަން އަޅުވާއިރު، އެންމެބާރަށް އެންމެ ބޮޑަށް ވައްކަން ކުރަމުންދަނީ އެމްޑީޕީން ކަމަށެވެ.

މިސަރުކާރުގެ މިވީ، ތިން އަހަރުގެ ތެރޭގައި ކުރެވުނު ހަމައެކަނި ކަމަކީ ވައްކަން ކުރުންކަމަށެވެ. ޖަމީލް ވިދާޅުވީ، މިސަރުކާރުން އެންމެބޮޑަށް ބަލަން ވައުދުވި އެމްއެމްޕީއާރުސީގެ ވައްކަމުގައި އެންމެ ބޮޑަށް ބައިވެރިވަނީ މިސަރުކާރުގެ އެމްޑީޕީގެ އިސްބޭފުޅުންކަމަށެވެ. އެގޮތުން އެންމެ މަތިން ފެށިގެން އެންމެ ތިރިއަށްވެސް މިތުހުމަތު ކުރެވޭ ގިނަ ބަޔަކު ތިބިއިރު، މިއިން އެއްވެސް ބޭފުޅެއްގެ މައްސަލަ ބަލަން މިސަރުކާރަށް ނުކެރުނު ކަމަށެވެ.

ވައްކަމުގެ ވާހަކަ ދައްކަން އެމްޑީޕީން މިއަދު ލަދު ގަންނަންޖެހޭނެކަމަށް ޖަމީލް ވިދާޅުވިއެވެ. ބަދަލު ދިނުމާއި، ވައްކަމުގެ ތުހުމަތުކުރެވޭ، އެތައް އަމަލެއް ހިންގައި އެކަންކަމުން ސަލާމަތް ނުވެގެން އުޅޭ ބަޔަކު މަޖިލީހުގެ ގޮޑިއެއް ހޯދުމަށް ކުރާ ކޮންމެ މަސައްކަތަކީ ނުތާހިރު އަތަކާއި، ނުތާހިރު ހިތަކާއިއިގެން ކުރާނެ މަސައްކަތެއްކަމަށް ޖަމީލް ވިދާޅުވިއެވެ.

އެމްޑީޕީއަކީ ވަގުންގެ ޕާޓީއެއް. އެމްއެމްޕީއާރުސީގެ ތުޚުމަތު ކުރެވޭ ބޭފުޅުންތިބީ މިވެރިމުގެ މަތި ފަޑީގައި، ވަޒީރުންނަށް ދައުވާ ކުރެވިގެން އުޅުއްވާއިރު އެތިއްބެވީ ވަޒީރުކަމުގައި. އެމްޑީޕީއަކި ވަގުންގެ ޕާޓީއެއް.

– ޖަމީލް ވިދާޅުވިއެވެ.

ޖަމީލް ވަނީ މިޖަލްސާގައި ޖުމްހޫރީ ޕާޓީގެ ލީޑަރު ޤާސިމް އިބްރާހިމަށްވެސް ވަރަށް ބޮޑަށް ފާޑުވިދާޅުވެފައެވެ. ޑރ.ޖަމީލް ވިދާޅުވީ ރައްޔިތުންގެ އަސާސީގެ ހައްގުތައް ބޭނުންނަމަ އެމްޑީޕީއަށް ވޯޓުދޭންޖެހޭކަމަށް ޤާސިމް ވިދާވުމަކީ ލަދުހުތުރު ކަމެއްކަމަށެވެ. ރާއްޖޭގައި ހުރި އެންމެ ބޮޑު މަހުޖަނު ނިކަމެތި ރައްޔިތުންނަށް މިދިން މެސެޖަކީ ވަރަށް ނުބައި މެސެޖެއްކަމަށް ޑރ.ޖަމީލް ވިދާޅުވިއެވެ.

ޖަމީލް ވިދާޅުވީ، ކިތަންމެ ބޮޑު ހުރަސްތަކެއް ކުރިމަތި ކުރިނަމަވެސް މިގޮޑި ޕީޕީއެމްގެ ކެނޑިޑޭޓް މޫސާ ފަތުޚީ ކާމިޔާބު ކުރައްވާނެކަމަށެވެ. އެކަން ކުރަން ކޮމަންޑޫ ދާއިރާގެ ތިން ރަށުން ތިބީ އަތުކުރި އޮޅާލާފައި ކަމަށާއި، ކޮމަންޑޫ ދާއިރާގެ ރައްޔިތުންނަށް މިސަރުކާރުގެ ހީލަތްތެރި ރޭވުން ސާފުކަމަށް ޖަމީލް ވިދާޅުވިއެވެ.